Read Mousgoum 1 Samuwel 18 Bible Online

1 Samuwel 18 - Mousgoum bible

1 Samuwel 18

¹Won hlai na David a vada seŋni zi miɗi na gaini Sawul ta tar ɗa, Yonatan n’ahini Sawul a firya seŋni ta, a daraŋ maini sini nɵa.

²Sini mefeŋ ni par, Sawul, a bula midini David cok, a hinaŋ aŋ waya ahani epini kir kai.

³Yonatan a za bonu gaini David, buri ɓa a daraŋ maini sini nɵa.

⁴A wûti kaput na sini edi a sitini wiini David, gaini sapa na sini kaɵkar n wiini, ɓaraw na wiini gaini santir na wiini lai.

⁵Hlai paŋ na Sawul a ɵinaŋ li edi min hatam paŋ, David a hala paŋ, a rɗa amai lai. Sawul a tikaŋ aŋ abaiɗi ɗai zi hatam, ɗai paŋ e firyiŋ paŋ lai, haa siɗi ɗai n’ahani Sawul ɗa.

⁶Won hlai n’askarai e wiyisi li edi min hatam par, won hlai na David a fuɗasi Filistre ɗa su, a waisi aha ya lai, falakai e niyisi edi war fuŋ n’abakai par, gaini yama gaini didimi lai, mini pai Sawul, gaini gaŋga gaini liŋ-liŋi gaini gonjomai eziɗi lai.

⁷Falakai n’e zini yama piɗi marɗi, e yimiŋ wulaɗi marɗi maini nɵa: Sawul a fuɗa ɗai dubu ɗaw David a fuɗa ɗai dubu doogo

⁸Sawul a za hiy abai gara, seŋ hanɗa a sini firyi kai. A muɗa: Wiini David ɗa e sini dubu doogo doogo viya, wiya ta ɗa e siŋa dubu yaw bas! Agwiya e sitini ɗa te pai ɗa lai.

⁹Woni par, Sawul warni a hina sini David meefeŋ su.

¹⁰Dawaini ɗa, seze na meefeŋ n’Alaw a ɵinaŋsi ɗa a niya sini Sawul, a tika pini a jurla aha war dalamni, a za sini maini ɗif na mi Alaw ɵa. David a faka a ɵiɓa gaŋgraŋ maini n’avut par nɵa. Sawul a nafu gaiɗi kawaini tini ɗaw.

¹¹Sawul a yimiti kawaini amai a muɗa: Girna mu toka ka David amai sin hlai nɵa tok. Amma azi sulu, David a mula tini par,

¹²Sawul a tika pini a huuna David, bur ɓa EPIƊ-ƊAI a hina ni edi mak, a ɵasi pini gaini David par su.

¹³Sawul a zogo David edi wuzani arni par, a tikaŋ aŋ abaiɗi askarai na dubu ktai; David a hala edi min hatam gaiɗi ɗai ɗa, a waisi gaiɗi lai, edi wuzaɗi ta.

¹⁴Wala na David a yimaŋ li aŋ zi paŋ a za, buri EPIƊ-ƊAI a nafu gaini.

¹⁵Wonhlai na Sawul a tala ɓa David a na rɗa amai kureɗ ɗa, a bunda a hunaŋ ɗa a suwa pra.

¹⁶Amma ɗai na Izrayel gaiɗi na Yuda paŋ e diri David, buri ɓa a na hala edi gaiɗi min hatam a waisi aha gaiɗi lai.

¹⁷Sawul a miɗini wiini David: Tala ahiya n’amai, Merab ɗa, te na; aga mu sutuku aŋ muni, amma, za ɵeŋ na wiya gai gdaŋku paŋ, hitima hatam na wiini EPIƊ-ƊAI. Sawul a kataŋ gai warni na ɗa ɓa, mu fuɗaŋ ɗa mu ta kai, Filistrekai aga e fiɗiŋ wiiɗi.

¹⁸David a miɗini wiini Sawul: Ta m’a siya ktai ɗa? Pinziba na wiya a na wata ktai? Piɗi humuni na wiini apa aha war Izrayel ɗa a na wata ɗa? Na kapai mu bunda aŋ swuwulni pai ɗa?

¹⁹Mefeŋ na kapai e sitini Merab wiini David ɗa, e sitini wiini Adriyel, na Meola par.

²⁰Mikal n’ahini Sawul ɗa te firya David gara, ɗai e miɗi seŋ hanɗa wiini Sawul ta, a tala arni pɗem lai.

²¹Sawul a hiinaŋ warni ɓa a sitini li ɗa aga te bunda burini aŋ azaw, kapai Filistrekai e yimiŋ e fiɗiŋ. Azi sulu, Sawul a miɗini wiini David, tiyana ɗa aga ku za aŋ suwula.

²²Sawul a miɗiɗi wiiɗi ɗai n’ahani maini nɵa: Ki miɗini wiini David arbaki kiiki ɓa: Pai a fiyuku gara, ɗai n’ahani e durku lai. Nɵa tikiti ahini ɗa wiiku, kapai arbaki a ɗukla kir kai.

²³Ɗai n’ahani pai e miɗi seŋ hanɗa wiini David, David a wiyiɗi seŋ: Tikiti ahini pai, kapai ku za bonu gaini ɗa a wala zi dawaŋ karki ɗe? Ta ɗa mu ɗif na murga, na mu kiɗa wala ktai kai.

²⁴Ɗai n’abakai n’ahani Sawul e kinisi seŋ hanɗa wiini Sawul. E miɗi: David a muɗasi an na, an na.

²⁵Sawul a muɗa: Ki miɗini wiini David ɗa ɓa: Burini tiki ɗa, pai a firya ɗa a farai zi tiyi ɗa kai, firya ɗa a amur na min piɗi Filistrekai n’e ɗukliŋ edi aŋ gurgle ɗa, miya ɗaw bas, kapai a vurga meefeŋ na gawni e ziŋni ɗa. Sawul a firya ɗa ɓa David a kɵa war tiɗi Filistrekai kapai e yimiŋ.

²⁶Ɗai n’ahani e ki seŋ hanɗa wiini David. Bindi na bunda aŋ suwulni pai gaiɗi futi hanɗa ɗa, a yima hiinini David lai Wuzani mefeŋ n’e ɗiyiŋ zaw ɗa,

²⁷David a niya edi gaiɗi askarai na wiini, a fuɗa Filistrekai miya sulu, a ɗuklasi mini piɗi daf daf, a kiŋnisi wiini Pai. Ɗai e piɵiŋ edi, e niviŋ maini na pai a firyaŋ ɵa. Nɵa Sawul a sitini ahini na Mikal wiini David, David a bunda aŋ suwulni pai.

²⁸Sawul a tala haa ɗa, a sɗa ɓa EPIƊ-ƊAI a na gaini David. Amma Mikal n’ahini Sawul ɗa te firya David abai gara.

²⁹Sawul ɗa a huna David a suwa pra pra, Sawul a hina asakal par aŋ gawni David gamai.

³⁰Paakai na wiiɗi Filistrekai e niyisi edi aŋ hitimi gaiɗi ɗai na Izrayel ɵa kûreɗ-kûreɗ. E niyisi li edi paŋ ɗa, David a rɗa amai ɗa a sûwiɗi abakaiɗi askarai na wiini Sawul na zamai paŋ ɗa, yikini a tika pini a wa gara lai.