Read Mousgoum Rut 4 Bible Online

Rut 4 - Mousgoum bible

Rut 4

¹Bowas a hala amai min magala, war faada, a sumna woni dam. Nɵa, ni n’a kiɗa a mula bulum, na Bowas a haɗa kalaŋ midini ɗa, a na vuga. Bowas a miɗini: Waisi haw! Sumna ka agwi haw. A waisi, a sumna dam.

²Nɵa Bowas a yika ɗai doogo arbaɗi n’abakai na war fuŋ n’abai ɗa, a muɗa: Simnisi azumai ca haw, nagai e simni azumai lai.

³Asakal par a muɗa wiini ni n’a kiɗa a mula bulum ɗa maini nɵa: Nuumi te wayasi edi midini afti na Mowab par ɗa, te firiya te wura vowai na wiini Elimelek na zigelmu ɗa edi.

⁴Ta ɓa marya ku ɵina ba, mu muɗuku na ɗa ɓa marya ku wuraŋ wuzaɗi ɗai zi fuŋ gaiɗi n’abakai na wiimu, na ɓa ku firiya ku wuraŋ ɗa wuraŋ wiiku. Amma na ɓa ku firiya kai ɗa, ku muɗaŋa. Buri ɗif zamai na mula bulum hanɗa wuzaku tuku par aŋ kai, mu ga puku mu ta lai. A wiyini seŋ: Aga mu wuraŋ.

⁵Bowas a muɗa: Yivai na ku wura vowai hanɗa li tiɗi Nuumi par ɗa, aga wuraŋ war yikiɗi Rut na Mowab par, na munini ɗif n’a mra ɗa, kapai yikini ɗif n’a mra ɗa, a ɓa edi kai, a hina midini bulum na wiini su.

⁶Nɵa, ni n’a mula bulum ɗa a waya seŋ: Mu kiɗa aŋ mula bulum ɗa kai, hunai pa ta, buri farai na wiya aga a tuura. Mula bulum hanɗa wiiku war balamŋa, buri mu kiɗa aŋ mulaŋ kai.

⁷Aɗipar war Izrayel ɗa, buri seŋ na wiini bulum zaw wala zi bindi, kapai a za ɗa, ɗif ktai a rɗa harabak n’ezini, a siŋni wiini ni n’a futi te sa sini ɗa, a wala n’a siŋka edi arɗi ɗai ɓa, seŋ ɗa a ɗiya zaw.

⁸Ɗif n’a mula bulum ɗa, a miɗini wiini Bowas: Wura bulum hanɗa wiiku, a wa harabak n’ezini edi, a siŋni ta.

⁹Bowas a miɗiɗi wiiɗi n’abakai gaiɗi ɗai paŋ: Tiki ki ɗi zaidakai girna par, ɓa mu wura wazagai na wiini Elimelek, gaini na wiini Mahlon, gaini na wiini Kilyon ɗa lai tiɗi Nuumi par.

¹⁰Mu yimiti Rut na Mowab par, na munini Mahlon ɗa sa lai, kapai yikini ni n’a mra a ba edi kai, a hina midini bulum na wiini su, kapai yikini a haza edi arbaɗi tawalakaini par, zaw min magalaini fuŋ n’abai ɗa kaalai. Tiki ki ɗi zaidakai girna.

¹¹Ɗai n’e diŋgisi min magala war faada, gaiɗi n’abakai lai e miɗi: Tiyi mi ɗi zaidakai! A zuva ɓa EPIƊ-ƊAI a binditi muni na te niya aha war dalamku hanɗa maiɗi Rakel gaiɗi Lea nɵa, nagai na sulu n’e wiiɗi pinzibaɗi Izrayel ɗa nɵa! Siŋka gdaŋku edi wiiɗi Öfrata, hina yikuku a wa war Betlehem lai!

¹²A zuva ɓa ali n’EPIƊ-ƊAI aga a suɗuku gaiɗi drai hanɗa, e bindi pinzibaku viy maini na wiini Peres, na Tamar te wiŋni wiini Yuda ɗa nɵa.

¹³Bowas a yimiti Rut, te bunda aŋ munini, a tapa gaiɗi. EPIƊ-ƊAI a ɓikiti te tika fel, te wa ahi na wus.

¹⁴Falakai e miɗiɗi wiiɗi Nuumi: Kol sin EPIƊ-ƊAI n’a hunuku edi duk kai, buri a suku ni n’aga a lubuku li girna, a zuva ɓa yikini a wa edi war Izrayel paŋ.

¹⁵Ahi hanɗa, aga a tukuku hangalku azumai, won hlai na ku za li wuli ɗa, aga a zina puku. Buri munini ahiku hanɗa, te duruku gara, te wuku tiyku hanɗa; buriku ɗa, na te suwa ali na maɵagai muguzak.

¹⁶Nuumi te tika arwagwi, te fanaŋ didikɗi, te hina aŋ tika hangalɗi sini.

¹⁷Marɗi falakai na ɵimaɗi e sini yiki e miɗi: Nuumi te wa ahi su, e sini yiki ɓa Obed. A epini Isai n’epini David.

¹⁸Pinziba na wiini Peres a na maini nɵa: Peres a wa Hesron,

¹⁹Hesron a wa Ram, Ram a wa Aminadab.

²⁰Aminadab a wa Nason, Nason a wa Salma,

²¹Salma a wa Bowas, Bowas a wa Obed,

²²Obed a wa Isai, Isai a wa David.