Read Mousgoum Paakai zi sariya 9 Bible Online

Paakai zi sariya 9 - Mousgoum bible

Paakai zi sariya 9

¹Abimelek n’ahini Yerubaal a hala war Sikem aŋ muɗa seŋ hanɗa wiiɗi kinakaini gaiɗi zagalakaiɗi emini. A miɗiɗi:

²Zilbiɗi tamaiɗi Sikem gai hlaiɗi: Na pɗem buriki a ma ɗa, a na ɓa alini Yerubaal na doogo doogo muguzak paŋ e ŋi midiki, zaw a na ɗif ktai pal a ɓa miɗiki ɗi? Hini miɗiki a kɵa ɓa mu neŋ siki.

³Kinakaini Abimelek e hili e miɗi seŋ hanɗa wiiɗi tamaiɗi Sikem, nagai e rgi miɗi aŋ tipi gaini Abimelek, buri e hiini ɓa ni a tawalɗi.

⁴Nagai e sini sulai zi arzaŋ doogo doogo muguzak na war tempel na wiini Baal-Berit par. Gaini sulai hanɗa, Abimelek a wura ɗai na nafaɗi kai gaiɗi gorɓolokai gaini, kapai e zi aŋ askarai na wiini.

⁵Asakal par a niya aha war dalam na wiini epini war Ofra, a fiɗiɗi tawalakaini edi, alini Yerubaal na doogo doogo muguzak ɗa, midini ahi-fuŋ ktai. A hina a Yotam tar, n’agwi asakal tar, buri ɓa a ŋoya cok.

⁶Ɗai na Sikem gai hlaiɗi, nagai na war Bet-Milo lai, e tipi siɗi, e tiki Abimelek aŋ pai, gobi ɵimani luwuŋ Terebente na Sikem, ɵimani ahi-fuŋ z'alaw na gai ɗiyi amai zaw ɗa.

⁷Won hlai na Yotam a ɵina seŋ hanɗa, a hala a ɗiya amai midiɗi huwuŋ Garizim, a ɗuula a muɗa: Ziɓiri seŋŋa ɗa, ɗai na Sikem, Alaw a zaida.

⁸Mefeŋ ktai, luwoŋai a kata mini aŋ tika pai arbani. E miɗini wiini luwuŋ Olive: sumna aŋ pai midiyi.

⁹Luwuŋ Olive a wiyiɗi seŋ: Emelŋa na ɗai gaiɗi alawai e firyiŋ gara na ɗa, kapai mu hinaŋ edi ta, ɓa mu hala mu gigiza sa amai midini luwoŋai na zamai ɗa par ki ɗi?

¹⁰Luwuŋai e miɗini wiini luwuŋ Fige: Tuku halasi, sumna aŋ pai midiyi,

¹¹Amma luwuŋ Fige a wiyiɗi seŋ: kapai mu hina ali zi wi na naamakai, na pɗamai lai edi mak, kapai mu hala mu gigiza amai par midini luwoŋai zamai ɗa ɗi?

¹²Nɵa luwoŋai e miɗini wiini luwuŋ zi vin: Tuku halasi sumna aŋ pai midiyi.

¹³Amma luwuŋ zi vin ɗa a wiyiɗi seŋ: Kapai mu hina ka vinŋa n’a sa firiyi wiiɗi alawai gaiɗi ɗai murɗakai edi mak, aŋ hala, aŋ gigiza amai par midini luwoŋai zamai ɗa ɗi.

¹⁴Nɵa luwoŋai paŋ e miɗini wiini luwuŋ zi hedek: Tuku halasi, sumna aŋ pai midiyi.

¹⁵Luwuŋ zi hedek a wiyiɗi seŋ maini nɵa: Na ɓa ki diri ki tikiŋa aŋ pai jre jre ɗa, hilisi simni pini sezeŋa. Na ɓa nɵa kai ɗa, afu aga a niyaɗi edi sini hedekŋa par, a ya haa sini luwuŋ Sedre na Liban ɗa paŋ edi.

¹⁶Tiyana ɗa, kiti na ki tiki Abimelek aŋ pai na ɗa, ki ziŋ na ɗa war jre gaini hiiniki paŋ ɗi? Wala na ki ziŋ sini Yerub-Baal gaini dalamni na ɗa, a futini ɗi? Wala na ki ziŋ sini na ɗa a wala na ki kiɗi ki ziŋ sini maini hanɗa ɵa ɗi?

¹⁷Buri ɓa Apa a hitima buriki, a sa suŋfani edi buriki aŋ plikisi edi war tiɗi ɗai na Madiyan ɗa par,

¹⁸Tiki girna ki fiki amai siɗi pakatai na wiini apa, ki fiɗiɗi alini na doogo doogo muguzak ɗa edi midini ahi-fuŋ ni ktai, ki tiki Abimelek n’ahiɗi bagaini ɗa aŋ pai midiɗi n’abakai na war Sikem ɗa ta, buri ɓa ni a tawalki.

