Read Mousgoum Siŋki n’edi 13 Bible Online

Siŋki n’edi 13 - Mousgoum bible

Siŋki n’edi 13

¹Nɵa mu tala wala n’ezini puɗu ktai a niyasi agoɗom par warni yem-ra-n’abai, miyok midini doogo, humokni muguzak lai, bogorai doogo midini miyokni na doogo, yiki zi tirki na sin Alaw gaini ɗû sin humokni lai.

²Wala n’ezini puɗu na mu talaŋ ɗa a sɗa maini ahraw ɵa, ezini ɗa maini na wiini urs ɵa, mini ɗa maini mini gurnai ɵa. Wala meefeŋ-n’abai n’abai ɗa a sini gdaŋni Paramai zi pai na wiini gaini spak n’abai lai.

³Humokni ktai ɗa a nava wuruk n’abai n’a kiɗa a nava mri mini, amma wuruk n’abai hanɗa, a zuula. Ɗai na midini afti paŋ e bindi hiyak, e tipi pin wala-n’ezini puɗu hanɗa.

⁴Ɗai e hûrgi azumai wuzani wala-meefeŋ n’abai n’abai ɗa, buri a sini spak wiini wala-n’ezini puɗu ɗa, ɗai e hûrgi azumai wuzani wala-n’ezini puɗu ɗa e miɗi: Ɗif n’a kata gaini wala-n’ezini puɗu ɗa asiya ɗa? N'a kiɗa a hitima gaini asiya ɗa?

⁵Mi a sa sini buri a muɗa seŋ n’abakai zi fiɗi si gaini tirki na sin Alaw lai, apak a sa sini buri a za sda haa tile doogo doogo puɗo pi sulu.

⁶A mala mini amai aŋ tirka Alaw, aŋ miisa yikini, gaini hlaini zi simni gaiɗi nagai na hlaiɗi zi simni a na amai war fuŋ n’Alaw.

⁷Spak a sa sini buri a hitimiɗi na sɗik, aŋ rɗa amai midiɗi lai, spak a sa sini midini pinziba paŋ, midiɗi ɗai paŋ, midini meme paŋ, midini pinziba zamai zamai paŋ lai.

⁸Ɗai na midini afti paŋ, na yikiɗi aŋ gai ɗû haa war piɗi yai zi tiki par, war maktuɓ zi suŋfa na wiini Ahiɗi-adumi n’e fiɗiŋ edi kai ɗa, aga e hûrgi azumai wuzani.

⁹Na ɓa ɗif aŋ gaini ɵime ɗa a pɗem ɓa a ɵina.

¹⁰Na ɓa ɗif burini te daŋgai ɗa, aga a suma daŋgai. Ɗif n’a na ɓa aga a mra mini kaɵkar ɗa, aga e fiɗiŋ edi gaini kaɵkar lai. Hanɗa a wala n’a siŋka siiki gaini yimi na wiiɗi na sɗik edi ɗa.

¹¹Nɵa mu tala wala zamai n’ezini puɗu a niyasi azumai arni afti par, miyokni sulu maini na wiini Ahiɗi adumi nɵa, a muɗa seŋ maini wala-meefeŋ n’abai n’abai nɵa.

¹²Spakni wala n’ezini puɗu n’avut, n’a halasi wuzani ɗa, a sa sini, a kiɗi ɗai aŋ hûrgi azumai wuzani wala n’ezini puɗu n’avut na wuruknia zuula ɗa.

¹³A za wazagai zi siŋki n’abakai viya, haa a yimasi afu amai war fuŋ-n’Alaw par azumai midiɗi yai wuzani arɗi ɗai.

¹⁴A wula ɗai na midini afti ɗa edi, gaini wazagai zi siŋki n’a sa sini aŋ zaŋ wuzani wala n’ezini puɗu ɗa, a miɗiɗi wiiɗi ɗai na midini afti buri e rgi wala ktai maini wala n’ezini puɗu n’e zini wuruk gaini kaɵkar, n’asakal par a bunda karni ɗa ɵa.

¹⁵Spak a sa sini buri a sa suŋfa warni wala zi rgi na maini wala n’ezini puɗu ɵa ɗa, kapai wala zi rgi a sɗa aŋ muɗa seŋ, a fiɗiɗi nagai paŋ n’e hûrgi azumai wuzani wala zi rgi na maini wala n’ezini puɗu ɵa kai ɗa.

¹⁶A ziɗi dewele wiiɗi ɗai paŋ, buri e tiki wala zi siŋki ktai midiɗi tiɗi na wus, amai midini arɗi lai, wiiɗi n’abakai gaiɗi n’agogoi, wiiɗi zi farai gaiɗi na murgakai, wiiɗi na kempekai gaiɗi bagakai lai.

¹⁷Ɗif a sɗa aŋ wura wala kaalai, aŋ cikila wala edi kaalai, na ɓa wala zi siŋki aŋ sini kai, yikini wala n’ezini puɗu zaw numero na wiini wiini yikini aŋ tini kai ɗa.

¹⁸Hanɗa a hlai na yel a kiɗa a siŋka edi woni ɗa. Ɗif na yelni a na ɗa aga a paya numero na wiini wala-n’ezini puɗu ɗa. Buri ɓa numero hanɗa a siŋka midini yikini ɗif, numero ni ɗa a na miya ɵaara gai doogo doogo ɵaara pi ɵaara.