Read Mousgoum 1 Samuwel 23 Bible Online

1 Samuwel 23 - Mousgoum bible

1 Samuwel 23

¹Ɗai e kinisi labar wiini David ɓa, Filistrekai e ɗa hitimiti Keila, e ɗa virmi wazagaiɗi zi simi n’a hina tiɗi agwi agwi ɗa lai.

²David a zilba dirini EPIƊ-ƊAI a muɗa: Mu kiɗa mu hala ɗi? Aga mu rɗa amai midiɗi Filistrekai hanɗa ɗi?

³Amma ɗai na wiini David e miɗini: Aha war Yuda na ɗa maa, hunai pumu ta, azi gama ɗa, na ɓa mu hulumu war Keila aŋ hutumumu gaiɗi Filistrekai ɗa?

⁴David a zilba dirini EPIƊ-ƊAI pra, EPIƊ-ƊAI a wiyini seŋ: Hala a Keila, buri aga mu siɗi Filistrekai war tuku.

⁵David gaiɗi ɗaini e hili war Keila. A faka hatam gaiɗi Filistrekai, A mulasi farai na wiiɗi, a fiɗiɗi fiɗi na meefeŋ gara. David a kûrɗiɗi ɗai na Keila ɗa edi mai hanɗa ɵa.

⁶Won hlai n’Abiyatar n’ahini Ahimelek a pra edi, a hala pini David war Keila sek ɗa, a hala gaini sapa zi sda tini yaw.

⁷Labar a cosi sini Sawul ɓa David a halasi a n’a Keila. Nɵa Sawul a muɗa: Alaw a saŋa war ta ya, buri a halasi a sini amlai war fuŋ n’abai na gaini porte miɗi lai, kawai n’e ɵi mini hlai gaini a na lai.

⁸Sawul a yikiɗisi askarai na wiini paŋ buri e hili edi min hatam, aŋ yimisi David gaiɗi ɗaini.

⁹David a siɗa ɓa Sawul a firya a zini meefeŋ, a miɗini wiini Abiyatar, na pai zi ɓaka: Mulasi wazagai n’e zilbi dirini Alaw gaini ɗa.

¹⁰David a muɗa: EPIƊ-ƊAI, Alaw na wiiɗi Izrayel, ta ɗifku zi sda mu ɵina ɓa: Sawul a firya ɓa a halasi a Keila aŋ tuura fuŋ n’abai hanɗa edi buriya.

¹¹Ɗai n’abakai na Keila ɗa aga e siŋa war tini ɗi? Sawul aga a halasi woni, maini na mu ɵinaŋ ɵa ɗi? EPIƊ-ƊAI, Alaw na wiiɗi Izrayel, za barka, siɓkaɓa wala hanɗa, ara ta na ɗifku zi sda ɗa ta.

¹²David a muɗa pra: Ɗai na Keila ɗa aga e siŋa edi tin Sawul gaiɗi ɗaiɓa paŋ ɗi? EPIƊ-ƊAI a miɗini: Aga e suku war tiɗi.

¹³Nɵa David gaiɗi ɗai na Keila, e yimi siɗi edi war Keila par, e hili war hlai zamai. E zi gobi ɗai miya ɵaara. Labar a co sini Sawul ɓa, David a na aha war Keila kir kai, a pla mini gaiɗini hili na woni ɗa.

¹⁴David a sumna edi war basga na kaɗataŋ na Zif, war hlai na ɗai e hili woni sek gai gir, kapai won hlai n’a sumna amai midiɗi huwuŋ na ɗa, Sawul a na payaŋ blaŋ, amma Alaw a saŋ war tini kai.

¹⁵David a siɗa ɓa, Sawul a niyasi edi na ɗa buri a paya aŋ ɓa suŋfani. David a nafu edi war basga na Zf, a Horsa.

¹⁶Yonatan n’ahini Sawul a hala sini aŋ sini arai zi pi, kapai a mula arni gdaŋ sin Alaw.

¹⁷A miɗini: Ku huna kai, Sawul n’apa ɗa aga a za wala ktai suku kai. Aga ku suma pai midiɗi Izrayel ɗa ku tuku, ta mu ɗif na wulaku ɗa lai. Koo Sawul n’apa maa a sɗa ɵa gaglai.

¹⁸Nagai gai suliɗi, e zi bonu gai marɗi, wuzani arni EPIƊ-ƊAI. David a hinasi war Horsa, Yonatan a waya ahani lai.

¹⁹Ɗai na Zif par e hili sin Sawul war Gibeya, e miɗini: David aŋ gai ŋûyi ahaɗi, war hlai na ɗai e hili woni sek gai gir, war Horsa, midiɗi huwuŋ na Hakila, war gal n’amai par tin hlai na na kooloŋ ɗa. Ku sɗa ɵa kai ɗi?

²⁰Tiyana ɗa Jaamus, na ɓa ku firya ku halɗi ɗa, halaɗi. Tiyi ɗa aga mi suŋku war tuku

²¹Sawul a muɗa: EPIƊ-ƊAI a ɓikiki, tiki na ki ɗa hiini haw buriya ɗa.

²²Nɵa, mu siiwiki, hili, ki yimi labarni pɗem a suwa, hlai n’aŋ warni ɗa, ki tiliŋ gai futini, ɗif n’a talaŋ war hlai ni ɗa, na ɓa a na ɗa, ki piyiŋ, - buri e miɗiŋa ɓa a suwa yel gara.

²³Hili, ki tili hlai n’a na ŋoya woni ta ta ɗa paŋ, kapai ki wiyisi sa, war hlai na mu kutuɓmu ta ɗa, kapai mu hala gaiki. Na ɓa a na midini afti na Yuda ɗa, aga mu payaŋ war hlai paŋ, haa mu navaŋ lai.

²⁴E hili a Zif, wuzani Sawul par. David gaiɗi ɗaini ɗa e ɗifu midini hlai na plas na war basga na kaɗataŋ na Mowab, war gal n’amai par tini hlai na kooloŋ ɗa.

²⁵Sawul a mula ɗai pini, a hala aŋ paya David. Ɗai emiɗini wiini David ta, a niya azumai war hlai ktai na boŋor, a sumna edi war basga na kaɗataŋ na Mowab. Sawul a ɵina labar hanɗa a tika futi pini edi woni.

²⁶Sawul a niya kokoɗi huwuŋ war gal ktai par ɗaw, David gaiɗi ɗaini e niyisi war galɗi hanɗa par ɗaw lai, huduk arbaɗi su, David a purma, kapai a mula tini Sawul, kapai na ɗa, Sawul gaiɗi ɗaini e hriŋ azumai har ya, aŋ yimiŋ.

²⁷War hlai ni tizaw, ɵeŋ a co sini Sawul ɓa a halasi witaw, buri Filistrekai e niyisi e ɗa aha pumu midini aftimu.

²⁸Sawul a waisi midini ezini, a hala pini David kir kai, a waya piɗi Filistrekai. Buri nɵa e yiki hlai hanɗa ɓa Sela-Mahlekot a dara muɗa: Huwuŋ na wiini ɓraw.