¹⁹Na ɓa, na ki ziŋ sini Yerub-Baal gaiɗi pakataini girna na ɗa, ki ziŋ na ɗa war jre gaini hiiniki paŋ lai ɗa, Abimelek aga a va firyiki amai, tiki aga ki vini firyini amai lai.

²⁰Na ɓa ɵa kai ɗa, afu aga a niyasi edi sini Abimelek par a yiɗi n’abakai na war Sikem gaini fuŋ na Millo edi, afu aga niyasi edi siɗi n’abakai na Sikem gaini fuŋ na Millo par a ya Abimelek edi lai.

²¹Yotam a yima sini a pra edi war hlai zamai, a hala a sumna war Beera, edi gaigai sini Abimelek na tawalni par.

²²Abimelek a suma pai midiɗi Izrayel buza hu.

²³Nɵa Alaw a ɵinasi seze na meefeŋ arbani Abimelek gaiɗi ɗai n’abakai na Sikem, a dara a muɗa, seze zi ɓraw. Ɗai na Sikem e fiki amai sini Abimelek.

²⁴Nɵa, meefeŋ n’a ziŋɗi wiiɗi alini Yerub-Baal na doogo doogo muguzak gaini felɗi lai ɗa a kɵa midini Abimelek na tawalɗi n’a fiɗiɗi edi, gaiɗi n’abakai na war Sikem n’e zini pini haa a fiɗiɗi edi ɗa.

²⁵N'abakai na Sikem e mili ɗai amai midini huwoŋai n’aŋ sini fuŋ ɗa gobi ɗa ca ca aŋ riɓtiŋ, ɗif paŋ n’a vugasi li warɗi futi hanɗa e virmi wazagaini. Ɗai e ki labar hanɗa wiini Abimelek.

²⁶Nɵa mefeŋ ktai ɗa, Gaal n’ahini Ebed a cosi a Sikem gaiɗi tawalakaini, ɗai na Sikem e tiki hiiniɗi midini.

²⁷E hili edi warni vuwaiɗi ɗa, e riwisi alini luwuŋ zi vin, e cipiɗiŋ, e tiki piɗi aŋ zi fet, e hili amlai warni dalam na wiini alaw na wiiɗi, e simi, e ci, e tiki piɗi aŋ miɗi meefeŋ sini Abimelek.

²⁸Gaal n’ahini Ebed a muɗa: Abimelek ɗa asiya ɗa? Tumu ɗai n’a Sikem ɗa, mu ɗumu ɗai na wa ɗa, na kapai mu hunumu Abimelek a ɓa mudumu ɗa? Ni ɗa a ahini Yerub-Baal ɗa kai ɗi? Zebul ɗa a ɗifni n’a tikaŋ ka ta aŋ ɓa midini fuŋ n’abai ɗa kai ɗi? Slini ɗa piɗi ɗai na wiini Hamor n’a tikiti Sikem azumai ɗa, mu ɵunumu pini Abimelek tiɓ buri maɗa?

²⁹Ta ɗa, na ɓa ɗai hanɗa e siɗiŋa fu ta ɗa, aga mu tikini pini Abimelek. Asakal par a miɗini wiini Abimelek: Ku riya vokɗi askaraiku amai, niyasi edi.

³⁰Zebul, Lawan na wiini fuŋ n’abai a ɵina seŋ na Gaal n’ahini Ebed a muɗaŋ ɗa, a za hiy.

³¹A ɵina ɗai sini Abimelek aŋ kuɗuhai aŋ miɗini: Gaal n’ahini Ebed gaiɗi tawalakaini ɗa e cûsi e ɗa Sikem, e ɗa fikiɗi ɗai na war fuŋ n’abai ɗa amai suku.

³²Nɵa tiyana ɗa, faka amai duvuk gaiɗi askaraiku ɗa, hili li ŋûyisi edi warni basga par cok.

³³Gorof par cup hlai na futi te diyasi amai ɗa, hala ku caka fuŋ n’abai ɗa. Won hlai na Gaal gaiɗi ɗaini e niyisi li edi muku ɗa, aga ku za sini maini na ku dara nɵa.

³⁴Abimelek gaiɗi askaraini paŋ, e fiki duvuk, e ɓûrwi siɗi azumai puɗu, e simnisi edi par siɗi Sikem ca ca.

³⁵Gaal n’ahini Ebed a niyasi anene, a ɗiya mini magala na wiini fuŋ n’abai ɗa par zaw. Abimelek gaiɗi askarai na wiini e niyisi edi warni hlai n’e ŋûyi warni par.

³⁶Gaal a tiliɗi, a miɗini wiini Zebul: Ɗai e ɗa niyisi amai midini huwuŋ ɗa par. Zebul a wiyini seŋ: Zaw kai, a tala arku maiɗi ɗai ɵa na ɗa a sezeni huwoŋai.

³⁷Gaal a waya a muɗa: E niyisi amai siɗi huwuŋ n’arba par na ɗa e ɗi ɗai mal mal, vok zamai a na halasi warɗi futi na te ka sini luwuŋ Terebente na ɗai n’e tili wazagai na wuze e simni pini ɗa par lai.

