Read Mousgoum Siŋki n’edi 20 Bible Online

Siŋki n’edi 20 - Mousgoum bible

Siŋki n’edi 20

¹Asakal hanɗa, mu tala ɗif zi ɵeŋ na war fuŋ n’Alaw ktai, a niyasi azumai amai war fuŋ n’Alaw par, kle na wiini huduk na wuŋŋa aŋ war tini, gaini jaɓ n’abakai lai.

²A yima wala meefeŋ n’abai, wala meefeŋ na war pi zi tiki par, hanɗa a mat zaw Satan, a rgaŋ buri buza ktai.

³A ɵaŋ war huduk na wuŋŋa, a mini, a ɵa mini n’amai par gaini kawai, kapai a wûliɗi pinziba na zamai ɗa edi kai haa buza na dubu a vada li haw, askal hanɗa, aga e ɵiŋsi edi buri hlai n’agwi.

⁴Mu tala Paramai zi pai viya, nagai n’e simni midini ɗa, spak a sa siɗi bui e ɗûkliti sariya, mu tala suŋfaɗi nagai n’e ɗukliɗi homokɗi edi gaini beŋel, buri zaida n’e ziŋ midini Yesu gaini seŋni Alaw lai, gaiɗi nagai n’e hûrgi zumai wuzani wala n’ezini puɗu gaini wala zi rgi n’a sɗa maini ɵa ɗa kai ɗa, gaiɗi nagai na wala zi siŋki na wiini wala n’ezini puɗu a tika midini arɗi kaalai, midini tiɗi kaalai. Nagai e bindi karɗi pra, e ŋi gaini Kristu haa buza dubu ɗaw.

⁵Zi mri na zamai ɗ e bindi karɗi kai haa buza na dubu a vada. Hanɗa a ɵiyi n’amai n’avut.

⁶Nagai n’aga e ɵiyi amai war ɵiyi n’amai n’avut hanɗa, ɵeɗ midiɗi, e ɗ sɗik lai. Mri n’ag'aŋ sulu spakni midiɗi nagai hanɗa kai, aga e zi aŋ paakai zi ɓaka na wiini Alaw gaini Kristu, aga e ŋi gaini war buza na dubu ɗaw hanɗa.

⁷Won hlai na buza na dubu ɗaw a vada li, Satan aga a plasi edi warɗi daŋgaini par,

⁸aga a hala edi aŋ wûliɗi pinzibaɗi ɗai na war koŋɗi yai na puɗu paŋ edi, Gog gaini Magog, kapai a tipiɗi burini gaw, e kiɗi e pɵi kai maini kaikai n’agoɗom war yem-ra n’abai nɵa.

⁹E niyisi amai midini afti, e tiki kaŋ na wiiɗi sɗik gaini fuŋ n’abai na ɗai e diriŋ gara, amma afu a kɵasi midiɗi amai war fuŋ n’Alaw par, a yiɗi edi.

¹⁰Mat n’a wûliɗi edi ɗa e ɵiŋkiŋ warɗi avai z'afu gaini sufre war hlai na wala n’ezini puɗu gaini ɗif na min Alaw na jre kai e ɗi warni ɗa, aga e siɗi gir girvudi gaini duvuk paŋ haa hlai n’a vada kai n’a vada kai.

¹¹Mu tiliti Paramai zi pai n’amai na muɗukwi gaini ni n’a sumna midiɗi lai. Afti gaini hlai n’amai a pra edi wuzani arni par, balamni a nava kir kai.

¹²Nɵa mu tiliɗi zi mri n’abakai gaiɗi n’agogoi gaini ɗiyi ca ca wuzaɗi Paramai zi pai, maktuɓ viya a mla edi, maktuɓ zamai ktai a mala edi lai, hanɗa a maktuɓ zi suŋfa, ɗai zi mri ɗa, e niviti sariya pin wala n’aŋ gaini ɗû midiɗi war maktuɓ ɗa, pin sdaɗi lai.

¹³Yem-ra n’abai a siɗisi zi mri n’e ɗa warni ɗa amai, mri gaini hlai zi simni na wiiɗi ɗai zi mri a siɗisi zi mri n’e ɗa warni amai lai. Ɗif paŋ a niviti sariya pin sdani sdani.

¹⁴Mri gaini hlai zi simni na wiiɗi ɗai zi mri a poko warɗi avai z'afu. Avai z'afu hanɗa a mri n’ag'aŋ sulu.

¹⁵Asiya ɗi paŋ n’a yikini aŋ gai ɗû war maktuɓ zi suŋfa hanɗa kai ɗa, e ɵiŋkiŋ warɗi avai z'afu.