Read Mousgoum Siŋki n’edi 21 Bible Online

Siŋki n’edi 21 - Mousgoum bible

Siŋki n’edi 21

¹Nɵa mu tala hlai n’amai na hehe gaini afti na hehe lai, buri ɓa hlai n’amai n’avut gaini afti n’avut ɗa a vada edi vat, yem-ra n’abai ɗa aŋ kir kaalai.

²Mu tala fuŋ n’abai na sɗik, Yeruzalem na hahai, te niyasi azumai amai war fuŋ n’Alaw par, sini Alaw par, gaini zizini maiɗi muni na te gana siɗi burini mofoɗi n’aga a tikiti nɵa.

³Mu ɵina wule a halasi edi warɗi Paramai zi pai par n’a muɗa: Hlai zi simni na wiini Alaw a na arbaɗi ɗai, aga a za hlai zi simni na wiini arbaɗi, nagai aga e bindi aŋ ɗaini, Ni dama n’Alaw n’a na gaiɗi aga a bunda aŋ Alaw na wiiɗi.

⁴Aga a ɵata tuwi n’arɗi paŋ edi, mri aga a za kir kai, tuwi gaini ɗuwal gaini gir lai aga a za kir kaalai, buri ɓa wazagai n’avut ɗa a vada vat.

⁵Ni n’a sumna midiɗi Paramai zi pai n’a muɗa: wazagai paŋ mu bundaŋ hahakai; a muɗa pra: ɗo burini seŋ hanɗa a futini, a jre lai.

⁶A muɗaŋa: Tiyana ɗa, paŋ a za li, Ta mu Alfa gaini Omega, pi zi tiki gaini dibini lai, ni na sai te na zaŋ ɗa, aga mu sini yem war hlai zi liiwi yem zi suŋfa par, gaini vrak kai.

⁷Hanɗa a bulum na wiini ni n’a rɗa li amai, Ta aga mu za aŋ Alaw na wiini, ni aga a za aŋ ahiya lai.

⁸Amma buriɗi na muhunakai, zi yimi kai, na haharai, zi ɵiɓi belek, na maɵarakai, zi zi hiila, zi hûrgi azumai wuzani alawai na kadai, z'alasakai paŋ, bri na wiiɗi a na war avai z'afu, gaini zi sufre, na te ya gara, hanɗa, a mri n’ag'aŋ sulu.

⁹Asakal par, ktai arbaɗi ɗai zi ɵeŋ na war fuŋ n’Alaw na muguzak, na gaini kup na muguzak, na gaini vi gaini gir na muguzak n’asakal ɗa war tini a halasi a muɗa gaya, a muɗaŋa: Halasi aga mu siŋkutuku, ahiyogoi n’e diri e sitini wiini mofoɗi ɗa, munini ahiɗi-adumi.

¹⁰War seze a kaŋa amai midiɗi huwuŋ n’amaai n’amai mugwi. A siŋkaŋa fuŋ n’abai na sɗik, Yeruzalem na te niyasi azumai amai war fuŋ n’Alaw par.

¹¹Abai na wiini Alaw te wa siɗi, te ŋala maini ahi-fuŋ n’a zuva gara, nɵa, maini ahi-fuŋ yaspis na juva gara, maini kristal.

¹²T'aŋ gaiɗi ɵagai n’amai mugwi siɗi, miɗi magalaɗi doogo pi sulu, mini magala paŋ, ɗif zi ɵeŋ na war fuŋ n’Alaw mini zaw zaw, yiki gaini ɗû amai mini ɗo ɗo, a yikiɗi pinzibaɗi Izrayel na doogo pi sulu.

¹³Piɗi futi na dawai par, min magala hu, war gal n’azumai sek, min magala hu, war gal n’amai sek min magala hu, piɗi futi na koskoi sek min magala hu lai.

¹⁴Zlagai na wiini fuŋ n’abai ɗa te rga midini ali-fuŋ doogo pi sulu, midini ali-fuŋ hanɗa, yikiɗi apostelai na doogo pi sulu gaini na wiini Ahiɗi-adumi aŋ gai ɗû ɗo ɗo lai.

¹⁵Ni n’a muɗa seŋ gaya ɗa, amaraŋai zi kiti mogoni hlai tini ɗaw, a vayai zi or, n’a kata mogoni gaini brukni fuŋ n’abai gaini min magalani gaini ɵagani lai.

¹⁶Fuŋ n’abai hanɗa, mogoni gaini brukni kal kal, a kata mogoni gaini brukni fuŋ n’abai ɗa gaini vayai, mogoni lai, brukni lai, mogoni n’amai sek ɗa lai kal kal.

¹⁷A kata mogoɗi ɵagai ɗa, kil miya gai doogo doogo puɗu pi puɗu, maini na ɗai e ɗa ŋiŋ ɗa ɵa.

¹⁸Zlagai ɗa te rga gaini yaspis, fuŋ n’abai ɗa gaini or na hilu lai, te sɗa maini kristal na hilu nɵa.

¹⁹Eziɗi ɵagai gaini fuŋ n’abai ɗa, e ɗuhiŋ gaini ali-fuŋ na juvai na kiini kiini. Ahi-fuŋ n’avut ɗa a yaspis, n’ag'aŋ sulu ɗa a safir, n’ag'aŋ hu ɗa a kalseduwane, n’ag'aŋ puɗu ɗa a emerode,

²⁰n’ag'aŋ ɵim ɗa a sardonikse, n’ag'aŋ ɵaara ɗa a sarduwone, n’ag'aŋ muguzak ɗa, a krizolit, n’ag'aŋ mitwis ɗa a beril, n’ag'aŋ ɵeeŋe ɗa a topaz, n’ag'aŋ doogo ɗa a krizopraz, n’ag'aŋ doogo pi ktai ɗa a hiyaseŋte, n’ag'aŋ doogo pi sulu ɗa a ametiste lai.

²¹Mini magala na doogo pi sulu ɗa a aidaw doogo pi sulu lai, min magala paŋ ɗa gaiɗi aiduwiini aiduwiini, futi n’amaai na war fuŋ n’abai ɗa, te zizina gaini or na hilu, maini kristal ɵa.

²²Mu sɗa tempel warni kai, buri Epiɗ-ɗai Alaw, Alaw zi spak paŋ a tempel na warni ɗa, Ahiɗi-adumi ɗa nɵa lai.

²³Fuŋ n’abai hanɗa, jaani buri gaglaini futi kai, jaani piɗi futi kaalai, buri abai na wiini Alaw te na za gaglai warni, lampa na warni ɗa a Ahiɗi-adumi ɗa lai.

²⁴Pinzibaɗi ɗai paŋ ga e piyi pi gaglai na wiini, paakai na midini afti lai aga e kitisi abai na wiiɗi warni lai.

²⁵Min magalani, girvudi ɗa aga a amai kai zaŋ, -paŋ ktai, woni ɗa, duvuk aga a za kaalai.

²⁶Pinzibaɗi ɗai na zamai ɗa aga e kisi abai gaini kol aha warni.

²⁷Wala na hi-hir aga a niya aha warni duk kai, ɗif n’za wazagai na haharai zaw, z'eles kaalai, amma sai e ɗi nagai na ykiɗi aŋ gai ɗû war maktuɓ na wiiɗi Ahiɗi-adumi ɗa kiiɗi.