Read Mousgoum 1 Samuwel 1 Bible Online

1 Samuwel 1 - Mousgoum bible

1 Samuwel 1

¹Ɗif ktai a naka war Ramataiim-Sofim midini hlai zi huwuŋ na wiini Efrayim, yikini Elkana a ahini Yeroham n’ahini Elihu, n’ahini Tohu, n’ahini Sup na war Öfrata par,

²falakaini sulu, na ktai yikiɗi ɓa Anna, na te gaŋ sulu yikiɗi ɓa Penina. Penina te wa ali, amma Anna te wa kai.

³Buza buza paŋ, Elkana a halaɗi war fuŋ n’abai ɗa amai a Silo aŋ hurga azumai wuzani EPIƊ-ƊAI zi Spak ɗa paŋ, aŋ zini ɓaka lai. Alini Eli na sulu Hofni gaini Pinas e ɗifu woni aŋ paakai zi ɓaka na wiini EPIƊ-ƊAI.

⁴Mefeŋ na Elkana a za ɓaka li ɗa, a sa neŋ wiiɗi Penina gaiɗi aliɗi na maɵagai gaiɗi na falakai lai,

⁵amma wiiɗi Anna ɗa, a siɗi neŋ na pɗem a suwa buri ɓa a diriti gara, koo gaini n’EPIƊ-ƊAI a siɗi ali kai na ɗa paŋ.

⁶Penina, muni na ktai ɗa te yiva aŋ ɓilkiɗi hiiniɗi ɵa, buri ɓa EPIƊ-ƊAI a ziti muɗaŋ ta.

⁷Buza buza paŋ won a na zaŋ maini hanɗa ɵa. Hlai paŋ na Anna te hala amai war dalam na wiini EPIƊ-ƊAI ɗa, Penina te ɓilkiɗi maini hanɗa ɵaaŋa ɵaaŋa. Nɵa te tuwa, te dara te suma kai.

⁸Elkana na mafaɗi a miɗiɗi: Anna ku tuwa buri maɗa? Ku suma kai ɗa buri maɗa? Agulku a kwima ɵa buri maɗa? Buriku ɗa, mu suwa ali na viya kai ɗi?

⁹Asakal n’e simi ya, e ci ya lai ɗa war Silo ɗa, Anna te faka amai. Pai zi ɓaka Eli a nafu gaini simni azumai midiɗi kurzini ɵimani luwuŋ n’e pi porte na mini tempel na wiini EPIƊ-ƊAI azumai gaini ɗa.

¹⁰Anna te nafu warni kwimi n’abai gara, te siiwa tini EPIƊ-ƊAI, te tuwa abai gara lai.

¹¹Te za ɵinini-ha wiini EPIƊ-ƊAI te muɗa: EPIƊ-ƊAI zi Spak paŋ, na ɓa ku tala hawŋa li, ku saŋa seyem li wiya ta na bagaiku ɗa, aga mu sini ahi hanɗa wiini EPIƊ-ƊAI haa sini mrini ta, ɗif aga a faɗa ayir a midini ɗa edi kai.

¹²Won hlai na te na siiwa tini EPIƊ-ƊAI wuzaɗi sek ɗa, Eli a mula arni sini miɗi ca.

¹³Anna te muɗa seŋ gaiɗi agulɗi, miɗi a muguza amma seŋ na te muɗaŋ ɗa a wasi edi kai. Eli a hiina ɓa t'aŋ gaini ciini su.

¹⁴A miɗiɗi: Aga ku sumna warni ciini hanɗa haa kaswata ɗa? Hala vada sul n’arku edi warni hlai zamai.

¹⁵Anna te wiyini seŋ: Epin-geza, ta ɗa mu muni na haw, amma m’aŋ gaini ciini kai, mu ca vin kaalai, sul zamai kaalai, mu tuwa na ɗa wuzani EPIƊ-ƊAI.

¹⁶Ku yimaɓa ta na bagaiku maiɗi muni na hangalɗi meefeŋ ɵa kai, mu muɗa seŋ viya na ɗa burini gir na t'aŋ sa gaini hiiniŋa n’a tuura ɗa.

¹⁷Eli a wiyiɗi seŋ: Hala gaini ɵeɗ, a zuva ɓa Alaw na wiiɗi Izrayel a suku wala na ku zilbaŋ tini paŋ.

¹⁸Te miɗini: Ta mu bagai na wiiku, a zuva ɓa mu nava yum wuzani arku haa kureɗ. Asakal par te waya aha, te suma, arɗi a buda a tala kiini gaini n’avut ɗa.

¹⁹E fiki amai gorof, asakal n’e hûrgi azumai wuzani EPIƊ-ƊAI ya, e wiyi ahaɗi war Rama. Elkana a fana gaiɗi Anna na munini, EPIƊ-ƊAI midini a kɵa gaiɗi.

²⁰Haa sini vidini buza ɗa, te tika fel, te wa ahi na wus, te sini yiki ɓa Samuwel, buri te muɗa: Mu zilbaŋ ɗa tini EPIƊ-ƊAI par.

²¹Asakal par Elkana na mafaɗi a hala amai a Silo gaiɗi pakataini paŋ aŋ za ɓaka na war buza ɗa wiini EPIƊ-ƊAI, aŋ za wala n’a za ha midini lai.

²²Amma Anna te hala gaini kai, buri te miɗini wiini mafaɗi ya ɓa: Won hlai na mu saka ahiyagwi li edi mini fiyaw par ɗa aga mu kaŋ amai a ɗiya wuzani EPIƊ-ƊAI, a hinasi woni ɵa gamai.

²³Ekana na mafaɗi a miɗiɗi: Za maini na ku dara nɵa, hina ka wiiku haa won hlai na ku cakaŋ li edi. Hina EPIƊ-ƊAI a va seŋni ɗa amai. Nɵa muni te hina ka dam, te sini fiyaw mini ahiɗi haa sini mefeŋ na te cakaŋ edi ta.

²⁴Won hlai na te cakaŋ edi li, Te hala gaini amai warni tempel, te mula garakai piɗi hu, avudi sak ɗaw, vin koloŋ ɗaw lai. Te kaŋ amai warni tempel na wiini EPIƊ-ƊAI war Silo, arwagwi a nafu agwi gara.

²⁵E fiɗi gari ɗa su, e ki ahiyagwi sini Eli.

²⁶Anna te muɗa: Lapiya, Epin-geza, gaiku tuku zaŋ, ta mu muni na mu naka gaiku woni na aŋ siiwa tini EPIƊ-ƊAI.

²⁷Mu siiwa ɗa ahi na wus hanɗa, EPIƊ-ƊAI a saŋa wala na mu siiwaŋ tini ɗa.

²⁸Tiyana ta ɗa mu siŋni wiini EPIƊ-ƊAI n’a na zilbaŋ ta lai. Aga a sa edi aŋ wiini EPIƊ-ƊAI haa sini dibini suŋfani. Asakal par e hûrgi azumai woni hlai hanɗa wuzani EPIƊ-ƊAI.