Read Mousgoum Siŋki n’edi 1 Bible Online

Siŋki n’edi 1 - Mousgoum bible

Siŋki n’edi 1

¹Hanɗa a wazagai na Yesu Kristu a siŋkaŋ edi, n’Alaw a siŋni buri a siŋkiŋɗi wiiɗi ɗaini zi sda, wazagai n’aga a za gobi. A siŋkini hanɗa won hlai n’a ɵina ɗif zi ɵeŋ na wiini sini ɗif zi sda Yohanɗa.

²Yohanɗa a muɗa edi midini wazagai n’a talaŋ paŋ, Seŋ na wiini Alaw gaini zaida na wiini Yesu Kristu.

³Sleɗ midini ni n’a ŋa seŋ n’aŋ war seŋ na wuze gaini wulani amai, gaiɗi nagai n’e ɵiniŋ, n’e giɗimi seŋ n’aŋ gai ɗû warni ɗa lai, buri hlai a na gobi.

⁴Ta Yohanɗa, mu ɗo siɗi Tipi na muguzak n’a na war Asiya: A zuva ɓa Alaw n’a na, n’a naka, n’aga a halasi lai a siki yum gaini ɵeɗ, seze na muguzak n’a na wuzaɗi paramaiɗi paini, a sa siki nɵa lai.

⁵Yesu Kristu, zaida na jre, n’a ɵiyasi amai avut arbaɗi zi mri par, paiɗi paakai na midini afti a sa siki nɵa lai. Sin ni n’a durumu n’a pulumusi edi war tuwurmu par gaini fel na wiini,

⁶n’a bundumusi aŋ aliɗi pai, aŋ paakai zi ɓaka na wiini Alaw Epini, sin ni kol gaini spak haa hlai n’a vada kai, n’a vada kai. Amen.

⁷Tili, a na halasi gaini ɗugul, ɗai paŋ aga e tiliŋ, nagai n’e ɓiliŋ ɗa lai paŋ, pinzibaɗi ɗai na midini afti paŋ aga e ɵi hama siɗi burini. Nkam, amen.

⁸Epiɗ-ɗai Alaw a muɗa: Ta mu Alfa gaini Omega, ni n’a na, n’a naka, n’a na halasi lai, Alaw zi Spak paŋ.

⁹Ta Yohanɗa, na tawalki, na maiki na bri na wiini aŋ war gir, warɗi pai, gaini siiki na war Yesu. Mu nafu midiɗi wudi n’e yikiti ɓa Patmos burini seŋ na wiini Alaw gaini miɗi n’edi midini Yesu.

¹⁰Won hlai na seze a niya sa war mefeŋ na wiini Epiɗ-ɗai, mu ɵina wule ktaa a wasi duba par, gdaŋ gara maini wulani fana nɵa.

¹¹A muɗa, wazagai na ku talaŋ paŋ, ku ɗoŋ war maktuɓ, ku ɵinaŋ siɗi Tipi na muguzak: Siɗi Tipi na war Efesus, na war Smirna, na war Pergamum, na war Tiyatira, na war Sardis, na war Filadelfiya, gaiɗi na war Laudikeya.

¹²Mu bunda ara duɓa buri mu tala ni n’a na muɗaŋasi. Won hlai na mu bunda ara li ɗa, mu tala wazagai n’e higi lampa sini, zi or muguzak.

¹³Amlai arbani wazagai n’e higi lampa sini ɗa, wala ktai a sɗa maini ɗif murɗek ɵa. Rob na mugwi gai wi sini ɗik, haa azumai ezini ta, santir zi or gaini wi paɵani ɗik lai.

¹⁴Midini gaini ayirni muɗukwi kaŋ, maini ayirni adumai na muɗukwi nɵa, maini maaɗai zi glas nɵa, arni ɗa maini afu n’a ya nɵa,

¹⁵ezini ɗa maini kiya n’a ɵa mekele nɵa, wulani ɗa a wa maini suurani yem n’abai nɵa.

¹⁶War tini na wus ɗa, meeɵek a nafu muguzak, war mini par ɗa, kaɵkar na mini a suma gara war galni sulu paŋ a niyasi edi. Arni ɗa a ŋala maiɗi futi na te yima girvudi kaŋ ɗa nɵa.

¹⁷Won hlai na mu talaŋ, mu kɵa azumai wuzani maini gaini mri su nɵa. A tikiti tini na wus mada a muɗa: Ku huna kai, Ta mu n’avut gaini n’asakal,

¹⁸na karni lai. Mu nasi ka gaini mri, amma tiyana mu na kara haa hlai n’a vada kai, kle na wiini mri gaini na wiini hlai zi mri aŋ ta.

¹⁹Nɵa ɗo wazagai na ku talaŋ ɗa, wazagai n’a na tiyana, gaini n’aga a halasi asakal par ɗa lai.

²⁰Meeɵek na muguzak, na ku talaŋ war ta na wus gaini wazagai n’e higi lampa sini zi or na muguzak lai ɗa, a siŋka midini wala. Meeɵek na muguzak ɗa, e ɗi zi sda na midini Tipi na muguzak, wazagai n’e higi lampa amai sini na muguzak ɗa e ɗi Tipi na muguzak ɗa lai.