Read Mousgoum 1 Samuwel 22 Bible Online

1 Samuwel 22 - Mousgoum bible

1 Samuwel 22

¹David a halaɗi woni par, a sumna edi warni waŋ na sin huwuŋ n’Adullam. Tawalakaini gaiɗi zagalakaini paŋ e ɵini labar hanɗa, e tiki futi pini edi woni.

²Ɗai n’e ɗa war gir paŋ, na hlai a hala siɗi kai, na gaini tumuŋ midiɗi, n’e ɗa war agul zi divi lai, e tipisi sini paŋ. David a bunda aŋ abaiɗi; ɗai ɗa e zi gobi miya puɗu ɗi.

³Woni par, David a hala war Mitspa na wr Mowab. A miɗini wiini pai na Mowab: Hina pa gaiɗi ama e zugusi wiiɗi ahaki na, haa wala n’EPIƊ-ƊAI a dara a zaŋ buriya ɗa a yima mada kai haw kai ɗi!

⁴A kiɗi sini pai na Mowab ɗa, mefeŋ na David a zaŋsi edi warni waŋ taha ɗa, e hinisi woni ɵa.

⁵Gad, ɗif na min Alaw a miɗini wiini David: Suku won na ɵa dam kai, waya aha midini afti na Yuda. David a faka woni par, a hala edi arbani jur na Heret.

⁶Sawul a ɵina ɓa labarni David gaiɗi ɗaini ɗa aŋ tiɗi ɗai kap. A Gibeya, Sawul a sumna azumai pin luwuŋ Tamaris dam, kawaini tini ɗaw, a sumna amai midini hlai na boŋor, ɗai n’ahani paŋ e simni ɵimani ca ca.

⁷Sawul a miɗiɗi: Mu siiwiki, tiki pinzibani Benyamin, ɵini pɗem, ahini Isai ɗa aga a siki vowai lai, luwuŋ zi vin lai gai hlaiki paŋ ɗi? Aga a tikiki aŋ abakaiɗi askarai na dubu gaiɗi na miya lai ɗi?

⁸Na ɓa ɵa kai ɗa, ki tipi miki gaiɗi, buri ma ɗa? Bonu n’ahiya gaini ahini Isai e ziŋ arbaɗi ɗa, ki wi piki sa kai sam ɗa buri ma ɗa? Ktai arbaki n’a zaŋa zaida, zaw n’a hiina haw buriya n’a muɗaŋa ɓa ahiya a na zini pini ɗifŋa zi sda aŋ faka amai sa, kapai a riɓtaɓa lai aŋ kai ɗa buri ma ɗa? Girna a za an na kir ka.

⁹Doeg na Edom par, n’abaiɗi ɗai na wiini Sawul, a waya seŋ: Mu siɗa ahini Isai ɗa a halaɗi a Nob, sini Ahimelek n’ahini Ahitub.

¹⁰Ahimelek a zilba dirini EPIƊ-ƊAI burini, a sini wala zi simi, a sini kaɵkar na wiini Goliat na Filitir ɗa ta lai.

¹¹Pai a ɵina ɗai sini pai zi ɓaka Ahimelek n’ahini Ahitub, gaiɗi tamaini paŋ, a dara muɗa paakai zi ɓaka na war Nob ɗa. E hilisi sini pai gai hlaiɗi paŋ.

¹²Sawul a muɗa: Mu siiwuku ahini Ahitub, ɵina pɗem! A waya seŋ a muɗa: A na ɵa, epin-geza.

¹³Sawula a miɗini: Tuku gaini ahini Isai ɗa, ki rgi warki amai mada ɗa buri ma ɗa? Tuku ku sini peŋ lai kaɵkar lai, ku zilba dirini Alaw burini lai, kapai a faka amai sa, a riɓtaɓa lai ɗa buri ma ɗa? -A za girna na ɗa a wala hanɗa.

¹⁴Ahimelek a wiyini seŋ wiini pai: Jaamus arbaɗi ɗaiku zi sda ɗa, ɗif na jre warni maini David ɵa a na ɗi? Ni ɗa a suwulku, a abaiɗi ɗaiku zi gɗam ɗa lai, a ɗif na ɗai n’ahaku paŋ e sini hormo lai.

¹⁵Mu tika pa aŋ zilba dirni Alaw buini ɗa girna hai ɗi? A na ɵa kai. Pai, seŋ hanɗa, ku tikaŋa mada kaalai, midini ktai arbaɗi tamakaiya kaalai. Buri ɓa seŋ n’aŋ tuku na ɗa, mu siɗa wala ktai warni kai.

¹⁶Pai a muɗa: Ahimelek, tuku gaiɗi tamaiku ɗa, sai ki nivi fiɗi n’edi.

¹⁷Pai a miɗiɗi wiiɗi askarai zi gɗam na wiini n’e ɗa ɵimani: Hili, fiɗiɗi paakai zi ɓaka na wiini EPIƊ-ƊAI ɗa edi, buri ɓa nagai lai e luwiini ɗuwal wiini David, e siɗi ɓa a pra ɗa a pri edi, amma e miɗiŋa kai. Amma ɗai na wiini pai ɗa e diri e tiki tiɗi siɗi paakai zi ɓaka na wiini EPIƊ-ƊAI aŋ fiɗiɗi edi kai.

¹⁸Nɵa pai a miɗini wiini Doeg: Hala, fiɗiɗi paakai zi ɓaka ɗa edi. Doeg na Edom par a hala; a fiɗiɗi paakai zi ɓaka ɗa edi a ni gai tini mal, mefeŋ ni ɗa, a fuɗa ɗai n’e wi sapa zi sda zi leŋ siɗi e zi doogo doogo mitwis pi ɵim.

¹⁹A vidiɗi ɗai a war Nob, fuŋ n’abai na wiiɗi paakai zi ɓaka ɗa edi. Falakai gaiɗi maɵagai, aliyagoi gaiɗi akoɗokokai, ɵaakai, ablehökai, adumai, haakai, paŋ e vidiŋ edi gaini kaɵkar.

²⁰Arbaɗi alini Ahimelek n’ahini Ahitub ɗa a kurɗa piɗi par a ɗif ktai pal; yikini ɓa Abiyatar. A pra edi, a tika futi pini David.

²¹Abiyatar a miɗini wiini David ɓa: Sawul a fiɗiɗi paakai zi ɓaka na wiini EPIƊ-ƊAI ɗa edi ca.

²²David a miɗini Abiyatar: Mefeŋ ni ɗa, Doeg na Edom par, a nafu dam, mu sɗa edi gaglai ɓa aga a ka eɵes wiini Sawul bas, tiyana tamaiku paŋ e nivi mri na ɗa buriya ta.

²³Sumna gaya, ku huna kai, ni n’a paya aŋ fuɗaŋa edi ɗa, a firya a fuɗuku tuku lai. K'aŋ ɵia dam ɗa, wala ktai na meefeŋ aga a za suku kai.