Read Mousgoum 1 Samuwel 11 Bible Online

1 Samuwel 11 - Mousgoum bible

1 Samuwel 11

¹Nahas, pai na wiiɗi Amonitekai, a hala a caka fuŋ n’abai na Yabes na war Galaad. Ɗai na Yabes ɗa paŋ e miɗini wiini Nahas: Za bonu gaiyi ta, tiyi aga mi ɵini puku.

²Amma Nahas na Amnon a wiyiɗi seŋ: Na ɓa mu za bonu gaiki ɗa, sai na ɓa ki yimi seŋ hanɗa li siki: Arki na wus ɗa mu coŋ co co, kapai gaini hanɗa mu tikiɗi siyer wiiɗi ɗai na Izrayel ɗa paŋ.

³N'abakai n’arbaɗi ɗai na Yabes ɗa, e miɗini: Hiniyi hlai agwi, na dai dai mefeŋ muguzak ta, kapai mi ɵini ɗai edi midini afti na wiiɗi Izrayel ɗa paŋ, na ɓa ɗif n’a pliyi edi aŋ kai ɗa, aga mi si siyi war tuku.

⁴Ɗai n’e ɵiniɗi e cû war Gibeya, na wiini Sawul ɗa, e miɗi seŋ hanɗa wiiɗi ɗai lai; ɗai e tuwi gara.

⁵Sawul a wayasi edi war vowai par, pini ɵaakaini su. Sawul a muɗa: Ɗai e tuwi ɗa buri ma ɗa? E miɗini seŋ na ɗai na Yabes e hilisi e miɗiŋ ɗa ta ta.

⁶Won hlai na Sawul a ɵina seŋ hanɗa, seze na wii Alaw a niya sini, a za hiy gara ta.

⁷A yima garakai jaɓ, a ɗuklaŋ edi daf daf, a ɵina ɗai gaini edi midini afti na wiiɗi Izrayel ɗa su su, a muɗa, ɗif n’a niya edi min hatam pin Sawul gaini Samuwel kai ɗa, aga e zi ɵaakaini maini nɵa. Hunai na wuzani EPIƊ-ƊAI te yima ɗai, e niyi edi min hatam maini ɗif ktai ɵa.

⁸Samuwel a tala vok n’aŋ pini ɗa war Bezek. Aliɗi Izrayel paŋ e ɗa dubu miya hu, ɗai na Yuda ɗa dubu doogo doogo hu lai.

⁹E miɗiɗi wiiɗi ɗai n’e ɵiniɗisi ɗa maini nɵa: Ki hili ki miɗiɗi wiiɗi na Yabes na war Galaad ɗa maini nɵa: Dawai haa futi te sawwa ta ta ɗa, aga ki rɗi amai. Ɗai n’e ɵiniɗi ɗa e ki labar hanɗa wiiɗi ɗai na Yabes, e firiyi gara.

¹⁰Ɗai na Yabes e miɗiɗi wiiɗi Ammonitekai maini nɵa: Dawai aga mi si siy war tiki, aga ki zi siyi maini n ki diri nɵa.

¹¹Dawaini ɗa, Sawul a ɓurwa vok na pini azumai hu, e niyi aha war kaŋ piɗi, gorof na hlai a sɗasi fu edi sek ɗa, haa hlai a sawwa ta ta ɗa, e rɗi amai midiɗi Ammonitekai. Nagai n’e hini karɗi ɗa e ɵri edi kap kap, ku nava ɗai piɗi marɗi sulu kir kai.

¹²Ɗai e mmiɗini wiini Samuwel: Ɗai n’e ɗi ka e miɗi ɓa, a sumna aŋ pai mudumu ɗa a Sawul ɗi ɗa, e ɗi ɗai ma ɗa? Piyiɗiyisi ɗai hanɗa, mi fiɗiɗi edi.

¹³Amma Sawul a muɗa: Yivai na girna ɗa, mu fuɗumu ɗif warɗi kai, buri ɓa girna EPIƊ-ƊAI a sa rɗi n’amai wiiɗi ɗai na Izrayel.

¹⁴Samuwel a miɗiɗi wiiɗi ɗai: Hilisi hulu a Gilgal aŋ siɓkutumu pai na wiini Sawul ɗa edi gaglai.

¹⁵Ɗai paŋ e hili war Gilgal, woni e tiki Sawul aŋ pai, wuzani arni EPIƊ-ƊAI, war hlai ni ɗa, Sawul gaiɗi ɗai na Izrayel ɗa paŋ e ziti fet n’amai gara.