Read Mousgoum 1 Samuwel 2 Bible Online

1 Samuwel 2 - Mousgoum bible

1 Samuwel 2

¹Anna te siiwa te muɗa: Barkani EPIƊ-ƊAI agula te va gaini firiya, Barkani EPIƊ-ƊAI ara a kiɗa a yima amai, Mu kiɗa mu riya maini na mu dara ɵa wuzaɗi gawŋa, EPIƊ-ƊAI a plaŋasi edi, M'aŋ war firiyi.

²Ɗif na sɗik maini EPIƊ-ƊAI ɵa aŋ kai, sai ku tuku ktai, na zamai aŋ kai, ɗif n’a giɗimiyi maini Alaw na wiyi, n’a huwuŋ na wiyi nɵa aŋ kai.

³Ki miɗi seŋ zi kûlûni-si viya viya kai, ki hini seŋ zi kûlûni-si a niyasi edi war mini par kai, buri EPIƊ-ƊAI a Alaw n’a sɗa wazagai paŋ, sda na mu zuŋmu paŋ ɗa, ni a sɗa pɗemni gaini meefeŋ ya.

⁴Taŋ na wiiɗi ɗai zi hatam a haɗa ɓaw, nagai n’e ɗika e kiɵiŋi ɗa, e nivi gdaŋ a suwa pra,

⁵Nagai n’e ɗika gaini vi ca ɗa, e piyi wala na e nivi simi gaini, amma nagai n’e ɗika gaini wiyamai ɗa, siɗi amla. Muni na muɗaŋ ɗa te wa ali azi muguzak, na na te naka gaiɗi ali viya ɗa, gdaŋɗi a vada.

⁶EPIƊ-ƊAI a kiɗa a fuɗa ɗif edi, a kiɗa a hinaŋ karni lai, a kiɗa a ka ɗif azumai war hlai zi simni na wiiɗi zi mri, a kiɗa a ɵiyasi ɗif amai lai.

⁷A kiɗa a za ɗif murga, a kiɗa a zaŋ aŋ ɗif zi farai lai. A kiɗa a hosa ɗif azumai, a kiɗa a yimaŋ amai lai.

⁸Azumai arni alogodo par a yimasi ɗif na huruf ɗa amai, azumai arni ziligit par a yimasi na murga ɗa amai lai, a siɗi balamɗi arbaɗi ɗai n’abakai, a siɗi aŋ Paramai zi pai na zuf aŋ bulum lai. Buri ɓa, Gaarakai n’aŋ gaini pi piɗi yai ɗa a wiini EPIƊ-ƊAI. A tikiti duniya ɗa amai midini.

⁹Nagai n’e sini hormo ɗa, hlai n’e tiki eziɗi woni ta ta ɗa, arni aŋ midiɗi, amma nagai na maafanai e bi edi warni gegeŋ, buri ɓa ɗif aga a rɗa amai ɗa gaini gdaŋ na wiini ɗa kai.

¹⁰Nagai n’e piyi mini EPIƊ-ƊAI paŋ aga e kirpi azumai, amai war hlai n’amai par aga a ɓiriɗisi gaini faŋ n’abai. EPIƊ-ƊAI aga a ɗukuliti sariya haa edi warni koŋɗi yai na puɗu paŋ. Aga a sini spak wiini pai na wiini, aga a sini kol wiini ni n’a ma emelni na e tiki ɗai war sda gaini midini ɗa.

¹¹Ekana a waya ahani war Rama, amma arwagwi a hina aŋ za sda burini EPIƊ-ƊAI gaini Eli na pai zi ɓaka ɗa.

¹²Alini Eli ɗa e ɗi ɗai na hangalɗi meefeŋ, e siɗi EPIƊ-ƊAI kai,

¹³Paakai zi ɓaka hanɗa, e zi siɗi ɗai maini nɵa: Won hlai na ɗif a za ɓaka li paŋ ɗa, ɗif zi sda na wiini pai zi ɓaka ɗa, a halasi sarti n’e di neŋ ɗa, gaini wala ktai n’a ɓula neŋ gaini na mini hu tini ɗaw,

¹⁴A ɓulasi neŋ gaini avu war gdelaŋ ɗa par warni dokna par, warni burma par lai, neŋ paŋ na wala a ɓulaɓsi li ɗa, a wiini pai zi ɓaka. E zi maini hanɗa ɵa siɗi aliɗi Izrayel paŋ n’e hilisi li war tempel a Silo ɗa.

