Read Mousgoum Siŋki n’edi 6 Bible Online

Siŋki n’edi 6 - Mousgoum bible

Siŋki n’edi 6

¹Won hlai n’Ahiɗi-adumi a mala wala zi diɓiki ktai arbani na muguzak edi ɗa, mu nafu aŋ talaŋ, mu ɵina ktai arbani wazagai zi rgi na karni na puɗu a muɗa gaini wule na wiini alaw zi ɓarai: Halasi.

²Nɵa, mu tala tili pilis na muɗukwi, ni n’a sumna midini gaini taŋ tini ɗaw, bogorai te sa sini, a hala sek ɗa aŋ gaini rɗi amai, aŋ rɗa amai pra.

³Hlai n’a haza tampoŋ n’ag'aŋ sulu edi ɗa, mu ɵina wala zi rgi na karni n’ag'aŋ sulu a muɗa: Halasi.

⁴Mu tala plis zamai na mekele maini afu nɵa, a niyasi edi, ni n’a sumna midini ɗa spak a sa sini buri a tika ɵeɗ edi midini afti par, kapai ɗai e fiɗi marɗi edi, kaɵkar n’abai a sa war tini.

⁵Hlai n’a haza tampoŋ n’ag'aŋ hu edi ɗa, mu ɵina wala zi rgi na karni n’ag'aŋ hu a muɗa: Halasi. Nɵa mu tala, plis ktai murɗek, a niyasi edi. Ni n’a sumna midini ɗa, wala n’e tiki kilo gaini a nafu tini.

⁶Mu ɵina wala ktai maini wule nɵa, a niyasi edi arbani wazagai zi rgi na karni na puɗu par, a muɗa maini nɵa: Vrakni sda na war yivai dam ɗa a wura algama kilo ɗaw, a wura orge kilo hu lai. Amma emel gaini vin ɗa, ku za wala na meefeŋ sini kai.

⁷Hlai n’a haza tampoŋ n’ag'aŋ puɗu edi, mu ɵina wulani wala zi rgi n’ag'aŋ puɗu a muɗa: Halasi.

⁸Mu tala, plis na bogoro maini ɵimani luwŋ na hirnaŋ nɵa, ni n’a sumna midini yikini ɓa Mri, hlai zi simni na wiini mri pini su lai. Spak a sasi sini buri a vada gal n’ag'aŋ puɗu na wiini afti edi, a sa sini buri a fiɗiɗi ɗai edi gaini kaɵkar, gaiɗi wiyamai, gaini vlak gaini wazagai n’edi buza na midin afti lai.

⁹Hlai n’a haza tampoŋ n’ag'aŋ ɵim edi ɗa, mu talasuŋfaɗi nagai n’e fiɗiɗi edi burini seŋ n’Alaw gaini zaida n’e ziŋ ɗa lai ɗa, azumai pin gûwiŋ zi ɓaka.

¹⁰E ɗûûli e miɗi: Haa kaswata ɗa, Epin-gezayi, na sɗik, na jre, aga ku yima azuku aŋ ziti sariya, aŋ zilba felyi tiɗi ɗai na midini afti ɗa?

¹¹Ɗif paŋ aŋ gaiɗi rob na na muɗukwi yaw yaw, miɗi a muɗa siɗi buri e simni gaini hangalɗi, buri hlai n’agwi, haa piɵiɗi marɗi zi sda gaiɗi tawalakaiɗi n’aga e fiɗiɗi edi maiɗi nagai nɵa a va amai.

¹²Hlai n’a haza tampoŋ n’ag'aŋ ɵaara edi ɗa, mu tala wala ktai maini nɵa: Ziriyini afti n’abai a za, futi te bunda murɗiki maini sapa zi tuwi na murɗek nɵa, tile a bunda maini fel nɵa,

¹³meeɵek n’arbani hlai n’amai a yakasi azumai midini afti maini alini luwuŋ Fige n’a yaka won hlai na smer na gdaŋ a vuvuwa nɵa.

¹⁴Hlai n’amai a faɗa amai agwiya agwiya maiɗi genai n’e fiɗiti amai nɵa. Huwaŋai gaini wudi paŋ aga a jogo edi war balamni par.

¹⁵Paakai na midini afti gaiɗi n’abakai zi ɵi wuze, gaiɗi abakai na wiiɗi askarai gaiɗi ɗai zi farai gaiɗi zi spak, ɗai kafa, bagakai gaiɗi kempekai lai e hili e ŋûyi siɗi warni waŋ na sini huwaŋai, amai arbani ali-fuŋ lai.

¹⁶E miɗi sin huwaŋai gaini ali-fuŋ maini nɵa: Yikisi azumai midiyi, ŋuyiyi cok, wuzani arni ni n’a sumna midiɗi Paramai zi pai, gaini hiy na wiini Ahiɗi-adumi ɗa lai.

¹⁷Buri ɓa mefeŋ n’abai na wiini hiy na wiiɗi a cosi li, n’a kiɗa a ɗiya mini ɗa asiya ɗa?