Read Mousgoum 1 Samuwel 14 Bible Online

1 Samuwel 14 - Mousgoum bible

1 Samuwel 14

¹Mefeŋ ktai, Yonatan n’ahini Sawul a miɗini wiini gawla n’a luba wazagaini zi hatam maini nɵa: Halasi, hulumu ha pni vokɗi askarai na wiiɗi Filistrekai n’aŋsi gai pi war gal hanɗa par tiɓ na ɗa. A zni zaida wiini epini kai sam.

²Sawul a nafu azumai pin luwuŋ grenade n’aŋ war Migron ɗa dam, edi min afti na wiiɗi Gibeya dam. Vokɗi askarai na pini e zi gobi miya ɵaara.

³Ahiya, n’ahini Ahitub, na tawalni I-kabod, n’ahini Pinas n’ahini Eli, pai zi ɓaka na wiini EPIƊ-ƊAI war Silo, a nafu gaini wala n’e zilbi dirini Alaw gaini tini. Vokɗi askarai e siɗi ɓa Yonatan a hala ɗaw ɗa e siɗi ɵa kai.

⁴Arbani min hlai na Yonatan a firya a niya aha pin vokɗi askarai na Filistrekai warni ɗaw ɗa, ktai a na arbani, huwuŋ a nafu woni sulu midini n’amai ɗa mini sweɗ sweɗ, na ktai war gal hanɗa par, na ktai war gal hanɗa par lai. Na ktai yikiɗi ɓa Boses, na ktai yikiɗi ɓa Sene lai.

⁵Huwuɓi na ktai, te diya war gal n’azumai sek, wuzaɗi Mikmas tar, na ktai war gal n’amai sek, wuzaɗi Geba tar lai.

⁶Yonatan a miɗni wiini gawla n’a luba wazagaini zi hatam maini nɵa: Halasi, hulumu aha pin vokɗi Filistrekai na gazɗaɓai hanɗa. Ablaŋtaŋkai EPIƊ-ƊAI a ɵa pini pumu par ɗi, buri na ɓa EPIƊ-ƊAI a dara a kurɗa ɗif edi ɗa, wala ktai n’a ɗalaŋ aŋ kai, a kiɗa a zaŋ gaini vok n’abai a kiɗa zaŋ gaini vok n’agwi lai.

⁷Ni n’a luba wazagaini zi hatam a miɗini: Za wala na ku hiinaŋ ɗa, ku giriŋa kai, ta m’aŋ gaiku na ɗa maiɗi agulku nɵa.

⁸Nɵa Yonatan a miɗini: Tiyana ɗa, hulumu siɗi, mu ɓuyumu sumu kir kai, e tulumu wiiɗi.

⁹Na ɓa e muɗumu li ɓa: Ki ɗiyisi edi woni, sai mi hiliɗi siki mi ɗi tiyi ɗa, mu ɗiyumu hiyak, mu hulumu siɗi sek kai.

¹⁰Na ɓa e miɗi li ɓa: Hilisi ɗa, aga mu hulumu siɗi, a siŋka ɓa EPIƊ-ƊAI a siɗi war tumu ca. Hanɗa a wala n’aga a siɓkumu ɗa.

¹¹Gaini suliɗi paŋ e siŋki siɗi arɗi askarai na wiiɗi Filistrekai ɗa; Nagai e miɗi: Tili Hebrekai n’e ŋûyi war waŋ ɗa e ɗa niyisi edi a ɗi na!

¹²Askarai na war vok ni ɗa e miɗini wiini Yonatan gaini gawla n’a luba wazagaini zi hatam pini ɗa maini nɵa: Hilisi siyi, Seŋ aŋ miyi, mi dir mi miɗiŋki! Yonatan a miɗini wiini gawla n’a luba wazagaini zi hatam maini nɵa: Slasi pa, buri EPIƊ-ƊAI a siɗi war tiɗi Izrayel ya.

