Read Mousgoum Paakai zi sariya 6 Bible Online

Paakai zi sariya 6 - Mousgoum bible

Paakai zi sariya 6

¹Aliɗi Izrayel e zi wazagai na maafanai wuzani arni EPIƊ-ƊAI, EPIƊ-ƊAI a siɗi edi war tiɗi ɗai na Madiyan buri buza muguzak.

²Ɗai na Madiyan e siŋki spakɗi edi midiɗi ɗai na Izrayel. Aliɗi Izrayel e simni war huduk, e ɓili waŋ amai sini huwaŋai, e simni midini hlai niyini gir.

³Won hlai na aliɗi Izrayel e bili seyemɗi li azumai ɗa, ɗai na Madiyan gaiɗi Amelitekai gaiɗi ɗai na piɗi futi na dawai par paŋ, e hilisi e cikiɗi aha.

⁴E pi kaŋɗi miɗi tiɓ, e tûûri seyem na midini aftiɗi ɗa edi haa aha miɗi Gaza ta. E hini wala zi simi, zaw adumai, zaw ɵaakai, zaw a blehökai aha warɗi Izrayel kai.

⁵Won hlai n’e hilisi li aŋ hatam ɗa, e hilisi ɗa gaini farani faraiɗi paŋ, gaini gumuɗi paŋ, e rɗisi viya maini ayuwi nɵa, e kiɗi e piɵi kai, nagai gaini ɵiginiɗi paŋ, e hilisi midini afti ɗa aŋ tûûriŋ edi

⁶Ɗai na Madiyan e vidiɗi gdaŋɗi aliɗi Izrayel edi gara, aliɗi Izrayel e tûwi sini EPIƊ-ƊAI.

⁷Won hlai na aliɗi Izrayel e ɗa tûwi sini EPIƊ-ƊAI burini wala na ɗai na Madiyan e ɗa ziŋɗi ɗa,

⁸EPIƊ-ƊAI a ɵinasi ɗif na mini Alaw siɗi aliɗi Izrayel, a miɗiɗi: Epiɗ-ɗai Alaw na wiiɗi Izrayel a na muɗa maini nɵa: Mu milikisi edi warɗi Egipte par, midini afti na ki ɗisi ka warni aŋ bege.

⁹Mu plikisi edi war tiɗi ɗai n’Egipte par, war tiɗi nagai na e ɗika e zigi gir ɗa paŋ par, mu birgiɗi edi wuzaki, mu siki afti na wiiɗi ɗa.

¹⁰Mu miɗki ɓa: Ta m’EPIƊ-ƊAI, Alaw na wiiki, alawai na wiiɗi Amoritekai na e simni midini aftiki ɗa, aga ki hûn ki, ammatiki ki ɵini ma kai

¹¹Asakal hanɗa, ɵeŋ na wiini EPIƊ-ƊAI a halasi a sumna azumai pini luwuŋ Kerebinte na war fuŋ n’e yikiŋ ɓa: Ofra, a sumna pini luwuŋ na wiini Yowas na war pinzibani Abiyezer. Gedeyon n’ahini a nafu aŋ gzila algama war luluf kapai a ŋoyaŋ wuzaɗi ɗai na Madiyan.

¹²Sleŋ na wiini EPIƊ-ƊAI a siŋka sini arni a miɗini: EPIƊ-ƊAI aŋ gaiku, tuku ɗif zi hatam na agulku a huna kai hanɗa.

¹³Gedeyon a wiyini seŋ: Epiɓgeza, na ɓa EPIƊ-ƊAI aŋ gaiyi ɗa, wazagai hanɗa paŋ a za siyi ɵa ɗa buri maɗa? Wazagai zi hiila n’abakai na tamaiyi e ɗika e miɗiyi gaini ɓa, EPIƊ-ƊAI a zaŋ won hlai n’a miliyisi edi warɗi Egipte par ɗa, wazagai ni ɗa aŋ wata ɗa? Tiyana ɗa, EPIƊ-ƊAI a hiniyi edi mak, a siyi war tiɗi ɗai na Madiyan.

¹⁴EPIƊ-ƊAI a bunda arni sini a muɗa: Ku hala gaini gdaŋku n’aŋ tuku na ɗa, aga ku piliɗisi ɗai na Izrayel edi war tiɗi ɗai na Madiyan ɗa par, mu ɵunuku na ɗa mu ta kai ɗi?

