Read Mousgoum 1 Samuwel 10 Bible Online

1 Samuwel 10 - Mousgoum bible

1 Samuwel 10

¹Samuwel a tikiti agagazai z'emel, a ma emel na warɗi midini Sawul. A kɵa amai wulani lai, a muɗa: EPIƊ-ƊAI gai midini dama a ma emel muduku, kapai ku sumna aŋ pai midiɗi ɗai na wiini.

²Girna tar, won hlai na ku halaɗi li sa par ɗa, aga ku nava ɗai sulu ɵimani yel na wiiɗi Rakel war Selsa, gobi gaini haga na wiini afti na wiini Benyamin. Aga e muɗuku ɓa: Ablehökai na ki hili aŋ piyiŋ ɗa, e niviŋ ya, tiyana ɗa, apuku a hina seŋni ablehökai ɗa edi ta, a fiɗini sini na ɗa a seŋ na wiiki ɗa. A zilba sini lai ɓa: Aga mu za ɗa a maɗa kapai mu nava ahiya ɗa?

³Woni par, ku hala li wuzaku sek gaigai agwi ɗa, aga ku co pin luwuŋ Terebente na Tabor, aga ku niviɗi ɗai hu n’e ɗa hili war tempel, a Betel sek, na ktai ali haakai tini hu, na ktai peŋ na wulla tini hu, na ktai argini zi vin tini ɗaw lai.

⁴Nagai aga e zilbi jam na suku, aga e suku peŋ sulu lai, ku yimaŋ tiɗi par.

⁵Asakal par aga ku co war Gibeya-Elohim, woni aga ku nava hlai n’abakaiɗi Filistrekai e simni woni ɗa. Ku niya li aha war fuŋ n’abai ɗa aga ku nava vokɗi ɗai na min Alaw, n’e ɗa niyisi azumai amai war hlai zi ɓaka par, n’e zi siɗi maiɗi ɗai na min Alaw ɵa, adill gaini gaŋga gaini algeta, gaini gaŋgraŋ a suura wuzaɗi.

⁶Seze na wiini EPIƊ-ƊAI aga a niya suku, aga ku tapa gaiɗi, ku za maiɗi ɗai na min Alaw nɵa lai, aga ku bunda aŋ ɗif zamai.

⁷Won hlai na wazagai hanɗa paŋ a za li suku ɗa, za wala na ku dara ku zaŋ ɗa, buri ɓa Alaw aŋ gaiku

⁸Asakal par, ku halaɗi ka wuza war Gilgal. Ta, aga mu halaɗi mu nuvuku woni, aŋ za ɓaka zi yi gaini ɓaka zi ɵeɗ lai. Ku bayaŋa ka haa mefeŋ muguzak, haa mu coɗi suku, aŋ suŋkuku wala n’aga ku zaŋ ɗa.

⁹Hlai na Sawul a hina Samuwel, a bunda arni aŋ hili tar ɗa, Alaw a sini hiini zamai warni, wazagai zi siŋki hanɗa paŋ a va amai war mefeŋ ni dama.

¹⁰Won hlaina Sawul gaini ɗifni zi sda e cû war Gibeya ɗa, vokɗi ɗai na min Alaw e hilisi miɗi. Seze na wiini Alaw a niya sini, a niya arbaɗi a tika pini a za maiɗi ɗai na min Alaw nɵa lai.

¹¹Nagai n’e siɗiŋ ɗa, e tiliŋ a za sini arbaɗi ɗai na min Alaw maini ɗif n min Alaw ɵa. Ɗai e zilbi marɗi ɓa: Ahini Kis ɗa a zaŋ ɗa a ma ɗa? Sawul ɗa a ɗif na min Alaw lai ɗi?

¹²Ɗif ktai na woni a muɗa pra: Epiɗi ɗa asiya ɗa? Pin seŋ hanɗa, seŋ na ɓa Sawul ɗa a na arbaɗi ɗai na min Alaw lai ɗi ɗa a niyasi edi.

