Read Mousgoum Paakai zi sariya 5 Bible Online

Paakai zi sariya 5 - Mousgoum bible

Paakai zi sariya 5

¹War mefeŋ ni ɗa, Debora gaini Barak n’ahini Abinowam e zini yama maini nɵa:

²Aha warɗi Izrayel ɗa, won hlai na ɗai e bidi midiɗi li amai ɗa, Won hlai na ɗai e si siɗi li pini diriɗi won hlai n’e hili mini hatam ɗa, ki si kol sini EPIƊ-ƊAI.

³Tiki Paakai, ɵini pɗem. Tiki n’abakai, zigi ɵimaki, Ta, burini EPIƊ-ƊAI ɗa, Nkam ta ɗa, aga mu zina yama, Aga mu zina yama burini Epiɗ-ɗai Alaw na wiiɗi Izrayel.

⁴EPIƊ-ƊAI, won hlai na ku niyasi edi war Seyir par ɗa, Won na ku fakasi midini afti na Edom par aŋ halasi ɗa, Afti a ziriya, faŋ n’abai a ɵasi woni hlai n’amai par, ɗugul zi faŋ ɗa a hinasi yem na warni a kasi azumai.

⁵Huwaŋai a hiliya wuzani EPIƊ-ƊAI, -Sinai hanɗa, wuzani Epiɗ-ɗai Alaw na wiiɗi Izrayel,

⁶War sarti na wiini Sangar n’ahini Anat, war sarti na wiiɗi Yael, futi ɗa, ɗai e hili warɗi kir kai, ɗai n’e hili yaw yaw warɗi futi ɗa, e bindi e gûni edi ɗaw.

⁷Fuŋ na gaini ɵaga amai sini kai ɗa a hina warɗi Izrayel kir kai, a vada edi kafa. Haa tuku Debura ku fakasi, ku fakasi amai maiɗi ami nɵa war Izrayel.

⁸Ɗai e tiki piɗi aŋ piyi alawai na hahakai, paŋ ktai gaw ɗa a nafu aha min hlai gobi; Amma aha warɗi Izrayel ɗa, askarai e zi kadai dubu doogo doogo puɗu ɗi, ku nava gamar tiɗi ktai na woɗi ktai na woɗi, kawai ktai na woɗi, ktai na woɗi lai.

⁹Agula t'aŋ gaiɗi komandaŋai na wiiɗi Izrayel, t'aŋ gaiɗi ɗai n’e si siɗi pini diriɗi aŋ hili edi mini hatam, kisi tese sini EPIƊ-ƊAI.

¹⁰Tiki na ki ɗa hili gaini ablehökai na falakai, na ki simni war tapi, na ki ɗa hili warɗi futi lai, ki hiini pɗem.

¹¹A zuva ɓa ɵimani hlai na farai a ca yem woni ɗa, nagai n’e bili yem ɗa, e si kol sini EPIƊ-ƊAI gaini wulaɗi amai burini sda n’EPIƊ-ƊAI a zaŋ burini jre ɗikat. Burini wala n’a zaŋ burini jre ɗikat siɗi n’abakai na wiiɗi Izrayel, won hlai na ɗai na wiini EPIƊ-ƊAI, e niyisi azumai, e zizini siɗi mini hatam mini magalani fuŋ n’abakai.

¹²Fakasi amai, fakasi amai tuku Debura, fakasi amai, fakasi amai, tikasi yama amai, Fakasi amai, fakasi amai tuku Barak, hala gaiɗi ɗaiku na ku miliɗisi mini gaw par ɗa, ahini Abinowam.

¹³Nɵa nagai n’e hini karɗi ɗa, e niyisi azumai siɗi nagai na agulɗi a huna kai ɗa, ɗai na wiini EPIƊ-ƊAI, e niyisi azumai sini aŋ nivi gaiɗi gagalaɓai ɗa,

¹⁴Nagai n’e rɗi amai midiɗi pinzibani Amalek ɗa, e ɗi na war pinzibani Efrayim par, pinzibani Benyamin a tika futi piɗi lai, e tipi gaiɗi war vokɗi askaraiɗi lai. Abakaini vokɗi askarai ɗa, e ɗi na war piɗi humuni na wiini Makir ɗa par. Abakai na wiiɗi lawanai ɗa a na war pinzibani Zabulon par.

¹⁵N'abakai na war pinzibani Isakar ɗa, e tipi gaiɗi Debura, pinzibani Isakar ɗa e firiyi e ɓûrwi gaini Barak kai. E tiki futi pini witaw tar war hlai na plas. Amma war pinzibani Ruben ɗa, kitini-mi a za viya, amma a ɗiya kai.

