Read Mousgoum 1 Samuwel 19 Bible Online

1 Samuwel 19 - Mousgoum bible

1 Samuwel 19

¹Hiinini Sawul n’a firya ɓa a fuɗa David edi ɗa a miɗiŋni wiini Yonatan n’ahini gaiɗi ɗai n’ahani ɗa lai. Amma Yonatan n’ahini Sawul ɗa a firya David gara.

²Yonatan a miɗini seŋ hanɗa wiini David, a miɗini: Sawul n’apa a na paya futi aŋ fuɗuku edi. Mu siiwuku, gorof par ɗa, ku sumna gai jiɓi dam, ku paya baŋa ta, ku ŋoya suku cok.

³Ta aga mu niyaɗi edi, mu ɗiyaŋ ɵimani apa par zaw edi war hlai na ku ŋoya warni ɗa. Aga mu muɗa wiini apa gaiku, mu tala hiini n’aŋ warni ɗa, kapai mu muɗuku.

⁴Yonatan a muɗa seŋ na pɗem midini David, wuzani Sawul n’epini maini nɵa: Jaamus, ku za tuwur sini David na ɗifku kai, buri ɓa ni a za tuwur suku kai. Sdani na zaŋ paŋ ɗa, a zaŋ aŋ pɗem buriku;

⁵a hiina midini suŋfani dama kai, a fuɗa Filistre ɗa edi, EPIƊ-ƊAI a sa rɗi n’amai n’abai wiiɗi Izrayel gaini abaiɗi paŋ, Ku talaŋ gaini arku, ku firya lai. Tiyana aga ku za tuwur, ku ma felni ɗif na seŋ midini kai edi ɗa buri ma ɗa? Ku fuɗa David edi kadai meere ɗa, buri ma ɗa?

⁶Sawul a yima seŋ na wiini Yonatan, a ha wala mini a muɗa: Gaini EPIƊ-ƊAI jaŋ, David a fuɗa edi kai.

⁷Yonatan yika David, a virnini seŋ hanɗa paŋ. Asakal par, Yonatan a kasi David sini Sawul. David a waya war sdani n’a naka a zaŋ avut par ɗa pra.

⁸Hatam a waya a tika pini katawai pra, David a niya edi aŋ hitimiɗi Filistrekai. A fiɗiɗi fiɗi na tuwur gara haa e pri edi wuzani.

⁹Mefeŋ ktai, EPIƊ-ƊAI a ɵinasi seze na meefeŋ a niya sini Sawul, a nafu amlai war dilimini dam, kawai na wiini tini ɗaw lai. David a nafu aŋ ɵiɓa gaŋgraŋ na wiini.

¹⁰Sawul a firya a toka David amai sin hlai gaini kawaini tok, David a kota miɗi kawai na wiini Sawul ɗa par, ta hala te ŋala amai sini hlai kas. David a prasi edi gai luwi, duvuk ni he, a ka sini war hlai zamai.

¹¹Sawul a ɵina ɗai ahani David duvuk, buri e tiki hangalɗi sini, e hiniŋ a pra edi kai, kapai gorof par ɗa e fiɗiŋ. Nɵa Mikal na munini te miɗini: Na ɓa duvuk na, ku ka suku kai ɗa, dawai ɗa, ku ɗif na gai mri su.

¹²Nɵa te waɓsi azumai arni fenetir ɗa ɗaw, David a ka sini, a pra edi. A pra edi ɗa mai hanɗa ɵa.

¹³Asakal par Mikal te tika alaw zi rgi ktai, te fanaŋ azumai war walani zi feŋ ɗa waŋ, te wasi ayirni haakai na murɗek amai par ɗik, mai aryir na midini ɗif ɵa, te wiini sapa sini ɗik lai.

¹⁴Won hlai na Sawul a ɵina ɗai buri e yimisi David ɗa, te muɗa: A na veglek.

¹⁵Sawul a wiyiɗi katawai aŋ tiliŋ. A miɗiɗi: Ki tikiŋsi gaini walani zi feŋ ɗa paŋ, kapai mu fuɗaŋ edi.

¹⁶Ɗai n’e ɵiniɗisi ɗa e wiyisi, alaw zi rgi ɗa a nafu midini wala zi feŋ ɗa waŋ, gaini ayirni haakai na murɗek amai par midini ɗik lai.

¹⁷Sawul a miɗiɗi wiiɗi Milka: Ku duulaŋa buri ma ɗa? Gawɓa ku hinaŋ a hala, a pra edi ta lai buri ma ɗa? Mikal te miɗini wiini Sawul. A muɗaŋa ɓa mu hinaŋ a hala, ɵa kai ɗa aga a fuɗaŋa.

¹⁸David a pra edi, a ka sini ɗa mai hanɗa ɵa. A hala sini samuel war Rama, a miɗini seŋ na Sawul a ziŋni ɗa kafa. Asakal par, gaini Samuwel li e hili e simni war Naiot.

¹⁹Da e hilisi e miɗini wiini Sawul ɓa David a n’a Naiot, gobi gaiɗi Rama.

²⁰Sawul a ɵina ɗai pini David aŋ yimiŋsi. E niviɗi firiɗi ɗai na min Alaw, war seze na wiiɗi ɗai na min Alaw, Samuwel wuzaɗi su. Seze na wiini Alaw a niya siɗi ɗai na Samuwel a ɵiniɗi ɗa, e tipi gaiɗi ɗai na min Alaw war seze na wiiɗi ɗai na min Alaw lai.

²¹Ɗai e hilisi e miɗini wiini Sawul ta, a ɵina ɗai zamai, nagai lai e niyi war seze na wiiɗi ɗai a min Alaw. A ɵina vok zamai azi n’ag'aŋ hu, nagai lai e niyi war seze na wiiɗi ɗai na min Alaw.

²²Nɵa Sawul gaini midini dama a hala war Rama. Won hlai n’a co miɗi kiliŋi n’amai na t'aŋ war Sekou, a zilba a muɗa: Samuwel gaini David ɗa e ɗa wata ɗa? Ɗai e miɗini: E ɗa a Naiot, gobi gaiɗi Rama.

²³Woni par, a hala war Naiot na war Rama, Seze na wiini Alaw a niya sini ni lai, a hala gai Seze hanɗa ɵa haa war Naiot na war Rama ta.

²⁴Ni lai faka sapa na sini edi, a niya war seze na wiiɗi ɗi na min Alaw wuzani Samuwel lai. A kɵa azumai, a hina arni gai pi azumai duk, ganala, a yiva, a fana. Buri nɵa, ɗai e zilbi siɗi ɓa: Sawul ɗa a na arbaɗi ɗai na min Alaw lai ɗi?