¹⁵A wiyini seŋ: Epin-geza, aga mu piliɗisi aliɗi Izrayel ɗa edi gaini a maɗa? Piɗi humuni na wiya ɗa, a na huruf na piɗi marni war pinzibani Manase ɗa, ta ɗe mu na agwi na war pakatai na wiini apa lai.

¹⁶EPIƊ-ƊAI a miɗini: Aga mu za gaku, aga ku birgiɗi ɗai na Madiyan maini na ɓa a ɗif ktai nɵa.

¹⁷Gedeyon a waya seŋ a miɗini: Na ɓa, a tala arku pɗem buri ku ɵinaŋa muta ɗa, mu siiwuku ɓa, ku za wala zi siŋki ktai n’a siŋka ɓa ku muɗaŋa na ɗa ku tuku.

¹⁸Mu siiwuku, ku hala warni hlai zamai kai haa mu halasi suku, mu kukusi ɓaka na wiya, mu tukuɓku azumai wuzaku ta haw. EPIƊ-ƊAI a miɗini: Aga mu biyukuka woni na haa ku wayasi haw.

¹⁹Gedeyon a hala a dasi hek ktai, a payasi avudi kilo doogo doogo hu, a za peŋ na gaini is arni kai, a mulasi neŋ war dologoi, a masi siyemni ɗa war wala kaai lai, a kiŋnisi azumai pini luwuŋ Kerebinte.

²⁰Sleŋ na wiini Alaw a miɗini: Mula neŋ gaini peŋ na is arni kai ɗa, mulaŋ azumai midini huwuŋ hanɗa, masiyem midini lai, a zaŋ maini hanɗa ɵa lai.

²¹Sleŋ na wiini EPIƊ-ƊAI a wa miɗi amaraŋai na t'aŋ tini ɗa, a tikiti sini neŋ gaini peŋ na is arni kai ɗa, nɵa afu a niyasi azumai siɗi huwuŋ par, a ya neŋ gaini peŋ na is arni kai ɗa edi. Asakal par ɵeŋ na wiini EPIƊ-ƊAI a yima edi wuzani arni par.

²²Nɵa, Gedeyon a sɗa ɓa a naka gaini na ɗa a ɵeŋ na wiini EPIƊ-ƊAI, nɵa a ɗuula a muɗa: Hai, EPIƊ-ƊAI ALAW, mu tala gaini ara na ɗa a ɵeŋ na wiini EPIƊ-ƊAI mal mal koo!

²³EPIƊ-ƊAI a miɗini: Tika hangalku ta, ku huna kai, aga ku mra kai.

²⁴Gedeyon a rga gûwiŋ zi ɓaka wiini EPIƊ-ƊAI warni hlai ni ɗa, a sini yiki ɓa: EPIƊ-ƊAI ɗa a ɵeɗ. Gûwiŋ zi ɓaka hanɗa, aŋ war Ofra, piɗi humuni na wiini Abiyezer, ɵa haa girna.

²⁵Koskoi ni ɗa, EPIƊ-ƊAI a miɗini wiini Gedeyon: Yima gari na wiini apuku ɗa, paya zamai ktai na buzani muguzak lai, ho gûwiŋ zi ɓaka na wiini alaw Baal na apuku a rgaŋ ɗa azumai. Luwuŋ z'alaw na muni Akera n’aŋ ɵimani gaini pi tiɓ ɗa, ku blaŋ azumai lai.

²⁶Asakal par ku rga gûwiŋ zi ɓaka mani n’a zuva aŋ za ɵa gaini zizini gaini futini wiini Epiɗ-ɗai Alaw na wiiku, amai midini boŋor hanɗa. Ku yima gari n’ag'aŋ sulu ɗa, za ɓaka zi yi gaini, ku pa afu ɗa gaini luwuŋ z'alaw na muni Akera na ku ɗuukulaŋ azumai ɗa.

²⁷Gedeyon a mula ɗai doogo arbaɗi ɗaini zi sda par, a za wala n’EPIƊ-ƊAI a miɗini midini, amma, a h ûniɗi tamaini gaiɗi ɗai na war fuŋ ɗa ta, a za sda hanɗa girvudu kai, a zaŋ ɗa duvuk.