¹³Won hlai na ziriyini a tika azumai li, Sawul a hala war hlai zi ɓaka ɗa.

¹⁴Tawalni epini a miɗini: Gaini ɗifku zi sda ɗa ki ɗisi wata ɗa? Sawul a wiyini seŋ: Mi ɗisi aŋ piyi ablehökai na falakai ɗa; amma mi niviŋ kai, nɵa mi hili sini Sam.

¹⁵Tawalni epini Sawul a miɗini: Za barka, muɗaŋa seŋ na Samuwel a muɗuŋku ɗa.

¹⁶Sawul a miɗini wiini tawalni epini: A miɗiyisi edi gaglai ɓa ablehökai na falakai e niviŋ ya. Amma a miɗini gaini seŋ na wiiɗi pai na Samuwel a miɗiŋni ɗa kai.

¹⁷Samuwel a tipiɗisi ɗai paŋ azumai wuzani EPIƊ-ƊAI war Mitspa,

¹⁸a miɗiɗi wiiɗi ɗai na Izrayel ɓa Epiɗ-ɗai Alaw na wiiɗi Izrayel a na maini nɵa: Mu miliɗisi ɗai na Izrayel edi war Egipte par mu ta. Mu plikisi edi war tiɗi ɗai n’Egipte par, tini aftiɗi paakai n’e ɗi ka e ziki gir ɗa lai.

¹⁹Tiki girna ɗa, ki diri sini Alaw na wiiki, na plikisi edi min girki par, edi min gir na ki siɗiŋ ɗa paŋ par ɗa kai, ki miɗini ɓa: Tikiyi pai midiyi ta. Nɵa tiyana ɗa, ɗiyi wuzani EPIƊ-ƊAI, pin pinziba pinziba, piɗi humuni humuni lai.

²⁰Samuwel a yikiɗisi pinzibaɗi Izrayel ɗa paŋ, wala zi vili a yima pinzibani Benyamin.

²¹A yikiɗisi pinzibani Benyamin ɗa piɗi humuni humuni, piɗi humuni na wiini Matri, wala a yimiti. Asakal par, Sawul n’ahini Kis ɗa wala a yimaŋ lai. E piyiŋ, amma e nafu arɗi kai.

²²Ɗai e wiyi e zilbi EPIƊ-ƊAI pra, e miɗi: Ɗif ni ɗa a halasi won na ɗaw ɗi? EPIƊ-ƊAI a muɗa: A na azumai arbani wazagai ɗa gai ŋûyi cok.

²³Ɗai e luwi e yimiŋsi edi woni par, a ɗiya amai arbaɗi ɗai ɗa zaw. A suwa ɗai amai gai wili paŋ.

²⁴Samuwel a miɗiɗi wiiɗi ɗai maini nɵa: Ki tili ɗif n’EPIƊ-ƊAI a varaŋ ɗa li kai ɗi? Ɗif zamai na maini ɵa arbaki aŋ kai. Ɗai e ɵiɓi tiɗi pini e miɗi: Jaamus, wala a zuku kai.

²⁵Samuwel a siŋkiɗi sdaɗi pai ɗa edi ta ta, a ɗoŋ war maktuɓ ɗo, a tikaŋ azumai wuzani EPIƊ-ƊAI ta. Asakal par, Samuwel a tikiɗi piɗi ɗai ta ta ta, ɗif paŋ ahani ahani.

²⁶Sawul lai a hala ahani war Gibeya. Ɗai zi hatam n’agulɗi a huna kai e tipi gaini lai.

²⁷Amma gai hanɗa paŋ ɗa, ɗai na hangalɗi meefeŋ e miɗi: Buri maɗa? Hanɗa a ɗif n’aga a kurɗumu edi ɗi? E miisiŋ, e sini katu kai, amma a miɗiɗi seŋ kai.