³⁸Zebul a wiyini seŋ: Seŋku zi limi ɗa aŋ wata pra? Tuku na ku naka ku muɗa ɓa: mu ɵunumu pini Abimelek ɗa ni tiɓ ɗa asiya ktai ɗi ɗa? E ɗi askarai na ku naka ku tûriɗi muku kai ɗa kir ka. Tiyana ɗa, za barka hitima gaini haw le.

³⁹Gaal a niya edi, edi wuzaɗi n’abakai na war Sikem par aŋ hitima Abimelek.

⁴⁰Abimelek a tika futi pini, ni a pra edi, ɗai e mri viya gara haa aha mini magala na wiini fuŋ n’abai ɗa ta.

⁴¹Abimelek a ɗiya war Aruma ta, Zebul a birga Gaal gaiɗi tawalakaini edi, nagai e simni war Sikem kir kai.

⁴²Dawaini ɗa ɗai e niyi edi war vuwai ɗa, Abimelek a ɵina labar hanɗa.

⁴³A miliɗi askarai na wiini, a ɓûrwiɗi arɗi azumai hu, e niyi edi basga aŋ hitimiɗi. Won hlai n’a tiliɗi ɗai e ɗa niyisi edi warni fuŋ n’abai ɗa par ɗa, e fiki amai siɗi, a fiɗiɗi edi.

⁴⁴Abimelek gaini vok n’e ɗa pini ɗa, e hili e ɗiyisi mini magalani fuŋ ɗa par ca. Vok na sulu ɗa e yimi siɗi ɗai edi war basga, e fiɗiɗi edi.

⁴⁵Abimelek a yiva haa aŋ hitima gaini fuŋ n’abai, a tikaŋ a fiɗiɗi ɗai na warni edi, asakal par a ho fuŋ n’abai hanɗa azumai, a poko hum warni puk puk lai.

⁴⁶Won hlai na ɗai n’abakai na war fuŋ n’abai na Migdal-Sikem e ɵini hanɗa, e hili e ŋûyi siɗi amlai warɗi dilimi na te na azumai tempel na wiini alaw Berit ɗa.

⁴⁷Ɗai e hilisi e miɗini wiini Abimelek ɓa ɗai n’abakai na Migdal-Sikem par e tipisi e ɗi edi woni.

⁴⁸Nɵa, Abimelek a niya amai midiɗi huwuŋ Salmon gaiɗi ɗaini zi hatam paŋ, Abimelek a tika beŋel ɗaw, a bla tini luwuŋ ktai a tikaŋ wulani. Asakal par a miɗiɗi wiiɗi ɗaini n’e ɗi pini ɗa: Ki tili wala na mu zaŋ ɗa ya, zi maya ta ɵa, witaw witaw.

⁴⁹Ɗif paŋ ɗa a bla tini luwuŋ ktai ktai e hili pini Abimelek. E ɵipi luwuŋ ɗa miɗi dilimi ɵap ɵap, e ɵi afu pini su, e yiti dilimi edi gaiɗi ɗai na warɗi paŋ. Ɗai na war Migdal-Sikem ɗa, e mri edi maini hanɗa ɵa, pɵaɗi gobi dubu ɗaw, maɵagai gaiɗi falakai paŋ.

⁵⁰Woni par Abimelek a hala midiɗi Tebes, a cikiti a tikiti lai.

⁵¹Hlai zi ŋoyai ktai a nafu aha arbani fuŋ, ɗai paŋ e rivi woni sek, maɵagai gaiɗi falakai gaiɗi ɗai n’abakai na war fuŋ n’abai ɗa lai. E dûgû miɗi amlai warni hlai hanɗa, e niyi amai midini midini zi mili na maini daba ɵa ɗa.

⁵²Abimelek a halasi gobi siɗi poriyo ɗa aŋ cikiti, a halasi mini magalani poriyo aŋ ɵa afu piɗi.

⁵³Nɵa muni ktai te blasi ahi-fuŋ zi siri wai azumai midini, humokni a luɓa.

⁵⁴Nɵa won hlai ni tizaw, Abimelek a yikasi ɗifni n’a liba wazagaini zi hatam ɗa a miɗini: Rɗa kaɵkarku ɗa, fuɗaŋa, kapai e miɗi kai ɓa te fuɗaŋ te muni kai. Ɗif n’a liba wazagaini zi hatam ɗa a ɓulaŋ, a mra lai.

⁵⁵Won hlai na ɗai na Izrayel e tili ɓa Abimelek a mra su ɗa, ɗif paŋ a waya aha war dalamni.

⁵⁶Nɵa, Alaw a hinasi meefeŋ n’a zaŋ sini epini, won hlai n’a fiɗiɗi tawalakaini na doogo doogo muguzak edi ɗa, a hinaŋ a kɵasi midini maini hanɗa nɵa.

⁵⁷Alaw a hina meefeŋ paŋ na ɗai na Sikem e ziŋ ɗa a waya midiɗi, tusa na Yotam n’ahini Yerub-Baal a muɗa midini ɗa.