Read Mousgoum Rut 3 Bible Online

Rut 3 - Mousgoum bible

Rut 3

¹Mefeŋ ktai, Nuumi na suwulɗi te miɗiɗi: Ahiya, mu firiya mu piyuku hlai ta kapai ku sumna pɗemi dam

²Buri ɓa Bowas na ku zasi sda pini gaiɗi falakai zi sda na wiini ɗa, a zigelmu. Ni maa a firiya a giɵa orge na wiini n’aŋ war lulufni duvuk na.

³Ma suku edi, girda emel suku, wa sapakaiku suku lai, hala war luluf ɗa, ku siŋka suku arni kai haa a vada gaini simini gaini cini lai paŋ haw.

⁴Won hlai n’a hala li aŋ fana azumai ɗa, ku tala hlai n’a fana woni ɗa pɗem ɓa. Asakal par ku hala, ku yima pini wala n’a baraŋ midini, n’azumai ezini sek ɗa amai agwi, ku fana azumai ezini rok. Ni aga a muɗuku midini wala n’aga ku zaŋ ɗa.

⁵Te wiyiɗi seŋ: Na ku muɗaŋa midini paŋ ɗa, aga mu zaŋ.

⁶Te hala edi war luluf, te za wala na suwulɗi te miɗiɗi midini paŋ.

⁷Bowas a suma, a ca lai, agulni te va gaini firiyi. A hala a fana edi mini orge n’e rgiŋ na gai pi amai tiɓ ɗa waŋ. Nɵa Rut te halasi gaini hangal, te yima pin sapa n’azumai ezini amai agwi, te fana azumai.

⁸War duvuk n’arba, ɗif hanɗa a jiriya, a ɵa arni ɗa muni azumai ezini gai fini waŋ.

⁹A muɗa: Ku siya ɗa? Te wiyini seŋ: Mu ta Rut, na bagaiku, pa tuku mada, buri ɓa ku zigelni mofa, ku kiɗa ku mula bulumni ku tuku lai.

¹⁰Nɵa a miɗiɗi: EPIƊ-ƊAI a ɓukuku ahiya, wala na ku zaŋ tiyana na ɗa, a siŋka jreku edi a suwa n’avuti ɗa pra, buri ku piyiɗi e ɗi gawlakai zi arai zaw na murgakai ɗa kai.

¹¹Tiyana ahiya, ku huna kai, wala na ku zilbaŋa midini paŋ ɗa, aga mu zaŋ buriku. Buri ɗaiŋa paŋ e siɗi ɓa tuku ku muni zi hormo.

¹²Na ku muɗaŋ na ɗa a jre, mu kiɗa mu mula bulum sme, amma ktai zamai a na, n’a kiɗa a mula bulum ɗa lai, a zigelni mofoku n’amlai gobi a suwaŋa ta.

¹³Fana wiiku. Dawai par, na ɓa a dara a yimuku sini ɗa, seŋ aŋ kai, na ɓa a dara a yimuku sini kai ɗa, ta aga mu za hanɗa, gaini EPIƊ-ƊAI jaŋ. Fana wiiku, sai gorof par.

¹⁴Te fana wiiɗi azumai ezini ɵa haa gorof par. Te faka amai gorof par cup, won hlai na ɗif a kiɗa asiya maini kai hai. Bowas a firya ɗif asiya ɓa muni te fana war luluf gaya kai.

¹⁵Nɵa a muɗa: Saŋasi sapaku n’ag'aŋ sulu ɗa, baraŋ azumai. Na te baraŋ azumai lai, a ŋiɗi kilo doogo pi ɵim na wiini orge, a tikiŋɗi amai midiɗi. Asakal par a wayasi aha war fuŋ n’abai ɗa.

¹⁶Rut te wayasi aha siɗi suwulɗi; suwulɗi te zilbiti: Ku za maɵa maɵa ɗa ahiyaŋ Rut te miɗiɗi midini wazagai na ɗif hanɗa a zaŋ buriɗi paŋ.

¹⁷Te muɗa: A saŋasi kilo doogo pi ɵim na wiini orge hanɗa a ni. A muɗaŋa ɓa: Ku waya aha siɗi suwulku gaini tuku puku ca kai.

¹⁸Nuumi te muɗa: Sumna wiiku dam kiɗi, girna he, seŋ n’aŋ tuku na ɗa, na ɓa a ɵa edi kai ɗa, ɗif hanɗa aga a sumna kai.