Read Mousgoum Paakai zi sariya 8 Bible Online

Paakai zi sariya 8 - Mousgoum bible

Paakai zi sariya 8

¹Pinzibani Efrayim e miɗini wiini Gedeyon: Na u ziyi ɵa ɗa a maɗa? Ku hala aŋ hitima gaiɗi ɗai na Madiyaŋ ɗa ku yikiyi kai ɗa buri maɗa? E miɗini seŋ na gdaŋ gara.

²Gedeyon a wiyiɗi seŋ a muɗa: Tiɓ ɗa, na mu zaŋ na kapai a kata gaini na wiiki ɗa a maɗa? N'agwi na ki ziŋ ɗa, a suwa sda n’abai na pinzibani Abiyezer a zaŋ ɗa kai ɗi?

³Alaw a siɗi paakaiɗi ɗai na Madiyan Horeb gaini Zeeb ɗa war tiki, na mu zaŋ n’a kata gaiki ɗa a maɗa? Won hlai n’a muɗa hanɗa ya, hiy n’aŋ warɗi sini ɗa a ɵaɗa azumai.

⁴Gedeyon a co agoɗom wulani Yurdan, a bunda anene kata, ni gaiɗi ɗai na miya hu n’e ɗa pini lai. E ɗifu gaini kaiaiɗi paŋ ɗa e tiki futi piɗi gawɗi.

⁵E miɗiɗi wiiɗi ɗai na Sukkot: Mu siiwiki, siɗi peŋ na wulla ɗa wiiɗi ɗai n’e ɗi pa ɗa, buri ɓa e kiyi ca. Mu tika futi na ɗa pini Zeeba gaini Salmunna, paakai na wiiɗi ɗai na Madiyan.

⁶Abakaiɗi ɗai na Sukkot ɗa, e wiyini seŋ e miɗi: Zeeba na gaini Salmunna ɗa, ku rɗasi amai midiɗi kaswa par ɗa, na kapai tiyi mi si peŋ wiiɗi askaraiku ɗa?

⁷Gedeyon a wiyiɗi seŋ: Pɗem, hlai n’EPIƊ-ƊAI a saŋa li Zeeba gaini Salmunna war ta ɗa, aga mu ɵiɓiki gaini hedek n’edi war basga par gaini duvudvud lai.

⁸Woni par, a hala a Penuwel, a zilba maini hanɗa nɵa lai. Ɗai na Penuwel e wiyini seŋ maiɗi ɗai na Sukkot ɗa ɵa pra.

⁹Nɵa a miɗiɗi wiiɗi ɗai na Penuwel maini nɵa: Won hlai na mu rɗasi li amai, mu wayasi li ɗa, aga mu giɵiti poriyoki ɗa azumai.

¹⁰Zeeba gaini Salmunna e ɗifu a Karkor gaini vok na wiiɗi, e zi ɗai gobi dubu doogo pi ɵim. Nagai n’e hinisi pini vokɗi askarai na wiiɗi ɗai na piɗi futi na dawai par ɗa, ɗai n’e siɗi hatam gara e mri gobi dubu miya gaini caaɓa.

¹¹Gedeyon a tikiti futi na wiiɗi ɗai zi giɗmi farai n’e simni war gumu, war gal na tiɗi futi na dawai par tiɗi Noba gaiɗi Yogbola, e fiɗiɗi askarai na e hiini ɓa wala na meefeŋ aga a za siɗi kir kai ɗa edi.

¹²Zeeba gaini Salmunna e pri edi, Gedeyon a tika futi piɗi, a yimiɗi paakai na sulu na wiiɗi ɗai na Madiyan, Zeeba gaini Salmunna, a ɵiriɗi askaraiɗi edi lai.

¹³Gedeyo n’ahini Yowas, a wayasi edi mini hatam par warɗi futi na te niya a Heres sek ɗa.

¹⁴A yima gawla na Sukkot par ktai, a zilbaŋ; gawla hanɗa a ɗûni yikiɗi n’abakai n’e ɵi wi ûze igaɗi abakai n’arbaɗi ɗai na war s, ɗa e zi paŋ ɗai doogo doogo muguzak pi muguzak.

¹⁵Asakal par a wayasi siɗi ɗai na Sukkot a miɗiɗi: Zeeba gaini Salmunna na ki tirkiɓa piɗi, ki miɗi lai ɓa: Zeeba gaini Salmunna ɗa ku rɗa amai midiɗi ya ɗi, na kapai mi si simi miɗi ɗaiku na gaini kiyi ca ɗa, e ɗi na.

¹⁶Nɵa a miliɗi n’abakai na war fuŋ n’abai ɗa, a payasi hedek gaini duvudvud kapai a ɵiɓiɗi ɗai na Sukkot ɗa gaini.