¹⁵Wuzani hlai n’emel na warni waa n’e fiɗiŋ ɗa a ya kai hai, ɗif zi sda na wiini pai zi ɓaka ɗa a halasi a miɗini wiini ni n’a za ɓaka ɗa maini nɵa: Sinisi neŋ wiini pai zi ɓaka ɗa kapai a reraŋ, buri a firiya neŋ na tuku ku daŋ ɗa kai, sai ku sini ɗa a neŋ na gaini di kai ɗa.

¹⁶Na ɓa ɗif a miɗini li ɓa: Baia agwi e yi emel haw, kapai asakal par ku tika neŋ na ku firiyaŋ wiiku ɗa. Ɗif na wiini pai zi ɓaka ɗa a waya seŋ maini nlza: Zaw kai, ku saŋsi tiyana tiyana tar, ɵa kai ɗa, mu tikaŋ gaini gdaŋ lai.

¹⁷Tuwur na wiiɗi aliyagoi hanɗa a za arni EPIƊ-ƊAI abai gara ta, buri ɓa e sini hormo wiini ɓaka na wiini EPIƊ-ƊAI kai.

¹⁸Samuwel a faɗa sapa Efod zi leŋ sini, a za sda wuzani EPIƊ-ƊAI.

¹⁹Buza buza paŋ, emini te ɓlini sapa ktai ɗawwa yawwa, te kiŋni tiɗi won hlai n’e hili amai a Silo gaini mofoɗi aŋ zi ɓaka na war buza dam ɗa.

²⁰Ei a ɓaka Elkana gaiɗi munini a muɗa: A zuva ɓa EPIƊ-ƊAI a suku ali gaiɗi muni hanɗa, kapai e hini ezini arwagwi na ki zilbiɓsi wiini EPIƊ-ƊAI hanɗa. Asakal par, e wiyi wiiɗi aha war dalamɗi.

²¹EPIƊ-ƊAI a luwiiɗi ɗuwal wiiɗi Anna, te wa ali na maɵagai zamai hu, na falakai sulu lai. Samuwel ɗa a za abai sek sek wuzani EPIƊ-ƊAI.

²²Eli a za wel gara ta, a ɵina labarni sda n’alini e ɗa ziŋ wiiɗi ɗai na Izrayel gai hlaiɗi paŋ ɗa, a ɵina ɓa e ɗa fini gaiɗi falakai n’e hilisi buri e zi sda n’a sa tiɗi, mini Gumu n’e nivi gaini EPIƊ-ƊAI woni ɗa lai.

²³A miɗiɗi: Tiki ki zi sda na mai hanɗa ɵa buri ma ɗa? Sdaki na meefeŋ ɗa, ɗai paŋ e ɗa miɗi gaini.

²⁴Kai, aliya, na mu na ɵinaŋ miɗiki na ɗa, a pɗem kai, aga ki kiɗi ɗai na wiini EPIƊ-ƊAI aŋ hi amai midini gadai ɗa koo!

²⁵Na ɓa ɗif a za tuwur sini maini na zamai ɗa, Alaw aga a ɗiya arbaɗi aŋ ɓirwiɗi edi; amma na ɓa ɗif a za tuwur sini EPIƊ-ƊAI-DAI ɗa, n’aga a ɓirwiɗi arbaɗi ɗa asiya ɗa? E diri e ɵini seŋ na wiini epiɗi ɗa kai, Buri EPIƊ-ƊAI a firya a fiɗiɗi edi.

²⁶Samuwel ɗa a wula amai wuzani sek sek; payaini a nafu arni EPIƊ-ƊAI pɗem, arɗi ɗai pɗem lai.

