Read Mousgoum 1 Samuwel 28 Bible Online

1 Samuwel 28 - Mousgoum bible

1 Samuwel 28

¹War mefeŋ ni ɗa, Filistrekai e tipiɗi askarai na wiiɗi, e zi aŋ vok zi hatam na gai futini ta, kapai e hitimi gaiɗi ɗai na Izrayel. Akis a miɗini wiini David: Ku sɗa ya ɓ'aga ku niya edi aŋ hatam gaya, tuku gaiɗi ɗaiku lai kai ɗi?

²David a wiini seŋ wiini Akis: Pɗem! Sai na ku muɗa li. Nɵa Akis a miɗini wiini David: Aga mu zuku aŋ ɗifŋa zi gɗam n’aŋ gaya ɵa kureɗ.

³Won hlai na Samuwel a mra ɗa, ɗai na Izrayel gaini abaiɗi paŋ e tûwiŋ gara, e pin war Rama, fuŋni n’abai ɗa. Sawul a fuɗa sdaɗi ɗai zi diniya ɗa edi su. A firya ɓa ɗif a zaŋ kir kai.

⁴Filistrekai e tipi siɗi e pi kaŋ na wiiɗi war Sunem, Sawul a tipiɗi ɗai na Izrayel ɗa paŋ e pi war Gilbowa lai.

⁵Won hlai na Sawul a tala kaŋ na wiiɗi Filistrekai ɗa, hunai te yimaŋ. Agulni te ha amlai warni gdaŋ gara.

⁶Sawul a zilba dirini EPIƊ-ƊAI, amma EPIƊ-ƊAI a wiyini seŋ kai. War weseŋ zi pɵi kaalai, war wazagai na pai zi ɓaka a za sda gaini ɗa kaalai, war miɗi ɗai na min Alaw kaalai.

⁷Sawul a miɗiɗi wiiɗi ɗai n’ahani maini nɵa: Piyitiɓa muni zi diniya ktai ta, kapai mu hala miɗi haw. E miɗini: Muni zi diniya ktai te n’a Ein-Dor.

⁸Nɵa, Sawul a wa sapa zaai sini, a bunda sini aŋ ɗif kadai, a mula ɗai pini sulu lai. E cû ahaɗi muni duvuk. Sawul a miɗiɗi wiiɗi muni: Za barka, talaɓa haw! Yikaŋasi ɗif zi mri ktai haw, ni n’aga mu suŋkuku yikini ɗa.

⁹Muni te miɗini: Ku sɗa wala na Sawul a zaŋ wiiɗi ɗai n’e zi sda zi diniya ɗa edi gaglai, a vidiɗi edi, ku firya ku yimaɓa war seŋ hanɗa buri ma ɗa?

¹⁰Sawul a ha wala mini gaini EPIƊ-ƊAI maini nɵa: Gaini EPIƊ-ƊAI jaŋ, meefeŋku ktai maa war seŋ hanɗa kai jaŋ.

¹¹Muni te miɗini: Ku firya ɓa mu yikasi amai ɗa asiya ɗa? A miɗiɗi yikaŋasi Samuwel amai.

¹²Won hlai na muni te tala Samuwel ɗa, te ɗuula gai gdaŋɗi te muɗa: Ku duulaŋa buri ma ɗa? Ku tuku Sawul kai ɗi?

¹³Pai a miɗiɗi: Ku huna kai, n’arku a tala ɗa a maɗa? Muni te miɗini: Mu tala seze ktai a na niyasi azumai arni afti par.

¹⁴Pai zilbiti pra: A siɗa ɗa maɵa maɵa ɗa? Te waya seŋ te miɗini: A niyasi aai na ɗa a ɗif na wel; a na gaini sapa na mogo sini ca. Sawul a siɗa ɓa a Sam. Apa arni azumai, a hurga azumai.

¹⁵Samuwel a miɗini wiini Sawul: Ku huwyaɓa aŋ yikaŋasi amai ɗa buri ma ɗa? Sawul a wiyini seŋ: M'aŋ war gir n’abai. Filistrekai e firyi e hitimiŋa, Alaw a yima warni edi sa par kaai, a waya seŋ war miɗi ɗai na min Alaw par kaalai, war weseŋ zi pɵi kaalai, mu yikukusi na ɗa ɓa ku siɓkaɓa wala n’aga mu zaŋ ɗa.

¹⁶Samuwel a muɗa: Ku zilbaɓa buri ma ɗa, Na ɓa EPIƊ-ƊAI a yima warni edi suku par kaai, a bunda aŋ gawku pla ɗa?

¹⁷EPIƊ-ƊAI a za suku na ɗa, maini na muɗuŋku war ma par ɗa nɵa, EPIƊ-ƊAI a tikiti pai ɗa edi war tuku par ɗaw, a sitini wiini ɗif zamai ta, wiini David.

¹⁸EPIƊ-ƊAI a zuku ɵa na ɗa, buri ɓa ku za pin miɗi na wiini kai, hiyni na sini Amalek ɗa ku vaŋ amai, maini n’a dara ɵa kai, EPIƊ-ƊAI a zuku girna na ɗa ɵa.

¹⁹EPIƊ-ƊAI aga a siɗi Izrayel war tiɗi Filistrekai gaiku tuku lai, dawai ɗa, tuku gaiɗi aliku aga ki pɵisi ɗa gaiyi tiyi zi mri sek, EPIƊ-ƊAI aga a siɗi askarai na Izrayel war tiɗi Filistrekai.

²⁰Tizaw Sawul a kɵa azumai gai mogoni kal kal, seŋ na Samuwel a miɗiŋni ɗa, a milini hunai pini gara, gdaɓi paŋ a vada edi tak, buri ɓa a yiva a suma wala kai, a fana a suma wala kai pra.

²¹Muni te halasi sini Sawul, won hlai na te talaŋ hangalni gai turli marwai, te miɗini: Ta na bagaiku, mu yima seŋku ɗa, na ku muɗaŋa midini mu zuɓku ta, mu huna mriɓa kai.

²²Tiyana ɗa, ta lai, mu siiwuku, za barka, hinaŋa mu zukusi wala zi simi agwi, ku tika tuku muku taaha, kapai ku nava gdaŋ agwi aŋ waya aha sek.

²³A ɗiya kai, a muɗa: Mu suma fu wala kai. Ɗaini gaiɗi muni ɗa e siiki mini haa, a yima seŋɗi ɗa. A faka amai fak, a sumna amai midini walani zi feŋ ɗa dam.

²⁴Muni te nafu gaini ahi gari na nur nur ahaɗi, te purma aŋ fuɗaŋ, te mula avdi, te haɗaŋ, te za peŋ na gaini is arni kai.

²⁵Te kaŋsi wuzani Sawul gaiɗi ɗaini, e simi. Duvuk ni dama e wiyi ahaɗi.