Read Mousgoum Siŋki n’edi 8 Bible Online

Siŋki n’edi 8 - Mousgoum bible

Siŋki n’edi 8

¹Won hlai n’Ahiɗi adumi a haza tampoŋ n’ag'aŋ muguzak edi ɗa, hlai n’amai ɗa a bunda liyik haa gobi galni ler ɗaw ɗi.

²Mu tiliɗi ɗai zi ɵeŋ na war fuŋ-n’Alaw muguzak n’e ɗiyi wuzani Alaw, e siɗi faana tiɗi muguzak.

³Ɗif zi ɵeŋ zamai ktai a halasi, a ɗiya midini gûwiŋ zi ɓaka, wala zi yi wazagai zi ɗûgûdi zi lûgûzi zi or tini ɗaw. E sini wazagai zi ɗûgûdi zi lûgûzi viya kapai a tapaŋ gaini siiwa na wiiɗi na sɗik paŋ midini gûwiŋ zi ɓaka zi or n’a na wuzaɗi paraai zi pai ɗa.

⁴Agiyiŋ na wiini wazagai zi ɗûgûdi zi lûgûzi gaini siiwa na wiiɗi na sɗik a hala amai wuzani Alaw, war tini ɗif zi ɵeŋ na war fuŋ-n’Alaw par.

⁵Ɗif zi ɵeŋ na war fuŋ-n’Alaw a tikasi wala n’e yi wazagai zi ɗûgûdi zi luguguzi gaini ɗa, a vaŋ gaini afu na war gûwiŋ zi ɓaka par, a ɵiŋkaŋ azumai midini afti. Alaw zi ɓarai a ɓara, wule a wa, wilɗi a wulɗa, afti a jiriya lai.

⁶Nɵa ɗai zi ɵeŋ na war fuŋ-n’Alaw na muguzak, na gaini faana na muguzak tiɗi, e zizini siɗi aŋ biyiŋ.

⁷Ɗif z ɵeŋ n’avut a biyiti na wiini. Wutiŋ gaini afu na gani ɵihiɗi gaini fel a yakasi azumai midini afti, gal n’ag'aŋ hu na wiini afti a ya edi, gal n’ag'aŋ hu na wiini luwoŋai a ya edi lai.

⁸Ɗif zi ɵeŋ na war fuŋ-n’Alaw n’ag'aŋ sulu a biyiti fanai na wiini. Huwuŋi ktai n’amai, n’afu a na yiti te kɵasi azumai arni yem-ra n’abai, gal n’ag'aŋ hu na wiini yem-ra-n’abai ɗa a bunda aŋ fel.

⁹Gal n’ag'aŋ hu na wiini wazagai zi rgi n’arni yem, na gaini suŋfa paŋ ɗa a mra edi, gal n’ag'aŋ hu na wiini hulamai a ɓilka edi lai.

¹⁰Ɗif zi ɵeŋ na war fuŋ-n’Alaw n’ag'aŋ hu a biyiti faanai na wiini, maaɵiki n’amai te kɵasi azumai amai war hlai n’amai par, te ya maini kalu z'afu nɵa, te kɵa midini gal n’ag'aŋ hu na wiini ra, gaini hlai zi liiwi yem.

¹¹Yikiɗi maaɵiki hanɗa ɓa Absinte; gal n’ag'aŋ hu na wiini yem a bunda aŋ absinte, ɗai viya e mri burini yem, n’a bunda ɗewek hanɗa.

¹²Ɗif zi ɵeŋ na war fuŋ-n’Alaw n’ag'aŋ puɗu a biyiti faanai na wiini, gal n’ag'aŋ hu na wiiɗi futi a dug, gal n’ag'aŋ hu na wiini tile, gaini na wiini meeɵek nɵa lai. Kapai gal n’ag'aŋ hu a bunda gegeŋ, girvudi ɗa te ɓa gal n’ag'aŋ hu na wiini gaglaiɗi edi, duvuk ɗa nɵa lai.

¹³Mu tala, mu ɵina muka ktai n’a na ɗufla amai arbani hlai n’amai a muɗa gaini wulani amai maini nɵa: Haw gara, haw gara buriɗi ɗai na midiɗi yai, haw gara buriɗi, burini wulani faana na hu n’aga a wa, na ɗai zi ɵeŋ na war fuŋ n’Alaw na hu aga e biyiŋ ɗa.