¹³Yonatan a pa tini azumai agwi lai, a hala agwi lai, haa a niya amai siɗi, ɗifni n’a libini wazagaini zi hatam ɗa, pini su lai. Yonatan a tika pini a fiɗiɗi Filistrekai, nagai n’e hini li karɗi pini par, ɗifni zi libini wazagaini zi hatam ɗa a vidiɗi edi lai.

¹⁴Niyi n’edi n’avut na wiini Yonatan gaini ɗifni zi libi wazagaini zi hatam ɗa, e fiɗi ɗai e zi caaɓa, ezini hlai ktai agwi nɵa.

¹⁵Wala hanɗa a mula hunai piɗi ɗai na war kaŋ ɗa paŋ, na midini afti ni ɗawwa paŋ, arbaɗi ɗai paŋ lai. Vokɗi askarai n’e hitriɗi midini ɓilkini hlai edi maa, hunai a yimiɗi paŋ lai. Afti paŋ a ziriya, hunai hanɗa a hinaŋsi midiɗi ɗa a Alaw.

¹⁶War Geba na wiiɗi pinzibani Benyamin par, ɗai na Sawul a miliɗi ca ca aŋ riɓti, e tili ɗa, abaiɗi Filistrekai e luwi arɗi marɗi na sek lai na sek lai.

¹⁷Nɵa Sawul a miɗiɗi wiiɗi askarai na wiini: Yiki yikiɗi ɗai edi, kapai mu suɗumu ni n’arbamu par n’aŋ kai ɗa. E yikiɗi ɗai edi, e niviŋ ɗa ɓa: Yonatan gaini ɗifni zi libi wazagaini zi hatam ɗa e ɗi kai.

¹⁸Sawul a miɗini wiini Ahiya, hala kasi zunduk zi bonu na wiini Alaw ɗa haw, - buri war mefeŋ ni ɗa, zunduk zi bonu a nafu tiɗi aliɗi Izrayel.

¹⁹Won hlai na sawul a na miɗini wiini pai zi ɓaka ɗa, turli n’aha war kaŋ na wiiɗi Filistrekai ɗa a riya amai sek sek. Sawul a miɗini wiini pai zi ɓaka ɗa: A fuɗuku kir kai, hinaŋ.

²⁰Asakal par, Sawul gaiɗi askarai na wiini e tipi, e hili edi min hlai zi hatam ɗa. E niviɗisi ɗa, ɗif paŋ a bula ɗa a maini gaini kaɵkar tar tar; a wala zi mili hunai pini ɗif n’abai gara.

²¹Arbaɗi Filistrekai ɗa, Hebrekai zamai n’e yimi warɗi edi siɗi Izrayel par e ɗifu, aha war kaŋ ɗa lai, zamai edi par ɵimaɗi lai. E tiki piɗi e wiyisi piɗi ɗai na Izrayel n’e ɗa pini Sawul gaini Yonatan ɗa.

²²Ɗai na Izrayel n’e ŋûyi amai midini hlai zi huwuŋ na wiini Efrayim, won hlai n’e ɵini ɓa Filistrekai e ɗa luwi ɗa, e tiki futi piɗi, e hitimiɗi, e ɵiɗi baŋa siɗi kai sam.

²³EPIƊ-ƊAI a pliɗi ɗai na Izrayel ɗa edi war mefeŋ ni ɗa, e hili gai hatam haa Bet-Aven te hinaɗi ka piɗi ta.

²⁴War mefeŋ ni ɗa, ɗai na Izrayel e gdaŋɗi a vada vat, e siɗi wala n’e ziŋ ɗa kai, gawɗi e hiɵiɗi haɵ. Nɵa Sawul a miɗiɗi wiiɗi askarai na wiini buri e hi wala miɗi maini nɵa: Haw gara burini ɗif n’a suma li wuzani nuwiiɗi futi ɗa. Na ɓa mu rɗa amai midiɗi gawŋa kai ɗa, ɗif a suma kai. Woni par, ɗif nɵa, a tika wala mini kai sam.

