Read Mousgoum 1 Samuwel 29 Bible Online

1 Samuwel 29 - Mousgoum bible

1 Samuwel 29

¹Filistrekai e tipiɗisi askarai na wiiɗi paŋ war Afek, ɗai na Izrayel ɗa e pisi kaŋ na wiiɗi gobi miɗi kiliŋi na te na war Yizreyel.

²Paakai na wiiɗi Filistrekai e ɵiɗi edi wuzani vokɗi askarai na miya miya gaini na dubu dubu lai, David gaiɗi ɗaini ɗa, e hiliɗi asakalɗi par, gaini Akis lai.

³Paakai na wiiɗi Filistrekai e miɗi: Hebrekai hanɗa e ɗi na wata par ɗa? Akis a wiyiɗi seŋ wiiɗi paakai maini nɵa: A David n’a naka aŋ ɵeŋ na wiini Sawul, pai na Izrayel ɗa. Aŋ gaya na ɗa mefeŋ yaw, buza yaw. Par na ɗa, mu nava wala ktai na meefeŋ sini kai.

⁴Paakai na wiiɗi Filistrekai e zi hiy sini Akis e miɗini: Waia ɗif n’aŋ tuku na ɗa aha, ku miɗini a waya war hlai na ku siŋni ɗa, a hala edi min hatam gaimu kai, kapai a bunda armu edi war hlai ni tizw aŋ gawmu kai. Kapai a ɵaɗa warni epin-gezani ɗa, sai a fiɗiɗi askarai na wiimu edi gai fiɗi kai ɗi?

⁵Hanɗa a david n’e zini yama gaini e didimi lai ɓa: Sawul a fuɗa ɗai dubu viya amma David a fuɗa dubu doogo doogo viya ɗa kai ɗi?

⁶Akis a yika David a miɗini: Gaini EPIƊ-ƊAI jaŋ, tuku ku ɗif na jre, hili na mu hulumu edi min hatam ktai mu wiyumusi ktai lai a tala ara pɗem gara. Buri ɓa hlai na ku halasi gaya par haa girna ta na ɗa, mu tala wala ktai na meefeŋ suku kai, amma paakai na wiiɗi Filistrekai ɗa, e firyuku kai.

⁷Tiyana ɗa, waya wiiku aha, hala jam, kapai mu za wala n’a ɓilka hiiniɗi paakai na wiiɗi Filistre kai ɗa.

⁸David a miɗini wiini Akis: Mu za ɗa a ma ɗa? Haa hlai na mu halasi par haa girna ta ɗa, na ku talaŋ sa ta na begeku, n’a hala kai ɗa a ma ɗa? Na kapai mu hala mu hitimiɗi gawni epin-geza ɗa kai ɗa?

⁹Akis a wiyini seŋ wiini David: Ta mu sɗa ɵa lai, ku sɗa ara maini ɗif zi ɵeŋ na wiini Alaw nɵa, amma paakai na wiiɗi Filistrekai ɗa ɓa: Ku halaɗi gaiyi min hatam kai.

¹⁰Nɵa, gorof par cup, tuku gaiɗi ɗai na wiini epin-gezaku n’e hilisi gaiku ɗa, ki fiki gorof par, hlai na hlai a sɗasi li edi ɗa, kihili.

¹¹David gaiɗi ɗaini e fiki amai gorof par cup, aŋ wiyi aha midini afti na wiiɗi Filistrekai. Amma Filistrekai ɗa, e hili edi min hatam war Yizreyel.