Read Mousgoum Siŋki n’edi 12 Bible Online

Siŋki n’edi 12 - Mousgoum bible

Siŋki n’edi 12

¹Wala zi siŋki n’abai ktai a za arbani hlai n’amai. Muni ktai futi te wa siɗi maini sapa nɵa, tile ɗa azumai par pin eziɗi, bogorai zi meeɵek doogo pi sulu midiɗi gai pi tiɓ lai.

²Te nafu aŋ ziya, te ɗuula warni ŋiba gaini gir na wiini pukiɗi.

³Siŋki zamai a za war hlai n’amai. Wala-meefeŋ n’abai n’abai, na mekele main afu ɵa, humokni muguzak, miyokni doogo lai, bogorai muguzak gaini pi midini humokni tiɓ tiɓ.

⁴Giɗerni a si gal n’ag'aŋ hu na wiini meeɵek n’arbani hlai n’amai, a yakaŋsi azumai midini afti. Wala-meefeŋ n’abai n’abai ɗa a ɗiya wuzaɗi muni na te dara te poka ɗa. Kapai hlai na te pokosi li ɗa, a rɓa ahiɗi ɗa.

⁵Na te wa ahi, a ahi na wus, n’aga a ɵa wuzaɗi pinziba na zamai ɗa paŋ, gaiɗi amaraŋai zi pai zi kawai. Ahiɗi ɗa a yima amai sin Alaw, siɗi Paramai zi pai na wiini.

⁶Amma muni ɗa te pra edi war basga na kaɗataŋ, war hlai n’Alaw a ziziniɗi hlaiɗi woni, kapai e siɗi simiɗi woni, haa mefeŋ dubu gai miya sulu gaini doogo doogo ɵaara.

⁷Hatam a faka amai war fuŋ-n’Alaw. Mikayel gaiɗi ɗai zi ɵeŋ na war fuŋ-n’Alaw e hitimi gaini wala-meefeŋ-n’abai n’abai ɗa, wala-meefeŋ-n’abai n’abai ɗa a hitima gaiɗi, gaiɗi ɗai zi ɵeŋ na wiini lai.

⁸Amma a rɗa amai ɗa a wala meefeŋ n’abai n’abai ɗa kai, nɵa hlai zi simni na buriɗi war fuŋ-n’Alaw aŋ kir kai.

⁹Wala-meefeŋ-n’abai n’abai, wala-meefeŋ na war pi zi tiki par, n’e yikiŋ ɓa Mat gaini Satan, ni n’a wûliɗi ɗi na midiɗi yai ɗa paŋ edi, e biliŋsi azumai, e biliŋsi azumai midiɗi yai ɗai zi ɵeŋ na wiini gaini lai.

¹⁰Nɵa mu ɵina wule na gdaŋ amai war fuŋ-n’Alaw par a muɗa: Tiyana kûri gaini spak gaiɗi pai na wiini Alaw na wiyi gaiɗi abai na wiini Kristu na wiini a cosi li, Buri ni n’a pa seŋ midiɗi tawalakaiyi a ɵiŋkaɗi li azumai, ni n’a pa seŋ midiɗi wuzani Alaw na wiimu girvudi gaini duvuk paŋ.

¹¹Amma Mikayel gaiɗi ɗaini ɗa e rɗi amai midini burini fel na wiini Ahiɗi-adumi, burini seŋ n’e zi zaida midini lai, nagai e si suŋfaɗi edi ta, e hûni mri ɗa kai.

¹²Buri nɵa, hlai n’amai, firiya, gaiki tiki paŋ na hlaiki zi simni a na amai woni. Haw gara buriki tiki afti gaini yem-ra-n’abai, buri ɓa mat a niyaɗi a na azumai siki, war suwar n’abai buri a sɗa ɓa hlaini a hina viya kir kai.

¹³Won hlai na wala-meefeŋ-n’abai n’abai a tala ɓa e ɵiŋkiŋsi azumai su ɗa, a tika futi piɗi muni na te wa ahi na wus ɗa.

¹⁴Nɵa baada na graŋni muka n’abai na sulu a sa siɗi muni, buri te ɗufla edi war basga na kaɗataŋ war hlai n’a zizina buriɗi, buri te nava simniɗi woni, edi gaigai sini wala-meefeŋ n’abai n’abai ɗa par, buri hlai ktai, hlai sulu, gal hlai ktai lai.

¹⁵Wala-meefeŋ n’abai n’abai ɗa a huŋva yem edi war mini par, maini ra nɵa, piɗi muni, kapai yem zi ki a finiti.

¹⁶Amma afti a luwiiɗi ɗuwal wiiɗi muni, a mala mini edi, a ca ra na wala-meefeŋ n’abai n’abai a huŋvaŋ edi mini par ɗa.

¹⁷Wala-meefeŋ-n’abai n’abai a bunda gaini hiy siɗi muni, a hala a hitima gaiɗi pinziba n’e hini ɗa gaiɗi nagai n’e yimi gadai na wiini Alaw, n’e zi zaida midin Yesu lai.

¹⁸Asaka par a ɗiya midini kaikai na war yem-ra n’abai ɗa zaw.