²⁷Ɗif na wiini Alaw ktai a halasi sini Eli a miɗini: EPIƊ-ƊAI a na muɗa maini nɵa: Won hlai na tiyakaiku e ɗisi ka aŋ bagakai war Egipte pini Faraw ɗa, mu siŋka sa arɗi kai ɗi?

²⁸Arbaɗi pinziba na war Izrayel paŋ, mu viriɗi aŋ kapai e zi sda zi paakai zi ɓaka na wiya, kapai e hilisi e zi sda min gûwiŋ zi ɓaka na wiya, e yi wazagai zi ɗûgûdi zi lûgûzi, e wi sapa zi sda na Efod ɗa siɗi won hlai n’e hilisi wuza, mu sa pinzibani ɓaka na wiiɗi aliɗi Izrayel paŋ war tini tiyku Aaron, gaini ɓaka n’e yiŋ edi gaini afu ɗa lai.

²⁹Ɓaka na mu miɗiɗi wiiɗi ɗai buri e ziŋa wiya gaini wazagai n’ezini puɗu puɗu gaini na gaini ali seyem lai, ki sini hormo kai ɗa buri maɗa? Ku siɗi hormo wiiɗi wiiɗi aliku a suwiɓa ta buri ma ɗa? Ki liki siki gaini neŋ na pɗamai na ki miliŋ pin ɓaka n’aliɗi Izrayel na ɗaiɓa e ziŋ par ɗa buri maɗa?

³⁰Nɵa ɗa, Epiɗ-ɗai Alaw na wiiɗi Izrayel a na muɗa maini nɵa: Ɗai mu muɗa ɓa: Pinzibaku, pinziba na wiini apuku aga ki hini wuza sala gamai. Amma tiiyana ɗa, EPIƊ-ƊAI a na muɗa maini nɵa- duk kai zaŋ! Buri ɓa, ni n’a saŋa kol ɗa, aga mu sini kol lai, amma nagai n’e miisiɓa ɗa, aga e bindi aŋ wala kadai.

³¹Hlai aga a halasi, war mefeŋ ni ɗa aga mu vidiɗi nagai na gdaŋai blaŋ blaŋ na war pinzibaku gaini pinziba na wiini wiini apuku lai edi. Ɗai na walakai aga e hini war pinzibaku kir kai.

³²Aga ku hina war hunai ɵa kureɗ. Ɓuriɗi ɗai na Izrayel na gaini abaiɗi ɗa, wala na meefeŋ aga a za kai; ɗif na wel nɵa aga a hina war pinzibaku kir kai zaŋ.

³³Pinzibaku aga mu ɓurwa edi gaiɗi kai. Ɗif ktai aga a hina aŋ za sda midini gûwiŋ zi ɓaka na wiya ɵa, amma ɗif ni ɗa, aga a yiyipuku arku tin tuwi, a vada gdaŋku edi gaini sdani na maafanai lai. Amma nagai paŋ n’e kiɗi e si hormo wiini pinzibaku ɗa, ɗai aga e fiɗiɗi edi gaini kaɵkar.

³⁴Wala zi siŋki n’aga a za suku a na wiiɗi aliku na sulu, Pinas gaini Hofni ɗa. Nagai sulu paŋ aga e mri war mefeŋ ktai.

³⁵Aga mu navasi pai zi ɓaka na jre; n’aga a za paŋ maini n’agula a dara nɵa, maini na suŋfaɗi agula a dara nɵa lai. Aga mu sini pinziba na gai hangalɗi, aga e zi sda zi paakai zi ɓaka gaini pai n’aga mu varaŋ ɗa.

³⁶Ɗif na war pinzibaku par n’a hina li karni ɗa, aga a halasi a hurga azumai wuzani pai zi ɓaka hanɗa aŋ zilbaŋ buri a sini sulai zi arzaŋ ktai zaw a sini wala zi simi; aga a miɗini lai ɓa: Za barka, tikaŋa war sda na wiini pai zi ɓaka ktai ta, kapai mu nava wala zi simi ma agwi kai ɗi!