Read Mousgoum Siŋki n’edi 9 Bible Online

Siŋki n’edi 9 - Mousgoum bible

Siŋki n’edi 9

¹Ɗif zi ɵeŋ na war fuŋ-n’Alaw n’ag'aŋ ɵim a biyiti faanai na wiini, mu tiliti maaɵiki ktai, te kɵasi amai war hlai n’amai par, azumai midini afti. Kle na wiini waŋ na wiini huduk na wuŋŋa a sa war tiɗi.

²Te mala min waŋ na wiini huduk na wuŋŋa edi, agiyiŋ a niyasi edi warni waŋ ɗa par, maini agiyiŋ na wiini waŋ z'afu n’abai nɵa, futi gaini smer a bunda gegeŋ burini agiyiŋ na wiini waŋ hanɗa.

³Ayuwi a niyasi edi warni agiyiŋ hanɗa par, a bara midini afti, spak n’a sa sini ɗa maini spak na wiini hurdi na midini afti nɵa.

⁴Miɗi a muɗa sini buri e zi wala na meefeŋ sin evek na midini afti kai, sin sugoi ktai n’a goɗa kai, sin luwuŋ ktai kaalai, amma sai siɗi ɗai murɗakai na tampoŋ na wiini Alaw a tika midiɗi kai ɗa.

⁵Spak a sa siɗi buri e fiɗiɗi ɗai edi kai, amma buri e ziɗi gir arɗi haa tile ɵim. Gir n’e ziŋɗi wiiɗi ɗai ɗa a na maini gir na hurdi a ziŋni wiini ɗif won hlai n’a bulaŋ li ɗa nɵa.

⁶War mefeŋ ni ɗa, ɗai aga e piyi mri, amma aga e niviŋ kai, warɗi aga a dara mri, amma mri aga a pra edi gaigai siɗi par.

⁷Ayuwi hanɗa a sɗa maini plasai n’e ziziniŋ mini hatam nɵa, amai midini ɗa wala ktai a sɗa maini bogorai zi or nɵa. Arni ɗa, a sɗa maini arɗi ɗai nɵa.

⁸Ayir na midini ɗa maini ayir na wiiɗi falakai nɵa, sisiyeŋ na mini ɗa maini na wiini gurnai nɵa lai.

⁹Wala gai wi sini paɵani maini safaya zi kawai nɵa, suurani baada na gaŋgraŋni ɗa, maini suurani saret zi gaw na plasai n’a gidiyaŋ viya yaw, n’a duɓura min gaw ɗa nɵa.

¹⁰Giɗerni a na maini na wiini hurdi nɵa, mini n’edi n’a bula gaini nɵa lai, spak a sa sin giɗerni buri a za gir wiiɗi ɗai gaini haa tile ɵim.

¹¹Pai na midini hanɗa a ɗif zi ɵeŋ na wiini huduk na wuŋŋa, na yikini ɓa Abaddon war seŋɗi Hebrekai, Apollion war seŋɗi Grekai lai. A dara a muɗa "ɗif zi tuura wala edi"

¹²Gir n’avut ɗa a vuga li, gir zamai sulu a na halasi asakal hanɗa par pra.

¹³Ɗif zi ɵeŋ na war fuŋ-n’Alaw n’ag'aŋ ɵaara a biyiti faanai na wiini, nɵa mu ɵina wule a halasi edi war koŋni gûwiŋ zi ɓaka zi or na puɗu n’a na wuzani Alaw par;

¹⁴Wule a muɗa sini ɗif zi ɵeŋ na war fuŋ-n’Alaw n’ag'aŋ ɵaara, na gaini faana tini maini nɵa: Pliɗisi ɗai zi ɵeŋ na war fuŋ n’Alaw na puɗu, n’e ɗa gai niggi ɵimani yem-ra n’abai Öfrata ɗa amai.

¹⁵Nɵa, ɗai zi ɵeŋ na war fuŋ n’Alaw na puɗu e ɗifu e biyi na ɗa a ler, gaini mefeŋ, gaini tile gaini buza lai. E nivi pli n’edi buri e hili e fiɗi gal n’ag'aŋ hu na wiiɗi ɗai edi.

¹⁶Piɵiɗi askarai zi hatam na gaini plasai e ɗa miliyon miya sulu.

¹⁷Mu tala plasai gaiɗi ɗai na midini ɗa, war wala zi siŋki maini nɵa, safaya na wiiɗi ɗa mekele maini afu nɵa, bogoro maini ali-fuŋ n’a juva gara nɵa, bogoro maini sufre nɵa lai. Homokni plasai ɗa maini humokni gurnai nɵa, afu gaini agiyiŋ gaini sufre lai a niyasi edi war mini par.

¹⁸Galɗi ɗai n’ag'aŋ hu a vada edi mini wazagai zi gir na hu hanɗa: Afu gaini agiyiŋ gaini sufre n’a niyasi edi war min plasai par ɗa.

¹⁹Spak na wiini plasai hanɗa aŋ war mini gaini giɗerni lai, giɗerni a sɗa maini wala-meefeŋ ɵa, giɗerni aŋ gaini humok, a za ir wiiɗi ɗai gaini hanɗa.

²⁰Ɗai n’e hini na gir a niviɗi kai ɗa, e hini sdaɗi na maafanai n’e ziŋ ɗa edi kai, e ɗiyi hûrgi n’azumai wuzani kasalai gaini alawai zi rgi zi or gaini zi arzaŋ zi kiya, z'ali-fuŋ gaini zi luwuŋ lai, n’a kiɗa a tala kai, a ɵina kai, a hala kaalai ɗa kai.

²¹Sdaɗi zi ɵiɓi belek, zi zi wazagai zi hiila gaini maɵaraɗi gaini hillɗi lai, nagai e hiniŋ edi kai.