Read Mousgoum 1 Samuwel 20 Bible Online

1 Samuwel 20 - Mousgoum bible

1 Samuwel 20

¹David a prasi edi war Naiot na war Rama par. A hala sini Yonatan a miɗini: Na mu za ɗa a ma ɗa? Meefeŋŋa ɗa ɗa a ma ɗa? Tuwur na mu zaŋ sini apuku ɗa a na wata ɗa? Na kapai a paya aŋ ɓa suŋfaŋa burini ɗa?

²Yonatan a wiini seŋ: A za kai, ku kiɗa aŋ nava mri kai. Wala n’apa a dara a zaŋ paŋ a muɗaŋa gaini ta, ta; kapai seŋ hanɗa a ŋoyaŋ wuza ɵa maɵa maɵa ɗa? A kiɗa a za ɵa kai.

³David a ha wala mini a muɗa: Apuku a sɗa edi gaglai ɓa ku daraɓa gara, a hiinaŋ warni na ɗa ɓa a pɗem ɓa Yonatan a ɵina seŋ hanɗa kai, kapai a niya war marava kai. Amma gaini EPIƊ-ƊAI jaŋ, gaiku tuku jaŋ lai, arba gaini mri ɗa, a hina a wala n’agwi kadai.

⁴Yonatan a miɗini wiini David: Ku firya ɓa mu za buriku ɗa a ma ɗa?

⁵David a wiyini seŋ: Dawai ɗa a merfeŋ tile, kadai tiɓ mu sumna ɗa ɵimani pai gobi aŋ suma; amma hinaŋa mu hala, mu ŋoya sa edi war basga cok, haa mefeŋ sulu, haa koskoi na wiini mefeŋ n’ag'aŋ sulu ta.

⁶Na ɓa apuku a tala li ɓa m’aŋ kai, a zilbaɓa li ɗa, ku miɗini ɓa: David a siika ma gara, ɓa mu sini futi a hala a Betlehem, fuŋni n’abai ɗa, buri piɗi humuni na wiini paŋ e ɗa gaini ɓaka, n’a za war buza, buza, war hlai hanɗa.

⁷A muɗa li ɓa: "Seŋ aŋ kai" a siŋka ɓa ta na ɗifku mu huna wala na meefeŋ kir kai, na ɓa a faka li gaini hiy ɗa, a siŋka ɓa a firya a ɓa suŋfaŋa.

⁸Siɓka jreku edi sa ta, buri ɓa ku za bonu zi marmai gaya, war yikini EPIƊ-ƊAI ta. Na ɓa meefeŋŋa ktai a na ɗa, tuku dama, fuɗaŋa. Ku saŋa tini apuku tetew buri ma ɗa?

⁹Yonatan a miɗini: A za kai. Na ɓa mu sɗa fu edi gaglai ɓa apa a rga warni buri a ɓa suŋfaku ɗa, a jre jaɓ aga mu muɗuŋku ya.

¹⁰David a miɗini wiini Yonatan: Ɗif n’aga a muɗaŋa ɗa asiya ɗa, na ɓa apuku a wuyuku seŋ li gaini wule na pɗem kai ɗa?

¹¹Yonatan a miɗini wiini David: Halasi hulumu edi basga sek. Gai suliɗi e yimisi siɗi edi war basga sek.

¹²Yonatan a miɗini wiini David: Gaini EPIƊ-ƊAI, Alaw na wiiɗi Izrayel ɗa jaŋ, dawai zaw, kobok, ler mai hanɗa ɵa ɗa, aga mu titima hiini na wiini apa ɗa. Na ɓa seŋ na meefeŋ aŋ kai ɗa, aga mu ɵinaɗi ɗif kai.

¹³Amma na ɓa a dara a zuku meefeŋ, na ɓa mu ɵinaɗi ɗif suku kai ɗa, EPIƊ-ƊAI a zaŋa nɵa lai, nɵa lai. Aga mu ɵinaɗi ɗif suku su, kapai ku hala jam, EPIƊ-ƊAI a za gaiku maini n’a za gaini apa ɗa nɵa.

¹⁴Na ɓa m’aŋ kara hai ɗa, ku za pɗem sa maini n’EPIƊ-ƊAI a zaŋ sa ɗa nɵa, aga mu mra kai.

¹⁵Ku hina pɗemku na ku zaŋ sini pinzibaɓa kai, koo na ɓa EPIƊ-ƊAI a vidiɗi gawni David paŋ edi midini afti par tekeɗeɗi.

¹⁶Yonatan a za bonu gaini pinzibani David -a zuva ɓa EPIƊ-ƊAI a wiyiɗi meefeŋ na wiiɗi gawni David ɗa midiɗi.

¹⁷Yonatan a miɗini wiini David buri a ha wala mini pra, midini marmai na te na arbaɗi, buri a daraŋ maini sini nɵa.

¹⁸Yonatan a miɗini: Dawai ɗa a merfeŋni tile, ɗai aga e siɗi ɓa k’aŋ kai, aga a fiɗiɗi siɗi lai; buri ɓa balamku aga a hina kadai su.

¹⁹Kobok ɗa, ku hala war hlai na ku ŋoya ka warni ɵa ɗa, ku ɗiya ɵimani ahi-fuŋ Ezel ɗa zaw.

²⁰Aga mu ɵiɓaɗi ɓaraw hu, war gal hanɗa sek, mai na ɓa mu ɗigira ɗa a wala ktai ɵa.

