Read Mousgoum Siŋki n’edi 16 Bible Online

Siŋki n’edi 16 - Mousgoum bible

Siŋki n’edi 16

¹Mu ɵina wule n’abai a wasi warni tempel par a muɗa siɗi ɗai zi ɵeŋ na war fuŋ-n’Alaw na muguzak maini nɵa: Hili, ki mi kup na muguzak na wiini hiy na wiini Alaw edi midini afti.

²Ɗif zi ɵeŋ na war fuŋ n’Alaw n’avut a hala, a ma hiy n’aŋ war kup ɗa zumai midini afti, ɓilik na meefeŋ, n’a fuɗa gara a ɵa ɗai na wala zi siŋki na wiini wala-n’ezini puɗu aŋ siɗi, n’e hûrgi azumai wuzani wala zi rgi n’a sɗa maini ɵa ɗa.

³N'ag'aŋ sulu a ma na wiini agoɗom war yem-ra-n’abai. Yem-ra-n’abai a bunda aŋ fel maini fel na wiini ɗif zi mri nɵa. Wazagai na karni n’agoɗom warni yem-ra-n’abai ɗa paŋ a mra edi.

⁴N'ag'aŋ hu a ma na wiini war ra gaini hlai zi liiwi yem, a bunda aŋ fel.

⁵Mu tala ɗif zi ɵeŋ na war fuŋ-n’Alaw na sdani yem aŋ tini ɗa a na muɗa maini nɵa: tuku ku jre, tuku na ku na, na ku naka, tuku na Sɗik, buri ɓa a tala arku pɗem aŋ za maini nɵa.

⁶Buri nagai e mi feldi na sɗik gaiɗi ɗai na min Alaw edi, tiyana ku siɗi fel aŋ ci lai, a za sal gai futini.

⁷Mu ɵina wule ktai a wasi edi mini gûwiŋ zi ɓaka par, a muɗa maini nɵa: A futini, Epiɗ-ɗai Alaw, Alaw zi spak paŋ, sariya na wiiku ɗa a jre, a ɗikat lai.

⁸Ɗif zi ɵeŋ na war fuŋ n’Alaw n’ag'aŋ puɗu a ma hiy na war kup na wiini midiɗi futi, spak a sa siɗi buri te yiɗi ɗai gaini afu.

⁹Yuvuguni afu n’abai a fuɗa ɗai edi. Ɗai e tirki yikini Alaw na spakni a na midini gir hanɗa, amma e wiyisi hiiniɗi aŋ sini kol wiini Alaw kai.

¹⁰N'ag'aŋ ɵim a ma na wiini midiɗi Paramai zi pai na wiini wala-n’e zini puɗu, gegeŋ a aftiɗi paini paŋ, ɗai e limi alesɗi burini gir.

¹¹E tirki Alaw n’amai, burini girɗi gaini ɓilikɗi, amma e hini sdaɗi na meefeŋ ɗa edi kai.

¹²N'ag'aŋ ɵaara ɗa a ma hiy na war kup na wiini midini ra n’abai na Öfrata. Yemni a hiɗika amai, buri a hina afti wiiɗi paakai n’e hilisi piɗi futi na dauwai-par par.

¹³Mu tala seze na haharai hu, n’a sɗa maini muguze ɵa a niyasi edi war min wala-meefeŋ-n’abai n’abai ɗa par, min wala-n’ezini puɗu par, min ɗif na min Alaw na jre-kai ɗa par lai.

¹⁴Hanɗa a seze na wiini mat n’a za wazagai zi siŋki, n’a hala piɗi paakai na midini afti paŋ lai, kapai a tipiɗisi burini gaw na war mefeŋ n’abai na wiini Alaw zi spak paŋ ɗa.

¹⁵Tala, mu na halaɗi maini ɗif zi mihill nɵa. Sleɗ midini ni n’a sumna karni, n’a giɗima sapani lai, kapai aga a hala ganala kai, ɗif a tala siyern kaalai.

¹⁶A tipiɗisi war hlai n’e yikiŋ war seŋɗi Hebrekai ɓa Harmagedon.

¹⁷Ɗif zi ɵeŋ na war fuŋ n’Alaw n’ag'aŋ muguzak a ma hiy na war kup na wiini arni smer; wule n’abai a wasi edi warni tempel ɗa par, siɗi Paramai zi pai ɗa par, a muɗa, paŋ a va li.

¹⁸Wilɗi a wulɗa, wule a wa, alawai zi ɓarai a ɓara, ziriyini afti n’abai a za lai, hlai na ɗai e ɗa midiɗi yai par, ziriyini afti na mai hanɗa ɵa a za ka duk kai.

¹⁹Fuŋ n’abai a ɓurwa arni hu, fuŋ n’abakai na wiiɗi pinzibaɗi ɗai a ho azumai. Alaw midini a kɵa gaiɗi Babilon n’amai, buri a siɗi kup zi vin na wiini hiyni n’abai ɗa.

²⁰Wudi paŋ a pra edi, huwaŋai paŋ a vada edi lai.

²¹Wutiŋ n’abakai, a yakasi amai par midiɗi ɗai, ktai gumani a za kilo doogo doogo hu pi puɗu, ɗai tirki Alaw buri gir na wiini wutiŋ hanɗa, buri ɓa a gir n’abai gara.