Read Mousgoum Rut 2 Bible Online

Rut 2 - Mousgoum bible

Rut 2

¹Nuumi ɗa, zigelni mofoɗi ktai a na, a ɗif na gaini spak pini, zi farai lai, a na war piɗi humuni na wiini Elimelek, yikini ɓa Bowas.

²Rut, na Mowab par, te miɗiɗi wiiɗi Nuumi: Saŋa futi aŋ hala edi aŋ vara helek, piɗi nagai n’e ɗa hiɗi ɗa, war vowai na wiini ɗif n’a tala hawŋa li ɗa. Nuumi te miɗiɗi: Hala wiiku, suwula.

³Te hala aŋ vara helek war vowai, piɗi nagai zi hiɗi ɗa par. Kapai a na ɗa a hlai na wiini Bowas, na war piɗi humuni na wiini Elimelek ɗa.

⁴Bowas a halasi a Betlehem par, a ɵiɓiɗi wuti wiiɗi ɗai zi hiɗi maini nɵa: EPIƊ-ƊAI a za gaiki. Nagai e wiyini seŋ: EPIƊ-ƊAI a ɓukuku.

⁵Bowas a zilba ɗif n’a tikaŋ aŋ n’abai midiɗi ɗai zi hiɗi ɗa maini nɵa: Drai hanɗa te munini asiya ɗa?

⁶Ɗif a wiyini seŋ: Drai hanɗa, te muni na te halasi gaiɗi Nuumi midini afti na Mowab par ɗa.

⁷Te zilbaŋa ɓa: Zi barka, ki hiniŋa mu vara helek na yaka ka azumai piki, n’a na arbani na gai rgi su su ɗa kai ɗi? Siɗi na te halasi haa gorof par ɗa, t'an na amai gaini eziɗi ɵa zaw, te sumna azumai na ɗa buri hlai n’agwi kadai.

⁸Bowas a miɗiɗi wiiɗi Rut: Ahiya, ɵina pɗem, ku hala aŋ vara helek war vowai zamai kai, ku hala war hlai zamai kaalai; ku tapa gaiɗi falakai n’e ɗa zi sda na wiya ɗa.

⁹Ku tala hlai n’e ɗa hiɗi na wiya a vada, a pɗem ɓa, ku hala asakalɗi falakai zi sda ɗa par. Mu miɗiɗi wiiɗi ɗai zi sda ya buri a huwyuku kai. Na ɓa sai te na zuku, aga ku hala warni argiŋ zi yem ɗa, ku ca yem na ɗai zi sda e biliŋsi ɗa.

¹⁰Te hurga azumai te, te pa arɗi azumai midini afti. Te miɗini: Mu juva arku ɵa, na kapai ku tika hangalku sa mai hanɗa ɵa maɵa maɵa ɗa? Ta na m’adivi na morkoi hanɗa?

¹¹Bowas a wiyiɗi seŋ: "Wala na ku" zaŋ siɗi suwulku paŋ ɗa, e miɗiŋa ya, haa sin mri na wiini mofoku par, hini na ku hinasi apuku gaiɗi amuku edi, gaini aftiku na ku wasi warni lai, haa ku halasi war pinzibaɗi ɗai na ku siɗiɗi ka wuzani hlai par duk kai ɗa.

¹²EPIƊ-ƊAI a vurkuku sdaku na ku zaŋ ɗa, Epiɗ-ɗai Alaw na wiiɗi Izrayel, n’a ku halasi aŋ ŋoya azumai pin sezeni ɗa, a suku vrak na gai vi amai ta.

¹³Rut te miɗini: Epin-geza, a zuva ɓa mu tala arku ɗa mai hanɗa ɵa kureɗ, ku saŋa arai zi pi viya, ta na bagaiku ɗa, Ku muɗaŋa seŋ na saŋa firyi, paŋ ktai mu kiɗa aŋ kata gaiɗi ktai arbaɗi falakai zi sda na wiiku maa kai.

¹⁴Won hlai n’e diri e simi ɗa, Bowas a miɗiɗi wiiɗi Rut, Halasi, tika peŋ, jiibaŋ arni vinegre. Te sumna ɵimaɗi nagai zi hiɗi ɗa dam. A siɗi seyem na gai sisili. Te suma haa te va, pini n’ahina, te ŋoyaŋ tiɗi.

¹⁵Asakal par, te faka amai aŋ vara helek pra. Bowas a sa gadai wiiɗi ɗaini zi sda maini nɵa: Koo arbani vili na gai rgi ɓak ɓak tekeɗe ɗi, ki hiniti te vara, ki huwyiti kai.

¹⁶Na ki hiɗiŋ ɗa maa, ki hini zamai a yaka azumai, kapai te varaŋ, ki ɓiriti kai.

¹⁷Te vara helek war vowai ni ɵa haa koskoi. Te giɵa na te navaŋ ɗa. Te va gobi gal na wiini sak ɗaw.

¹⁸Te tikaŋ, te hala aha gaini. Te kaŋ siɗi suwulɗi. Simi n’a hina piɗi, te tikaŋsi edi, siŋɗi lai.

¹⁹Suwulɗi te zilbiti: Girna ku varasi helek ɗa wata ɗa? Tese sini n’a tala hawku ɗa. Nɵa Rut te siŋkiɗi ɗif na te zasi sda pini ɗa. Te muɗa: Ɗif na mu zasi sda pini girna ɗa e yikiŋ ɓa Bowas.

²⁰Nuumi te miɗiɗi wiiɗi munini ahiɗi: EPIƊ-ƊAI n’a hiniti pɗemi n’a na ziti siɗi na karɗi gaiɗi zi mri lai kai ɗa, a ɓakaŋ. Nuumi te miɗiɗi pra: Ɗif hanɗa, a zigelmu. A ktai arbaɗi nagai n’e kiɗi aŋ mili bulum na wiimu ɗa.

²¹Rut na Mowab par te muɗa pra: Ni kaw a muɗaŋa ɓa: Ku tapa gaiɗi ɗaiŋa zi sda ɗa, haa e vidi gaini sdani hiɗi ɗa paŋ.

²²Nuumi te miɗiɗi wiiɗi Rut na munini ahiɗi: Ahiya, a pɗem ɓa, ku hala gaiɗi falakai n’e zi sda na wiini ɗa, kapai ku nava huwyi war vowaini ɗif zamai kai.

²³Te tapa gaiɗi falakai zi sda na wiini Bowas ɗa aŋ vara helek ɵa haa sini dibini hiɗini orge gaini algama ta; te sumna ɗa gaiɗi suwulɗi.