¹⁶Ki hili ki simni arbani hlai na farani farai a fana woni aŋ zuɓura wulaɗi ɗai zi giɗimi n’e ɗa yiki fara ɗi ɗa, buri maɗa? Amma war pinzibani Ruben ɗa, kitini-mi a za viya, amma a ɗiya kai.

¹⁷Pinzibani Galaad ɗa siɗi si anene kata duɓani Yurdan piɗi futi na dawai ca, e tikisi eziɗi kai, Pinzibani Dan ɗa, siɗi si warmni hulumɗi ca buri maɗa? Pinzibani Aser ɗa, siɗi si agoɗom wulani yem-ra n’abai ɗa ca, mini hlai na hulum n’abakai a yima woni ca ɗa buri maɗa?

¹⁸Pinzibani Zabulon ɗa, e ɗi ɗai n’e si siɗi edi mini mri ta. Pinzibani Neftali nɵa lai, won hlai na gaw a sawa gdaŋ gara ɗa.

¹⁹Paakai na gawɗi e hilisi e hitimiɗi, paakai na Kanaan e hitimiɗi lai. E hitimi marɗi war Taanak; war hlai zi liwi yem na Megido, amma e nivi wala ktai tiɗi kai, arzaŋ kaalai.

²⁰Amai warni hlai n’amai par, meeɵek a hitimasi lai, war futini par, a hitimasi Sisera.

²¹Yem zi ki na Kison ɗa a dûgûɗi duk, yem n’a naka haa gamai par, yem na Kison. A zuva ɓa mu kirpiɗi gaini gdaɓɓa.

²²Nɵa, plasaiɗi zi rivi ɗa a lawa gaini gdaŋni, tetrekni n’ezini ɗa a vurga amai afti.

²³Sleŋ na wiini EPIƊ-ƊAI a muɗa: Tûsi fuŋ n’abai na Meroz, Tûsiŋ, ki tûsiɗi ɗai na warni lai. Buri ɓa e liwiini ɗuwal wiini EPIƊ-ƊAI kai, e liwiini ɗuwal wiini EPIƊ-ƊAI arbaɗi gaŋgalaŋai kai.

²⁴Arbaɗi falakai ɗa, kol siɗi Yael, Munini Heber na Kenit. Arbaɗi falakai n’e simni war gumu paŋ, kol siɗi.

²⁵Sisera a paya yem, na te sini ɗa a fiyaw. Te sini fiyaw kiŋtirɓi warɗi kup na zûvi na te sa siɗi ɗai na agulɗi a huna kai ɗa.

²⁶Te yima kawai n’e ɓili gumu azumai gaini ɗa war tiɗi ktai kaai, kawai n’e tûkiŋ azumai gaini na wiiɗi ɗai zi sda ɗa, war tiɗi na wus ɗa kai lai. Te fuɗa Sisera, te liɓini midini, te haɗa keɵke na pini ɵimani, te tûkûni midini azumai arni afti.

²⁷A hurgaɗi amai par azumai eziɗi, a kɵa azumai, a fana azumai. A hurga azumai eziɗi a kɵa azumai, Hlai n’a hurga azumai woni ɗa, a kɵa war hlai ni ɗa, suŋfa warni kai.

²⁸Arni fenetir par, emini Sisera te wasi midiɗi anene, te tala arɗi, te zilba siɗi maini nɵa: Saret zi gaw na wiini ɗa, haa tiyana a wayasi kai ɗa buri maɗa? Saretai zi gaw na wiini ɗa, a lawa kokolai kai ɗa buri maɗa?

²⁹Mairamai na yalakai gara ɗa e wiyini seŋ: na dama, te muɗa gaini warɗi ɓa:

³⁰E nivi der a na zek, e ɗi si na ɗa aŋ ɓûrwiŋ ba ɗi. Ɗif zi hatam paŋ ɗa, ɓulmi midini ktai ktai, ɵa kai sulu sulu ɗi, der ɗa, a sapa n’a zuva gara wiini Sisera, der ɗa, a sapa n’a zuva gara na wulani gaini tikiri, sapa n’a zuva gara ktai, wiiɗi falakai n’e yimiɗisi mini gaw ɗa.

³¹EPIƊ-ƊAI, a zuva ɓa gawku paŋ e mri edi maini Sisera nɵa, nagai n’e diriku ɗa, e ɓili maini futi, n’a yima gaini gdaŋni kaŋ ɗa nɵa. Afti a sumna ɵeɗ haa buza doogo doogo puɗu.