Read Mousgoum Paakai zi sariya 7 Bible Online

Paakai zi sariya 7 - Mousgoum bible

Paakai zi sariya 7

¹Yerub-Baal, a dara a muɗa: Gedeyon, gaiɗi askarai na wiini ɗa e fiki amai gorof par cup, e pi kaŋ na wiiɗi ɵimani hlai zi yem na Herod. Kaŋ na wiiɗi ɗai na Madiyan ɗa, a nafu tiɗi war gal n’azumai sek, sini boŋor na More par haa woni hlai na huduk ɗa ta.

²EPIƊ-ƊAI a muɗa wiini gedeyon: Vokɗi askarai n’aŋ puku ɗa abai, mu kiɗa mu siɗi ɗai na Madiyan war tiɗi kai, ɵa kai ɗa aliɗi Izrayel ɗa aga e kûli siɗi mada, e miɗi lai ɓa: Mi pli siyi edi ɗa gaini gdaɓyi.

³Tiyana ɗa, mu siiwuku, ku miɗiɗi wiiɗi askarai n’e ɗi puku ɓa: Asiya ɗi paŋ na hunai aŋ pini, n’a na ziriya lai ɗa a waya wiini aha, a hala wiini midini hlai zi huwuŋ na Galaad ɗa ɗaw. Ɗai dubu caaɓa pi sulu arbani vok hanɗa par e wiyi aha, e hini ɗai dubu doogo.

⁴EPIƊ-ƊAI a miɗini wiini Gedeyon: Vok n’aŋ puku ɗa a viya pra, kiɗi agoɗom mini yem, woni aga mu vuruku ɗai n’e hili gaiku ɗa, ɗif na mu muɗuku li ɓa a hala gaiku ɗa, aga a hala gaiku, na mu muɗuku li ɓa a hala gaini kai ɗa, aga a hala gaiku kaalai.

⁵A ka vokɗi askaraini agoɗom mini yem, EPIƊ-ƊAI a miɗini wiini Gedeyon: Ɗai paŋ n’aga e ci yem gaiɗi alsiɗi maini hirgakai ɵa ɗa, ku miliɗi war gal ktai, nagai paŋ n’aga e pi kurnaiɗi azumai aŋ ci yem ɗa, ku miliɗi war gal ktai lai.

⁶Nagai na e bilisi yem amai miɗi gaini tiɗi e ciŋ maini hirgakai ɵa lai ɗa, e ɗa ɗai miya hu. Pini vok hanɗa paŋ ɗa e pi kurnaiɗi azumai aŋ ci yem.

⁷EPIƊ-ƊAI a miɗini wiini Gedeyon: Aga mu plikisi edi ɗa gaiɗi ɗai na miya hu n’e ci yem maini hirgakai ɵa na ɗa, aga mu suku ɗai na Madiyan war tuku gaiɗi ɗai hanɗa. Vok n’a hina paŋ ɗa, ɗif paŋ ahani ahani.

⁸E milika wazagai zi simi n’aŋ tiɗi vok hanɗa gaini faana na wiiɗi lai, asakal par ɗa a tikiɗi piɗi ɗai na Izrayel na gaini abaiɗi ɗa aha, a hina ka piɗi ɗai miya hu, kaŋ na wiiɗi ɗai na Madiyan ɗa a nafu azumai par pini war huduk.

⁹War duvuk ni ɗa, EPIƊ-ƊAI a miɗini wiini Gedeyon: Faka amai, hala war kaŋ, buri mu siɗi war tuku ya.

¹⁰Na ɓa hili na woni ɗa, hunai puku ta ɗa, ku hala gaini Pura na ɗifku zi sda ɗa.

¹¹Aga ku ɵina seŋ na e ɗa miɗiŋ ɗa, asakal par suku aga a bla amai, nɵa hala war kaŋ. A hala war kaŋ, haa aha miɗi askarai n’e ɗiysi edi avut mini hatam ɗa.

¹²Ɗai na Madiyan, Amalekekai gaiɗi ɗai na piɗi futi na dawai par paŋ e digi azumai war huduk maini farani ayuwi nɵa; Zliginiɗi ɗa pɵani kai maini kai kai na agoɗom nɵa.

¹³Won hlai na Gedeyon a co ɗa, a nava ɗif ktai a na vurna weseŋ n’a pɵaŋ wiini maini, a muɗa ɓa: Weseŋ a pɵaɓa maini nɵa: Mu tala peŋ zi orge a na likita war kaŋ na wiiɗi ɗai na Madiyan, a co sini gumu ɗa a dabaŋ. Gumu ɗa a ho azumai, a kukutaŋ kutkut.

