Read Mousgoum Siŋki n’edi 14 Bible Online

Siŋki n’edi 14 - Mousgoum bible

Siŋki n’edi 14

¹Mu tala Ahiɗi-adumi amai midiɗi huwuŋ Siyon zaw, ɗai na dubu miya gai doogo doogo puɗu pi puɗu, na yikini gaini yikini Epini aŋ gai ɗû amai midini arɗi ɗa, e ɗa gaini lai.

²Mu ɵina wule ktai amai war fuŋ-n’Alaw par, maini suura na wiini yem-n’abai nɵa, maini suura na wiini alaw zi ɓarai na gdaŋ nɵa. Wule na mu ɵinaŋ a wasi ɗa, a na maini wule na wiini wazagai zi zini yama, na ɗai zi ɵiɓi gaŋgraŋ e ɵiɓiŋ ɗa nɵa.

³E zini yama ktai na hehe wuzaɗi Paramai zi pai gaini wazagai zi rgi na karni na puɗu, gaiɗi n’abakai zi ɵi wuze lai. Ɗif n’a kiɗa hitriti yamai hanɗa, kapai a ziniti, aŋ kai, sai na dubu miya gai doogo doogo puɗu pi puɗu, n’e wuriɗisi edi midini afti ɗa par.

⁴Hanɗa e ɗi nagai n’e zi siɗi hi-hir gaiɗi falakai kai, -nagai e ɗa gaini didiɓi kai. E hili pini Ahiɗi-adumi woɗi paŋ n’a hala. E wûriɗisi edi arbaɗi ɗai par maini merfeŋni seyem n’avut nɵa wiini Alaw, na wiini Ahiɗi-adumi lai.

⁵Eles war miɗi kai, tirki siɗi kaalai.

⁶Mu tala ɗif zi ɵeŋ na war fuŋ-n’Alaw zamai ktai a na ɗufla amai arbani hlai n’amai, a nafu gaini labar na pɗem n’a vada kai mini, buri a muɗaŋ siɗi ɗai na midiɗi yai, sin pinziba na zamai ɗa paŋ, sini pinziba paŋ, sini meme meme paŋ, siɗi ɗai paŋ lai.

⁷A muɗa gaini wulani amai maini nɵa: Ki sini hormo wiini Alaw, ki sini kol lai, buri ler na wiiɗi sariya na wiini a cosi li. Ki hûrgi azumai wuzani ni n’a za hlai n’amai gaiɗi yai, gaini yem-ra-n’abai gaini hlai zi liiwi yem lai.

⁸Asakal par ɗif zi ɵeŋ na war fuŋ-n’Alaw na zamai a halasi, a n’ag'aŋ sulu a muɗa: Te kɵa li azumai, te kɵa li azumai, Babilon n’amaai, na te siɗi vin zi hiy na wiini maɵaraɗi aŋ ci wiiɗi ɗai paŋ.

⁹Ɗif zi ɵeŋ na war fuŋ-n’Alaw zamai n’ag'aŋ hu a halasi pra, a muɗa gaini wulani amai maini nɵa: Na ɓa ɗif a hurga li azumai wuzani wala n’ezini puɗu hanɗa, gaini wala zi rgi n’a sɗa maini ɵa lai ɗa, na ɓa e tiki wala zi siŋki li amai midini arni zaw, sini graŋni ɗi ɗa,

¹⁰ni lai aga a ca vin zi hiy na wiini Alaw, n’a maŋ warɗi kup zi hiy na wiini, na gaini jilni gaini yem kai ɗa, aga a sɗa gir arni afu gaini sufre wuzaɗi ɗai zi ɵeŋ na war fuŋ-n’Alaw na sɗik, wuzani Ahiɗ-adumi lai.

¹¹Agiyiŋ na wiini girɗi a ɗuguda amai haa hlai n’a vada kai, n’a vada kai. Nagai n’e hûrgi zumai wuzani wala n’ezini puɗu gaini wala zi rgi n’a sɗa maini ɵa ɗa, gaini asiya ɗi paŋ na wala zi siŋki na wiini yikini aŋ sini ɗa, si n’amla na wiiɗi aŋ kai zaŋ, girvudi gaini duvuk paŋ.

¹²Hanɗa a wala n’a siŋka siiki na wiiɗi na sɗik, n’e yimi seŋ zi gadai na wiini Alaw gaini yimi na war Yesu Kristu edi ɗa.

¹³Mu ɵina wule amai war fuŋ-n’Alaw par n’a muɗa: Ɗo, maini nɵa: ɵeɗ midiɗi nagai n’e mri, n’e mri war Epiɗ-ɗai, tiyana par! Seze a muɗa: A jre, siɗi aga a mula burini sdaɗi, buri ɓa sdaɗi n’e ziŋ ɗa aga a tapa piɗi.

¹⁴Mu tala ɗugul na muɗukwi, midini ɗugul hanɗa, ɗif gai simni dam, a sɗa maini ɗif murɗek nɵa, bogorai zi or gai pi midini duk, maharam na mini a suma gara tini kaai.

¹⁵Ɗif zi ɵeŋ na war fuŋ-n’Alaw zamai a niyasi edi warni tempel par, a ɗuula ni n’a na gaini simni midini ɗugul ɗa, a miɗini: Tika maharamku aŋ haɗa seyem ɗa, hlaini zi hiɗi a cosi li, buri seyem na midini afti a naiya ca.

¹⁶Ni n’a sumna midini ɗugul a yimasi maharamni midini afti vuuwa, seyem zi hiɗi na midini afti paŋ a haɗasi kafa.

¹⁷Ɗif zi ɵeŋ na war fuŋ-n’Alaw zamai a niyasi edi warni tempel na war fuŋ-n’Alaw par, maharam n’a suma gara aŋ tini lai.

¹⁸Ɗif zi ɵeŋ na war fuŋ-n’Alaw na zamai na spak a sa war tini midini afu, a niyasi edi min gûwiŋ zi ɓaka par, a ɗuula ni na gaini maharam n’a suma gara tini ɗa, a muɗa: Tika mahramku n’a suma gara ɗa, ɗuklasi sumulni luwuŋ zi vin na midini afti ɗa, bui ɓa alini luwuŋ zi vin ɗa a naiya ca.

¹⁹Ɗif zi ɵeŋ na war fuŋ-n’Alaw ɗa a yimasi maharamni azumai midini afti vuuwa, a tapasi alini luwuŋ zi vin na midini afti ɗa paŋ, a mulaŋ war hlai n’e siriŋ kapai e sipiɗiŋ warni, na wiini hiy na wiini Alaw.

²⁰Hlai zi kirpi alini luwuŋ zi vin aŋ sipiɗiŋ warni ɗa, a na anene duɓani fuŋ n’abai ɗa par, fel a niyaɗi edi warni hlai hanɗa par, hulumni fel hanɗa, haa amai mini plis ta, mogoni ɗa, kilomotir miya hu.