¹⁷A giɵiti poriyo na Penuwel ɗa azumai, a fiɗiɗi ɗai na war fuŋ n’abai hanɗa azumai lai.

¹⁸Asakal par a zilbini mini Zeeba gaini Salmunna maini nɵa: Ɗai na ki fiɗiɗi amai midiɗi huwuŋ Tabor ɗa, e siɗi maɵa maɵa ɗa? E wiyi seŋ e miɗi: E ɗifu maiku ɵa, ɗif a sɗa maini ahini pai ɵa.

¹⁹Nɵa a miɗiɗi: E ɗi tawalakaya, n’aliɗi amai tar. Gaini EPIƊ-ƊAI zaŋ, na ɓa ki fiɗiɗi kai ɗa, ta aga mu fiɗiki kaalai.

²⁰Asakal par a miɗini wiini Yeter n’ahini n’abai ɗa maini nɵa: Fiɗiɗi edi. Amma arwagwi ɗa a kiɗa a fiɗiɗi kai buri ɓa agwi gara, hunai pini ta lai.

²¹Zeeba gaini Salmunna e miɗi: Tuku mal, halasi fiɗiyi, buri ɗif wus ɗa a na ɗa maini hanɗa ɵa, gdaŋ a na maini hanɗa ɵa lai. Nɵa Gedeyon a fuɗa Zeeba gaini Salmunna edi, a mula vara na wuulani ɵiginiɗi ɗa,

²²Asakal hanɗa, ɗai na Izrayel e miɗini wiini Gedeyon, tuku gaini muduku sumna aŋ pai na wiyi, asakal par ɗa a ahiku, asakal par a ahini ahiku pra, buri ɓa ku kurɗiyisi edi tiɗi ɗai na Madiyan ɗa par.

²³Gedeyon a miɗiɗi: Aga mu sumna aŋ pai miɗiki kai, ahiya kaalai, aga a sumna aŋ pai na wiiki ɗa a EPIƊ-ƊAI.

²⁴Gedeyon a miɗiɗi: Mu dara mu zilba wala tiki ktai, pini der na ki niviɓsi mini hatam par ɗa, ɗif paŋ a saŋa adoŋo ɗaw ɗaw buri ɓa gawɗi ɗa e ɗifu gaini adoŋo zi or tiɗi buri ɓa e ɗi na war pinzibani Ismayel.

²⁵E miɗi: Aga mi suŋku, e biri sapa azumai bar, ɗif paŋ a kitisi adoŋoi na wiini a ɵiti warni.

²⁶Kiloni adoŋo zi or n’a zilbaŋ tiɗi par ɗa, a za gobi caaɓa, wazagai zi gaŋ gaini wazagai na ɵime, gaini sapa na pur pur na mekele na wiiɗi paakai na Madiyan ɗa, gaini aidaw na wulani ɵigini lai ɗa pɵani arni kai.

²⁷Gedeyon a za wala n’e zilbi dirini Alaw gaini, gaini or hanɗa, a ɗiyaŋ aha warni fuŋ n’abai ɗa, war Ofra Aliɗi Izrayel paŋ e hilisi e hûrg z azumai wuzani alaw ni ɗa; a bunda aŋ azaw burini Gedeyon gaiɗi ɗai n’ahani paŋ.

²⁸Ɗai na Madiyan ɗa e tiki siyer wuzaɗi aliɗi Izrayel, e hini azumai piɗi ɵa, war sarti na wiini Gedeyon ɗa, afti a sumna ɵeɗ haa buza doogo doogo puɗu.

²⁹Yerubaal n’ahini Yowas a waya aha, a sumna ahani.

³⁰Gedeyon a wa ali na maɵagai doogo doogo muguzak, e ɗi alini ni mal mal, buri ɓa falakaini e ɗifu viya.

³¹Marmaini na t'aŋsi a Sikem ɗa te wiini ahi ktai, a sini yiki ɓa Abimelek.

³²Gedeyon n’ahini Yowas a mra war ɵeɗ, a za wel kroh kroh, e piŋ warni waŋ na wiini Yowas n’epini war Ofra, fuŋ na wiini piɗi humunini Abiyezer.

³³Asakal mrini Gedeyon par, aliɗi Izrayel e tiki piɗi aŋ hû rgi azumai wuzani alaw Baal, e yimi Baal-Berit aŋ alaw na wiiɗi.

³⁴Aliɗi Izrayel midiɗi a wula gaini Epiɗ-ɗai Alaw na wiiɗi n’a piliɗisi edi war tiɗi gawɗi n’e gûniɗi azumai ɗa par.

³⁵Sda na pɗem na Gedeyon na yikini zamai ɓa: Yerubaal a zaŋ siɗi aliɗi Izrayel ɗa, nagai e hiini midini kai, e zi wala ktai na pɗem siɗi alini kaalai.