Read Mousgoum 1 Samuwel 27 Bible Online

1 Samuwel 27 - Mousgoum bible

1 Samuwel 27

¹David a hiina gai warni a muɗa: Mefeŋ ktai ɗa, Sawul aga a ɓa suŋfaŋa ɗa. Dabarai zamai na mu zaŋ n’a suwa aŋ kir kai. Sai, mu ka sa midini afti na wiiɗi Filistrekai ɗa, kapai Sawul ɗe, a hina futi n’a tikaŋ pa, aŋ payaɓa midini afti na wiiɗi Izrayel paŋ ɗa lai. Mai hanɗa ɵa aga mu sɗa ɓa mu milini tini li hai.

²Nɵa David gaiɗi askaraini na miya ɵaara, e hili ahani Akis, n’ahini Mawok, pai na Gat.

³David gaiɗi ɗaini e simni ahani Akis, war Gat, ɗif paŋ gaɗi pakataini pakataini, David a sumna gaiɗi falakaini na sulu: Ahinowam na Yizreyel par gaiɗi Abigayil na munini Nabal, na Karmel par ɗa lai.

⁴Ɗai e hilisi e miɗini wiini sawul ɓa: David ɗa a pra edi a Gat su, nɵa a tika futi pini pra kir kai.

⁵David a miɗini wiini Akis: Za barka, na ɓa ku dara ku za pɗem sa ɗa, edi a basga sek na ɗa, ki siŋa hlai ta, kapi mu sumna warni dam kai ɗa, t na begeku ɗa, mu sumna aha war fuŋ n’abai na wiini pai ɗa buri ma ɗa?

⁶Mefeŋ ni dama, Akis a sitini Siklag ta. Siklag te hina aŋ wiiɗi paakai na Yuda ɵa haa Ira na ɗa buri hanɗa.

⁷David a sumna edi midini afti na wiiɗi Filistrekai haa buza ɗaw gaini tile puɗu.

⁸David gaiɗi ɗaini ɗa e niyi edi aŋ hatam. E niyi aha piɗi Gesuritekai, gaiɗi Girzitekai gaiɗi Amalekekai lai, buri ɓa haa aɗipar, e ɗa midini afti na Sur ɵa haa aha war Egipte ta.

⁹David a turla hlai amai tak tak, a hina ɗif na wus kaalai, mun kaalai, a mulasi adumai gaini haakai, gaini ɵaakai, ablehökai, ɵigini, gaini sapa lai. A waisi li edi par ɗa, a hala sini Akis taaha taaha.

¹⁰Nɵa hai na akis zilbaŋ li ɓa girna ki hitimisi gaiɗi ɗai ma ɗa ɗa, david a wiyini seŋ ɓa: Gaiɗi ɗai na war gal n’amai sek, na wiiɗi Yuda, ɵa kai ɗa ɓa mi hitimisi gaiɗi ɗai na war gal n’amai sek na wiiɗi Yeramelitekai, za gal n’amai sek na wiiɗi Kenitekai.

¹¹David a kasi ɗif aha war Gat karn kai, war hiini na ɓa aga e wiini pini amai. Aga e miɗi midiɗi ɓa David gaiɗi ɗaini ɗa e zi ziyi ɗa an na, an na. Mefeŋ na David a zaŋ midini afti na wiiɗi Filistre taaha ɗa, a za ɗa maini nɵa.

¹²Akis a yima David aŋ ɗif na jre, a hiina ɗa ɓa: David a bunda sini li arɗi ɗai na Izrayel, na ɗaini ɗa hi-hir, nɵa a hina fu na ɗa aŋ ɗif na wiini ɵa gamai.