²⁸Won hlai na ɗai e ɵiyisi amai gorof par cup ɗa, e nivisi gûwiŋ zi ɓaka na wiini alaw Baal ɗa gaini hû azumai ho. Luwuŋ z'alaw na muni, Akera n’aŋ ɵimani tiɓ ɗa gaini ɗû kli azumai daf, gari n’ag'aŋ sulu e zi ɓaka zi yi gaini midini gûwiŋ zi ɓaka n’e rgiŋ hehe ɗa lai.

²⁹E zilbi arbaɗi marɗi ɓa: n’a za hanɗa asiya ɗa? E yimi labar e tiki ezini lai, e niviŋ ɓa, a za hanɗa a Gedeyon n’ahini Yowas.

³⁰Nɵa ɗai na warni fuŋ ɗa e miɗini wiini Yowas: Sliyisi ahiku ɗa anene, mi fiɗiŋ edi, buri ɓa a haɗa gûwiŋ zi ɓaka na wiini alaw Baal ɗa azumai, a ɗuukula luwuŋ z'alaw na muni n’aŋ ɵimani tiɓ ɗa azumai daf lai.

³¹Yowas a wiyiɗi seŋ wiiɗi nagai na e hilisi mini ɗa maini nɵa: Alaw Baal ɗa, ki zi hiy pini ki ɗi tiki ɗi? Ki piliŋ edi ki ɗi tiki ɗi? -Na ɓa ɗif a tikaŋ li mini ɗaw aŋ za hiy pini Baal ɗa, haa dawai gorof par ta ɗa, e fiɗiŋ edi. Na ɓa Baal a Alaw ɗa, hiniŋ a fuɗawas gaini midini dama, buri ɓa e hu azumai na ɗa a gûwiŋ zi ɓaka na wiini.

³²War mefeŋ ni ɗa e ɵini yiki wiini Gedeyon ɓa: Yerub-Baal, a dara a muɗa: Baal ɗa a fuɗa wasni gaini midini kiini, buri ɓa Gedeyon a ho azumai ɗa a gûwiŋ zi ɓaka na wiini.

³³Ɗai na Madiyan ɗa paŋ, Amalekekai paŋ, gaiɗi ɗai na piɗi futi na dawai par ɗa paŋ lai e diŋgi, e vigisi ra Yurdan, e pi kaŋɗi war huduk na Yizreyel.

³⁴Seze na wiini EPIƊ-ƊAI a niya sini Gedeyon, Gedeyon a yiba faana kapai pinzibani na wiini Abiyezer ɗa paŋ e niyisi anene pini.

³⁵A ɵina ɵeŋ sini pinzibani Manase aŋ yikiɗisi gaini lai, a ɵina ɵeŋ war pinzibani Aser gaini Zabulo gaini Neftali lai, nagai paŋ e hilisi piɗi lai.

³⁶Gedeyon a miɗini wiini Alaw maini nɵa: Na ɓa ku dara ku kûrɗiɗi ɗai na Izrayel edi gaya maini na ku muɗaŋ ɗa ɵa ɗa,

³⁷Tala, mu na ɵa amurni adumai na gaini ayirni sini edi warni luluf, na ɓa maɗai a ɵa li sini amur ɗa kiini taa ha, hlai na ɵimani ɗawwa ɗa a hina li huleŋ su ɗa, aga mu sɗa ɓa, aga ku kûriɗi ɗai na Izrayel edi gaya maini na ku muɗaŋ ɗa ɵa.

³⁸A za maini nɵa, dawaini ɗa a fakasi amai gorof par cup, a supuɗa amur ɗa, yem a kasi edi sini amur ɗa par, a va kop ɗaw.

³⁹Gedeyon a miɗini wiini Alaw: Mu siiwuku, ku za hiy sa kai, mu muɗa n’aŋ ma ta lai suwi, mu firiya ɓa ku zaŋa wala zi siŋki gaini amur hanɗa ktai pra, amur ɗa a hina huleŋ kiini ta, hlai na ɵimani paŋ a wa maɗai.

⁴⁰Alaw a za sini maini hanɗa ɵa war duvuk hanɗa, amurni adumai ɗa a hina kiini huleŋ ta, hlai na ɵimani paŋ a wa maɗai.