²⁵Ɗai e cû edi arni jur n’abai, e nivi emel n’ami a na ca war hlai paŋ.

²⁶Won hlai na ɗai e cû arni jur n’abai, e tili emel n’ami a naka, amma ɗif ktai maa a tikaŋ mini kai, ɗai e hûni burini wala zi hi-mi n’e hiŋ ɗa.

²⁷Yonatan habar tini ɓa epini a miɗiɗi wiiɗi askarai buri e simi wala kai, gaini hini- mi pini nɵa habar tini kai. A wa miɗi amaraŋai na t'aŋ tini, a jiiba miɗi arni emel n’ami, asakal par a tika tini mini ta. Arni a tika pini a ŋala gai ɓili.

²⁸Nɵa ɗif ktai arbaɗi askarai e miɗini maini nɵa: Apuku a miɗiɗi wiiɗi askarai buri e hi wala miɗi ɓa ɗif n’a suma wala li girna ɗa, haw wiini. Paŋ ktai, ɗai gdaŋɗi a vada vat.

²⁹Apa a firya a kasi na ɗa a gir midini afti na wiimu ɗa. Tili won hlai na mu titima emel n’ami ma agwi, mu nava gdaŋ jek kai ɗi!

³⁰Na ɓa ɗai e simi fu der n’e niviɓsi piɗi gawɗi par ɗa, rɗi n’amai na wiiɗi a za fu na ɗa a suwa pra kai ɗi?

³¹E fiɗiɗisi Filistrekai a Mikmas par haa a Ayyalon ta. Askarai gdaŋɗi a vada ta,

³²e pûki sin wazagai zi der na krip aŋ mili. E mili adumai gaini haakai gaini ɵaakai gaini ali-ɵaakai lai, e ɵini wulani azumai midini afti, ɗai e simi war hlai na felni wazagai a ma warni dama.

³³Ɗai e hilisi e miɗini wiini Sawul: Ɗai e ɗa zi tuwur sin EPIƊ-ƊAI, e simi na ɗa war hlai n’e mi felni wazagai ɗa warni mal. Sawul a miɗiɗi: Tiki ki ɵini pin gadai ɗa kai. Liktiɓasi ahi-fuŋ n’abai ktai wuza na, tiyana tar.

³⁴Asakal par a muɗa: Zliri edi arbaɗi ɗai, ki miɗini wiini ɗif paŋ buri a kaŋasi ɵeŋ na wiini, zaw adumi na wiini zaw hiiki na wiini, a fiɗiti won na. Kapai asakal par ki simi, aga ki zi tuwur sin EPIƊ-ƊAI aŋ simi war hlai na fel a ma warni ɗa kai.

³⁵Sawul a rga gûwiŋ zi ɓaka ktai wiini EPIƊ-ƊAI. A gûwiŋ zi ɓaka na Sawul a rgiɓni wiini EPIƊ-ƊAI avut ɗa lai.

³⁶Sawul a muɗa: Cukuɗumu Filistrekai duvuk na. Haa gorof ta ɗa, mu vurmumu wazagaiɗi kafa, ɗif ktaia maa a hina pumu kai. Ɗai e miɗi: Za maini na tala arku pɗem ɗa ɵa. Nɵa pai zi ɓaka a muɗa: Hulumusi wuzni EPIƊ-ƊAI won na kafa.

³⁷Sawul a zilba dirini Alaw a miɗini Mu hala mu cikiɗi Filitirkai ɗi? Aga ku siɗi war tiɗi Izrayel ɗi. Mefeŋ ni ɗa a wiyini seŋ kai.

³⁸Sawul a muɗa: Hilisi sa na, tiki paŋ, tiki n’abakai na wiiɗi ɗai. Tuwur n’a za girna ɗa tiki ki siɗiŋ ya.

