Read Mousgoum 1 Samuwel 13 Bible Online

1 Samuwel 13 - Mousgoum bible

1 Samuwel 13

¹Sawul a sma pai sek ɗa buzani, a ɓa midiɗi Izrayel paŋ buza sulu.

²Sawul a vara ɗai dubu hu arbaɗi aliɗi Izrayel par: Ɗai na dubu sulu ɗa e ɗifu gaini war Mikmas, amai midiɗi huwuŋ na Bet-El, na dubu ktai ɗe e ɗifu gaini Yonatan war Gibeya lai.

³Yonatan a fuɗa ɗif n’abai na wiiɗi Filistrekai n’a na war Geba ɗa, Filistrekai e ɵini labar hanɗa. Sawul a sa futi buri ɗai e yibi faana midini afti ɗa paŋ war hiini na ɓa, ɗai na Hebre ɗa e ɵini hanɗa.

⁴Ɗai na Izrayel ɗa e ɵini seŋ na ɗai e ɗa miɗiŋ edi ɓa: Sawul a fuɗa abai na wiiɗi Filistrekai ɗa su, tiyana ɗai na Izrayel ɗa e bindi siɗi haharai wuzani arɗi Filistrekai. Ɗai e tipi pini Sawul war Gilgal.

⁵Filistrekai e tipisi buri e hitimi gaiɗi ɗai na Izrayel. Saret zi gaw na wiiɗi dubu doogo doogo hu, ɗai zi diɓiri plasai dubu ɵaara, askarai zi hatam ɗa, e pɵi kai maini kai kai n’agoɗom nɵa.

⁶Ɗai na Izrayel ɗa e tili siɗi e ɗa wargir, buri ɓa ɗai e hiɵiɗi amai haɵ. E ŋûyi war waŋ na sini huwuŋ, war waŋ n’arni afti, amai sini huwaŋai, war hudukai gaini kalaŋ lai.

⁷Hebrekai zamai e vigi ra Yurdan e hili midini afti na wiini Gad gaini Galaad lai. Sawul a nafu war Gilgal, nagai na pini ɗa e tiki piɗi e jiriyi.

⁸A baiya haa mefeŋ muguzak, mefeŋ na Samuwel a kitiŋni ɗa. Amma Samuwel a kiɗasi a Gilgal kai, ɗai e tiki piɗi e ɵiri.

⁹Nɵa Sawul a muɗa: Kiŋasi ɓaka zi yi gaiɗi ɓaka zi ɵeɗ ɗa. A za ɓaka zi yi ɗa.

¹⁰Won hlai n’a vada gaini ɓaka zi yi tar ɗa, Samuwel a cosi, Sawul a niyasi anene mini aŋ ɵiɓini wuti.

¹¹Samuwel a muɗa: Na ku za ɵa ɗa a ma ɗa? Sawul a waya seŋ a muɗa: Won hlai na mu tala ɓa ɗai e ɵiri a ɵiri, mu tala haa ku cosi war sarti na mu kutuɓmu kai ɵa, Filistrekai ɗe e ɗa gai tipi a Mikmas par ta lai ɗa,

¹²Mu hiina ɓ'aga e hilisi e cikiyi war Gilgal, wuzani hlai na mi tikitini agulni EPIƊ-ƊAI azumai kai hai! Nɵa mu za dewele wiini sa, mu za ɓaka zi yi ɗa.

¹³Samuwel a miɗini wiini Sawul: Ku za na ɗa a sda na wiini ɗif zi duuli, ku za pin gadai n’Epiɗ-ɗai Alaw na wiiku a suŋku ɗa kai. Sla kai ɗa, EPIƊ-ƊAI a firya a hiniti fu paiku na ɗa ɵa gamai war Izrayel

¹⁴Tiyana ɗa, paiku aga te ɗiya kir kai, EPIƊ-ƊAI a paya ɗif n’a vini firyini amai gara ta, EPIƊ-ƊAI a tikaŋ miɗiɗi ɗaini ta, buri ɓa ku za pin gadai n’EPIƊ-ƊAI a muɗuŋku ɗa kai.

¹⁵Asakal par, Samuwel a halasi a Gilgal par, a Gibeya na war Benyamin. Sawul a tiliɗi askarai na pini ɗa ŋa ŋa, ɗai zi gobi miya ɵaara.

¹⁶Sawul lai, Yonatan n’ahini lai, nagai na pini lai e pi a Geba na war Benyamin par tiɓ. Filistrekai e pisi kaŋ na wiiɗi a Mikmas par tiɓ lai.

¹⁷Vokɗi askarai zi tûûri wazagai edi e niyisi edi war kaŋ na wiiɗi Filistrekai par, e ɓûrwi siɗi azumai hu, vok na ktai e tikiti futi na Ofra sek, sini afti na wiini Suwal sek,

¹⁸na ktai hanɗa, a tikiti futi na Bet-Horon sek, vok n’ag'aŋ hu ɗa a ikiti futi na te ka sin haga sek ɗa, na te vugasi amai par midini huduk na Seboyim ɗaw, war gal n’edi war basga na kaɗataŋ sek ɗa.

¹⁹Ɗif zi giɵi fai fai a hina aha war Izrayel kir kai, buri Filistrekai e si miɗi ɓa Hebrekai e zizini kaɵkar kaalai, kawai kaalai.

²⁰Ɗai na Izrayel par paŋ e hili ɗa ahaɗi Filistrekai, kapai e ɵiɓi min digaɗi gaini hidikai na wiini garakai zi hirim gaini beɓelɗi gaini mini gurnaiɗi edi.

²¹Kapai min walaku a ɵiɓa edi zaw, zaw mini na gai fi a maɗa edi ɗa, sai ɗif a vurga farai viya haw, gobi sulai zi arzaŋ ɗaw.

²²War mefeŋ zi hatam ɗa, nagai na pini Sawul gaini Yonatan par ɗa, kaɵkar tiɗi kai, kawai tiɗi kaalai, ku nava kaskar zaw kawai ɗa ai tini Sawul gaini Yonatan n’ahini tar.

²³Vokɗi askarai na wiiɗi Filistrekai a halasi a pa war futi na te hala a Mikmas sek ɗa tiɓ.