Read Mousgoum Siŋki n’edi 17 Bible Online

Siŋki n’edi 17 - Mousgoum bible

Siŋki n’edi 17

¹Nɵa ktai arbaɗi ɗai zi ɵeŋ na war fuŋ n’Alaw na muguzak n gaini kup na muguzak tiɗi ɗa, a halasi a muɗa seŋ gaya, a muɗaŋa maini nɵa: Halasi, mu suŋkutuku sariya na wiiɗi muni zi zawar n’amai na te sumna midini yem n’abakai.

²Paakai na midini afti e zi zawar ɗa gaiɗi, ɗai na midini afti e ciini gaiɗi vin na wiini zawarɗi.

³War seze, a kaŋa edi war basga na kaɗataŋ. Mu tiliti muni gai simni midini wala n’ezini puɗu na mekele hirra. Wala hanɗa sini paŋ a yiki zi tirki na sin Alaw, humokn muguzak, miyokni doogo lai.

⁴Muni hanɗa sapa na siɗi a na purpre, gaini na mekele hirra. Te gana siɗi gaini or, gaini ali-fuŋ na juva gara, gaini aidaw lai. Kup zi or tiɗi ɗaw gaini vi gaini sda na haharai, gaini wazagai zi selte na wiini maɵaraɗi lai.

⁵Midini arɗi, yiki ktai gai ɗû ɗo, a wala zi ŋoyai, ɓa Babilon n’amai, emiɗi falakai zi zawar, gaini sda na haharai na midini afti.

⁶Mu tiliti muni hanɗa gaini ciini gaini fel na wiiɗi na sɗik, gaini na wiiɗi zaidakaini Yesu, won hlai na mu tiliti, mu bunda hiyak gara.

⁷Ɗif zi ɵeŋ na war fuŋ n’Alaw a muɗaŋa: Ku bunda hiyak ɵa buri ma ɗa? Ta aga mu muɗuku midini wala zi ŋoyai na wiiɗi muni hanɗa, gaini na wiini wala n’ezini puɗu n’a na libiti, na humokni muguzak, miyokni ɗa.

⁸Wala n’ezini puɗu na ku talaŋ hanɗa, a naka, tiyana aŋ kir kai, aga a niyasi amai war huduk na wuŋŋa par, hala sin bi n’edi, ɗai na midini afti na nagai na yikiɗi aŋ gai ɗû war maktuɓ zi suŋfa war piɗi yai zi tiki par kai ɗa, aga e bindi hiyak won hlai n’aga e tili wala n’ezini puɗu hanɗa, buri ɓa a naka, tiyana aŋ kir kai, amma aga a wayasi pra ɗa.

⁹Hiini zi yel ɗa a siŋka edi war hanɗa. Humok na muguzak hanɗa a huwuŋ na muguzak na muni te sumna midini, e ɗi paakai muguzak lai.

¹⁰Na ɵim e yiki azumai ya, n’ag'aŋ ɵaara ɗa a na ŋa, n’ag'aŋ muguzak ɗa a halasi kai hai. Won hlai n’a halasili ɗa, aga a sumna buri hlai n’agwi kadai.

¹¹Wala n’ezini puɗu n’a naka, na tiyana aŋ kir kai na ɗa, ni gaini midini dama a pai n’ag'aŋ mitwis, a ktai arbaɗi na muguzak ɗa lai, a hala na ɗa sini bi n’edi sek lai.

¹²Miyok na doogo na ku talaŋ haɗa, e ɗi paakai doogo, n’e n’e nivi afti zi pai kai hai, amma aga e nivi spak aŋ ŋi maiɗi paakai nɵa, burini ler ktai kadai, gaini wala n’ezini puɗu ɗa.

¹³Hiini na wiiɗi ɗa a ni ktai, e firyi e si spakɗi gaini gdaŋɗi wiini wala n’ezini puɗu ɗa.

¹⁴Aga a hitima Ahiɗi adumi, Ahiɗi-adumi aga a rɗa amai midiɗi, buri ni a Epiɗ-ɗai na wiiɗi Epiɗ-ɗai paŋ, a pai na wiiɗi paakai paŋ lai. Nagai n’e yikisi, zi viri n’edi, na jrekai lai ɗa aga e rɗi amai gaini lai.

¹⁵A muɗaŋa: Yem na ku talaŋ, na muni zi zawar te sumna midini ɗa, e ɗi ɗai, e ɗi firiɗi ɗai, gaini pinziba na zamai zamai, gaini meme zamai zamai lai.

¹⁶Miyok na doogo na ku talaŋ, gaini wala n’ezini puɗu ɗa, aga a bla gaw siɗi muni zizawar ɗa, aga a vurma wazagaiɗi tiɗi, a hiniti ganala sul, a luma neŋɗi ɗa, aga a yiti edi gaini afu lai.

¹⁷Buri Alaw a wa war agulɗi buri e vi amai ɗa a hiini na wiini, e zi gaini hiini ni ktai, aŋ siti paiɗi wiini wala n’ezini puɗu lai, haa miɗi na wiini Alaw a va amai.

¹⁸Muni na ku tiliti hanɗa te fuŋ n’abai, na paiɗi a ŋa midiɗi paakai na midini afti paŋ.