²¹Nɵa aga mu ɵinaɗi arwagwi aŋ mulaŋsi. Aga mu miɗini ɓa hala mulaŋasi ɓaraw ɗa. Na ɓa mu miɗini li ɓa: Ɓaraw ɗa a na azumai wuzaku gobi, mulaŋsi ɗa, ku halasi, hlai a na pɗem, gaini EPIƊ-ƊAI jaŋ, ku huna kai.

²²Amma na ɓa mu miɗini li wiini arwagwi ɓa: Ɓaraw ɗa a na edi wuzaku sek ɗa, hala wiiku, EPIƊ-ƊAI a dara a suku puku edi lai.

²³Amma seŋ na mu muɗuɓmu arbamu ɗa, EPIƊ-ƊAI a zaida arba gaiku tuku, ɵa haa kureɗ.

²⁴Nɵa David a hala a ŋoya edi war basga cok. Merfeŋ tile ɗa a cosi li, pai a sumna azumai aŋ suma.

²⁵Pai a sumnasi midiɗi kuɗusini, maini n’a na zaŋ kureɗ ɗa nɵa, sini gai ɵi amai sini hlai su. Yonatan a faka amai, Abner a sumnasi ɵimani Sawul dam, amma balamni David ɗa a nafu kadai su.

²⁶Mefeŋ ni ɗa, Sawul a muɗa seŋ kai, a hiina ɗa ɓa Wala ktai n’a navaŋ a na, a na hilu kai ɗi. A jre a na hilu kai ɗi.

²⁷Mefeŋ n’ag'aŋ sulu na wiini merfeŋ tile ɗa, balamni David ɗa, sini kadai su ɵa. Sawul a miɗini wiini Yonatan n’ahini: Ahini Isai ɗa a halasi aŋ simi a ɗibi kaalai, girna kaalai ɗa buri ma ɗa?

²⁸Yonatan a wiyini seŋ wiini Sawul: David a siika maa haa, ɓa a hala fu a Betlehem.

²⁹A muɗa: A zilbaɓa ɓa mu hinaŋ a hala e ɗa gaini ɓaka na wiini pinzibaɗi woni, tawala a yikaŋasi ɓa mu sumna warni; na ɓa mu nava yim li wuzani arku ɗa, saŋa futi, aŋ hala witaw buri mu tiliɗi tawalakaya. A halasi aŋ suma gaini pai kai na ɗa buri hanɗa.

³⁰Sawul a faka gaini hiy sin Yonatan a miɗini: Ahiɗi hirgai! Mu siɗa ɓa ku ɵa puku na ɗa pini ahini Isai ɗa par. A siyer na muduku, a siyer na midiɗi amuku lai.

³¹Buri ɓa, na ɓa, ahini Isai ɗa aŋ karni midiɗi yai ɗa, aga ku nava muduku kai, tuku kaalai, paiku kaalai. Tiyana ɗa, ɵina ɗai pini aŋ yimiŋsi, kiŋasi won na, sai a fuɗa edi.

³²Yonatan a wiyini seŋ wiini sawul n’epini: E fiɗiŋ edi tiɓ buri maɗa? A za ɗa a ma ɗa?

³³Sawul a tikitisi kawaini a firya a haŋ gaiɗi. Nɵa a yima midini Yonatan ɓa epini a firya ɓa sai a fuɗa David edi.

³⁴Yonatan a fakaɗi sini simi par gaini hiy n’abai, yivai na te g'aŋ sulu na wiini merfeŋ tile ɗa, a dara a suma wala kai, a nafuwar marava burini David, buri tirki n’epini a tirkaŋ ɗa lai.

³⁵Gorof par war yivai na te g'aŋ hu, Yonatan a hala edi war basga. Pin miɗi n’e kitiŋ arbaɗi gaini David, arwagwi n’agwi pini su lai.

³⁶A miɗini wiini arwagwi maini nɵa: Za barka, ku lawa, ku mulaŋasi ɓaraw n’aga mu ɵiɓaɓɗi ɗa. Arwagwi a lawa, Yonatan a ɵiɓiti ɓûrwi ktai, te suwaŋ edi.

³⁷Won hlai n’arwagwi a co war hlai na ɓûrwi na Yonatan a ɵiɓiti te pa warni ɗa, Yonatan a ɗuulaɗi pini par maini nɵa: Ɓûrwi te na edi wuzaku sek.

³⁸A ɗuulaŋ ɗi katawai pra: Witaw, kokolai kokolai, ku yima azuku kai. Arwagwi a tikitisi ɓûrwi, a waisi sini epin-gezani.

³⁹Arwagwi ɗa a sɗa wala ktai war seŋ hanɗa kai, a ɵina seŋ hanɗa a Yonatan gaini David kiiɗi.

⁴⁰Yonatan a sini ɓarawni gaini gloŋni tini arwagwi ɗa ca, a miɗini: Kaŋɗi aha sek!

⁴¹Won hlai n’arwagawi a halasi li aha ɗa, David a fakasi amai, war gal n’amai par, a bula sini azumai, a hurga azumai haa azi hu. David gaini Yonatan e kɵi amai wulaɗi marɗi, e tuwi piɗi marɗi, haa tuwi na wiini David a dara a suwa pra.

⁴²Yonatan a miɗini wiini David: Hala jam, hina muduku a wula gaini bonu zi marmai na mu zuŋmu gaiɗi marmu ɗa kai, buri mu zuŋmu war yikini EPIƊ-ƊAI. EPIƊ-ƊAI a sumna arba gaiku tuku, arbani pinzibaɓa gaini pinzibaku lai haa kureɗ.