Read Mousgoum Siŋki n’edi 11 Bible Online

Siŋki n’edi 11 - Mousgoum bible

Siŋki n’edi 11

¹E siŋa vayai n’a sɗa maiɗi amaraŋai ɵa ta ɗaw, e miɗiŋa: Faka amai, hala katasi mogoni gaini brukni tempel na wiini Alaw, gaini gûwiŋ zi ɓaka lai. Piɵiɗi nagai n’e siiwi warni ɗa lai.

²Amma pakatai n’anene, na wiini tempel ɗa aga ku hiniti edi, ku kata mogoɗi gaini brukɗi kai, buri te sa siɗi pinziba na zamai. Nagai aga e kirpi fuŋ n’abai na sɗik azumai pin eziɗi haa tile doogo doogo puɗu pi sulu.

³Aga mu bindiɗi zaidakaiŋa na sulu n’e wi siɗi aŋ sapa a sak ɗa, aŋ ɗai n’e miɗi seŋ na wuze haa mefeŋ dubu gaini miya sulu gaini doogo doogo ɵaara.

⁴Nagai e ɗi luwuŋ olive na sulu, gaini wazagai n’e higi lampa sini na sulu, zaidakai na sulu hanɗa e ɗiyi wuzani Epiɗ-ɗai n’a ŋa midini afti paŋ.

⁵Na ɓa ɗif a dara a ziɗi meefeŋ ɗa, afu a niyasi edi war miɗi par a yiɗi gawdi edi. A na ɗa ɵa. Na ɓa ɗif a dara a ziɗi meefeŋ ɗa, aga a fuɗa edi ɗa mai hanɗa ɵa.

⁶Spak a sa siɗi buri e dûgi min hlai n’amai, kapai faŋ a ɵa kai, war mefeŋ n’e ɗa miɗi seŋ na wuze ɗa, spak a sa siɗi buri e bindi yem aŋ fel, buri e kisi gir na wata ɗi paŋ midini afti.

⁷Won hlai na nagai e vidi li gaiɗi zadaɗi paŋ ɗa, wala n’ezini puɗu aga a niyasi amai warni huduk na wuŋŋa par, aŋ hitima gaiɗi, aga a rɗa amai midiɗi, a fiɗiɗi edi lai.

⁸Kopoŋɗi ɗa aga a hina puk warɗi futi n’amai na wiini fuŋ n’abai na war seze ɗa e sini yiki ɓa Sodoma gaini Egipte, a hlai n’EPIƊ-ƊAI na wiiɗi a toko amai sin dagra woni mal.

⁹Ɗai paŋ, pinzibaɗi ɗai paŋ meme paŋ ɗai na midini afti zamai zamai ɗa paŋ, aga e tili kopoŋɗi ɗa haa mefeŋ hu gai gal, aga e hini ɗif a pa kopoŋɗi azumai kai.

¹⁰Ɗai na midini afti paŋ aga e firiyi piɗi, e zi fet, e ɵini katu wiiɗi marɗi lai, buri ɓa ɗai na min Alaw na sulu hanɗa e kiyiɗi ɗai na midini afti ɗa gara.

¹¹Asakal n’e zi mefeŋ na hu gai gal ɗa, seze zi suŋfa a halasi sini Alaw par, a niya warɗi, e ɗiyi amai midini eziɗi, hunai n’amai te yimiɗi nagai n’e tiliɗi ɗa.

¹²E ɵini wule na gdaŋ a muɗa siɗi warni fuŋ-n’Alaw par maini nɵa: Niyisi amai na, e niyi warni fuŋ-n’Alaw, arbani ɗugul, gawɗi e tiliɗi lai.

¹³War ler ni dama ziriyini afti n’abai a za, gal n’ag'aŋ doogo na wiini fuŋ n’abai ɗa a ho azumai, ɗai dubu muguzak e mri min ziriyini afti hanɗa. Ɗai n’e hini ɗa hunai n’abai a yimiɗi, e si kol sin Alaw na war hlai n’amai ɗa lai.

¹⁴Gir n’ag'aŋ sulu a vuga li, gir n’ag'aŋ hu ɗa aŋasi gobi.

¹⁵Nɵa, ɗif zi ɵeŋ na war fuŋ-n’Alaw n’ag'aŋ muguzak a biyiti faanai na wiini ɗa, wule n’abakai a wasi amai war fuŋ-n’Alaw par a muɗa: Pai na midiɗi yai ɗa, te sa war tini Epiɗ-ɗai na wiimu gaini Kristu na wiini. Aga a ŋa haa hlai n’a vada kai, n’a vada kai.

¹⁶N'abakai zi ɵi wuze na caaɓa pi puɗu n’e simni wuzani Alaw midini paramaiɗi e yiki siɗi azumai, e pi arɗi azumai, e hûrgi azumai wuzani Alaw,

¹⁷e miɗi: Tiyi mi suku tese, Epiɗ-ɗai Alaw, Alaw zi spak paŋ, tuku na ku na, na ku naka lai, buri ku siŋka spakku n’abai ɗa li edi, buri ku tikiti paiku li azumai lai.

¹⁸Pinziba na zamai ɗa e bindi gaini hiy, amnia hiy na wiiku ɗa a cosi ya, gaini sarti na ku zitiɗi sariya wiiɗi ɗai zi mri, na ku siɗi vrak wiiɗi ɗaiku zi sda, ɗaiku na min Alaw, na sɗik gaiɗi nagai n’e sini hormo wiini yikiku ɗa, n’agogoi gaiɗi n’abakai lai, sarti na ku ɓilkiɗi nagai n’e ɓilki afti ɗa lai.

¹⁹Tempel na wiini Alaw n’a na war hlai n’amai, a mala edi, zunduk zi bonu na wiini a siŋkasi edi amlai warni tempel par, wilɗi a za, wule a wa, alawai zi ɓarai e ɓiri, afti a ziriya, wutiŋ a yaka abai lai.