¹⁴Maini a wiyini seŋ: A za ka tuku na ɗa a kaɵkar na wiini Gedeyon n’ahini Yuwas na Izrayel ɗa, Alaw a siɗini ɗai na Madiyan gaini kaŋɗi paŋ war tini.

¹⁵Won hlai na Gedeyon a ɵina labar midini weseŋ zi piɵi hanɗa gaini gaglai n’a za midini lai ɗa, a hurga azumai aŋ sa tese sini Alaw. Asakal par a wayasi war kaŋ na wiiɗi Izrayel a miɗiɗi: Fiki amai, EPIƊ-ƊAI a siki kaŋ na wiiɗi ɗai na Madiyan ɗa tiki ya!

¹⁶Gedeyon a ɓirwiɗi askaraini na miya hu ɗa azumai azi hu, ɗif paŋ ɗa a sini faana tini ɗaw, argiŋ na wala warni kai ɗaw ɗaw, kalu z'afu warni argiŋ ɗa ɗik ɗik lai.

¹⁷A miɗiɗi: Ki mili arki sa, ki zi maya ta nɵa, won hlai na mu co li sini kaŋ gobi ɗa, wala na mu zaŋ li ɗa, tiki ki ziŋ ɵa lai.

¹⁸Won hlai na mu yiba li faana, ta gaiɗi nagai n’e ɗi gaya paŋ ɗa, tiki lai aga ki yibi faana edi par sini kaŋ ɗa paŋ, ki miɗi lai ɓa: A wiini EPIƊ-ƊAI gaini Gedeyon.

¹⁹Gedeyon gaiɗi askarai na miya ktai n’e ɗa gaini ɗa, e cû gobi aha mini kaŋ gobi gaini duvuk n’arba, war sarti na nagai n’e giɗimi duvuk n’arba ɗa e bindi marɗi ya, Gedeyon gaiɗi ɗai na pini ɗa e yibi faana e gɵi argiŋ n’aŋ tiɗi ɗa edi lai.

²⁰Nɵa vok na hu paŋ e yibi faana, e gɵi argiŋ na tiɗi edi, e ymi kalu z'afu war tiɗi na muni, faana war tiɗi na wus lai kapai e yibiŋ, asakal par e ɗûûli e miɗi: Yalla, Hutumumu burini EPIƊ-ƊAI, burini Gedeyon lai.

²¹E ɗiyisi edi par sini kaŋ ɗa, ɗif paŋ war balamni zaw zaw. Ɗai na aha war kaŋ ɗa e tiki piɗi e rivi put put aŋ ɗûûli, aŋ pri edi lai.

²²Won hlai na askarai na miya hu e tiki piɗi e yibi faana ɗa, EPIƊ-ƊAI a bindiɗi ɗai na aha war kaŋ ɗa aŋ hitimi gaiɗi marɗi dama, ɗai paŋ e pri edi haa a Bet-Sita, war gal na Serera sek, haa gobi aha miɗi Abel-Mehola, gobi gaiɗi Tabbat.

²³Ɗai na Izrayel e yiki siɗi, nagai war pinzibani Neftali gaini na wiini Aser, gaini na wiini Manase paŋ lai, - etiki futi piɗi ɗai a Madiyan.

²⁴Gedeyon a ɵina ɗai edi midini hlai zi huwuŋ na wiini Efrayim paŋ aŋ miɗiɗi wiiɗi ɗai maini nɵa: Niyisi edi miɗi ɗai na Madiyan ɗa, hlai zi yem ta ta ɗa, ki miliŋ ka wuzaɗi kafa haa Abet-Bara ta, gaini wulani yem-ra na Yurdan ɗa paŋ. Nɵa ɗai na war pinzibani Efrayim ɗa, e tipi siɗi e mili hlai zi yem n’a na ta ta ɗa kafa haa Abet-Bara ta gaini yem-ra na Yurdan ɗa lai.

²⁵E yimiɗi paakai na sulu na wiiɗi ɗai na Madiyan ɗa, Oreb gaini Zeeb, e fiɗi Oreb midiɗi huwuŋ na wiini Oreb, e fiɗi Zeeb ɗa war hlai na wiini n’e siri alini luwuŋ zi vin woni ɗa. Asakal par e tiki futi piɗi ɗai na Madiyan, e kisini humokni Oreb gaini Zeeb wiini Gedeyon anene par duɓani yem-ra na Yurdan.