Read Mousgoum Siŋki n’edi 22 Bible Online

Siŋki n’edi 22 - Mousgoum bible

Siŋki n’edi 22

¹Asakal par, a siŋkaŋa ra na wiini yem zi suŋfa, ziŋya maini kristal nɵa, a niyasi edi siɗi Paramai zi pai na wiini Alaw gaini Ahiɗi-adumi ɗa par.

²Arbaɗi futi n’amaai, na war fuŋ n’abai ɗa, wulani ra na sulu paŋ lai, luwuŋ zi suŋfa a na, a wa alini tile tile paŋ, war buza ɗa a wa azi doogo pi sulu. Slimani luwuŋ hanɗa a kurgum zi zûûli na wiiɗi pinziba na zamai.

³Tusa aga a za kir kai, Paramai zi pai na wiini Alaw gaini Ahiɗi-adumi aga te tika war fuŋ n’abai hanɗa. Ɗaini zi sda ɗa aga e siiwi tini;

⁴nagai aga e tili arni, yikini aga a ɗo amai midini arɗi lai.

⁵Duvuk aga a za kir kai, aga e piyi gaglai na wiini lampa kai, na wiiɗi futi kaalai, buri ɓa Epiɗ-ɗai Alaw aga a za gaglaini midiɗi, nagai aga e ŋi haa hlai n’a vada kai, n’a vada kai.

⁶A muɗaŋa: Seŋ hanɗa a futini, a jre lai, Epiɗ-ɗai Alaw na wiini seze na wiiɗi ɗai na min Alaw, a ɵinasi ɗif zi ɵeŋ na wiini na war fuŋ-n’Alaw par, buri a siŋkiɗi wiiɗi ɗaini zi sda, midini wazagai n’aga a za gobi.

⁷Tala, mu na halaɗi gobi. Sleɗ midini ni n’a yima seŋ n’aŋ war seŋ na wuze na war maktuɓ hanɗa.

⁸Hanɗa mu ta, Yohanɗa, na mu ɵina wazagai hanɗa, na mu talaŋ lai. Won hlai na mu ɵinaŋ, na mu talaŋ lai ɗa, mu bla sa azumai wuzani ɗif zi ɵeŋ na war fuŋ-n’Alaw, n’a na siŋkaŋa wazagai hanɗa, aŋ hurga azumai wuzani.

⁹Amma a muɗaŋa: Ku za hangal, ku za hanɗa kai, ta mu maiku zi sda, mu maiɗi tawalakaiku, na ɗai na min Alaw lai, mu maiɗi nagai n’e yimi seŋ n’aŋ war maktuɓ hanɗa lai, ku hurga azumai ɗa wuzani Alaw.

¹⁰Asakal par a muɗaŋa: Ku ŋoya seŋ n’aŋ war seŋ na wuze n’aŋ war maktuɓ hanɗa kai, buri ɓa hlai a ŋasi gobi.

¹¹Hina ni na jre-ɗikat kai, aŋ wiini war jre-ɗkat kai na wiini dam, na hi-hir ɗa, hinaŋ a za hi-hirni wiini, na jre-ɗikat, hinaŋ a za jre-ɗikatni wiini, na sɗik ɗa, hinaŋ a za edi sɗik a suwa pra.

¹²Tala, mu na halaɗi gobi, vrak na wiya ɗa aŋ ta, buri mu sa sini asiya asiya paŋ, pin sdani sdani.

¹³Alfa lai, Omega lai, n’avut gaini n’asakal, pi zi tiki gaini vidi lai ɗa mu ta.

¹⁴Sleɗ midiɗi nagai n’e mi sapaɗi edi, kapai e siɗi aŋ gi sin luwuŋ zi suŋfa, aŋ niyi aha warni fuŋ n’abai min magala par lai.

¹⁵Amma hirgakai gaiɗi zi zi hiila, gaiɗi na maɵarakai gaiɗi n’e ɵiɓi belek gaiɗi n’e hûrgi azumai wuzani alawai na jrekai kai, gaini asiya asiya paŋ n’a dara eles n’a za eles lai ɗa e hini anene.

¹⁶Ta Yesu, mu ɵinaɗi ɗif zi ɵeŋa na war fuŋ-n’Alaw ya, kapai a miɗiki zaida na midini tipi hanɗa. Ta mu sirdai gaini pinzibani David, maaɵiki zi ŋili na dawai-par.

¹⁷Seze gaiɗi muni na te zizina siɗi burini tiki ɗa, e miɗi maini nɵa: Halasi! Ni n’a na ɵina ɗa, a muɗa lai ɓa: Halasi! Ni na sai te zaŋ ɗa, a pɗem ɓa a halasi. Ni n’a dara, a ca yem zi suŋfa ɗa, a caŋ gaini vrak kai.

¹⁸Ta mu muɗa sin asiya asiya paŋ n’a na ɵina seŋ na war seŋ na wuze na war maktuɓ hanɗa na muɗa ɓa: Na ɓa ɗif a tikasi wala zamai li min seŋ hanɗa, Alaw aga a tikini gir n’e miɗi gaini war maktuɓ hanɗa midini pra.

¹⁹Na ɓa ɗif a tika li seŋ na war maktuɓ na wiini seŋ na wuze hanɗa edi li ɗa, Alaw aga a tika bri na wiini na war luwuŋ zi suŋfa gaini fuŋ n’abai na sɗik, n’e miɗi midini war maktuɓ hanɗa.

²⁰Ni n’a za zaida midini wazagai hanɗa, a muɗa, nkam, mu na halaɗi gobi. Amen, halasi, Epiɗ-ɗai Yesu.

²¹Yum na wiini Epiɗ-ɗaimu Yesu a sumna gaiki paŋ.