³⁹Gaini EPIƊ-ƊAI, n’a na kûrɗiɗi ɗai na Izrayel ɗa jaŋ, koo ɓa a za hanɗa a Yonatan n’ahiya maa, sai e fiɗiŋ edi. Arbaɗi ɗai ɗa, ɗif ktai n’a wiyini seŋ aŋ kai.

⁴⁰A miɗiɗi wiiɗi ɗai na Izrayel na gai hlaiɗi ɓa: Tiki ki ɗiyi war gal ktai par, ta gaini Yonatan n’ahiya mi ɗiyi war gal ktai lai. Ɗai e miɗini wiini Sawul, za maini na ku firyaŋ ɵa.

⁴¹Sawul a miɗini wiini EPIƊ-ƊAI maini nɵa: Alaw na wiiɗi Izrayel, siŋkiyi jre ɗa edi. Sawul gaini Yonatan ɗa wala a yimiɗi. Ɗai na Izrayel ɗa e zi wala na meefeŋ kai.

⁴²Sawul a muɗa, arba ta gaini Yonatan ɗa, piyi ɗif n’a za meefeŋ ɗa. Wala a yima Yonatan.

⁴³Sawul a miɗini wiini Yonatan: Muɗaɓa seŋ na ku zaŋ ɗa. Yonatan a miɗini: Gaini miɗi amaraŋai na t'aŋ ta ɗa, mu titima emel n’ami ma agwi. A pɗem ɓa mu nva fiɗi n’edi.

⁴⁴Sawul a muɗa: Yonatan! na ɓa girna ku nava fiɗi n’edi kai ɗa, Alaw a tikaŋa gir n’abai mada ta.

⁴⁵Ɗai e miɗini Sawul: Ku muɗa maɵa? Yonatan ɗa a fuɗa edi? Ni n’a sa rɗi n’amai n’abai hanɗa wiiɗi aliɗi Izrayel ɗa? A za duk kai zaŋ. Gaini EPIƊ-ƊAI jaŋ, ayir na midini ktai maa aga te kɵa azumai kai, buri ɓa a za na ɗa gaini Alaw.

⁴⁶Asakal n’a tika futi piɗi Filistrekai haa ɗa, Sawul a wayasi aha, Filistrekai ɗe e wiyi ahaɗi lai.

⁴⁷Won hlai na Sawul a suma pai midiɗi Izrayel nɵa ta ɗa, a hitima gaiɗi gawni war gal paŋ par. A hitima gaiɗi Mowabitekai, gaiɗi Ammonitekai, gaiɗi Edomitekai, gaiɗi paakai na Soba par, gaiɗi Filistrekai lai. Hlai n’a hala woni paŋ ɗa, sai a rɗa amai.

⁴⁸Mefeŋ zamai a siŋka spakni edi, a rɗa amai midiɗi Amalekekai, a pliɗi ɗai na Izrayel edi tiɗi nagai n’e virmiɗi ɗa par.

⁴⁹Alini Sawul na maɵagai ɗa a Yonatan, gaini Yisvi gaini Malki-Suwa. Alini na falakai na sulu ɗa, n’amai ɗa yikiɗi ɓa Merab, n’agwi ɗa, yikiɗi ɓa Mikal.

⁵⁰Munini yikiɗi ɓa Ahinowam, t'ahini Ahimas. Abaiɗi askarai na wiini yikini ɓa Abner, ahini Ner, na tawalni epini Sawul.

⁵¹Kis n’epini Sawul ɗa lai, Ner n’epini Abner ɗa lai e ɗi alini Abiyel.

⁵²Haa sin mrini Sawul ta ɗa, hatam na gaiɗi Filistrekai a nafu gdaŋ gara. Buri nɵa, ɗif n’a wa li gdaŋ, n’agulni ahuna kaalai ɗa, Sawul a talaŋ li tar a yimaŋ aŋ askarni tar tar.