Read Mousgoum 1 Samuwel 3 Bible Online

1 Samuwel 3 - Mousgoum bible

1 Samuwel 3

¹Samuwel ɗa a za sdani EPIƊ-ƊAI wuzani Eli. War mefeŋ ni ɗa, EPIƊ-ƊAI a nafu a muɗa seŋ kir kai, wala n’a siŋka sini arni ɗif ɗe a nafu gara kaalai.

²Mefeŋ ktai, Eli a nafu gaini fini azumai waŋ woni hlai n’a fana woni ɗa, arni a tika pini a bunda huruf, a tala kir kaalai.

³Samuwel a nafu weseŋ amlai warni tempel na wiini EPIƊ-ƊAI, warni hlai na zunduk zi bonu na wiini EPIƊ-ƊAI a nafu woni ɗa. Lampa na wiini Alaw te nafu aŋ ya hai.

⁴EPIƊ-ƊAI a yika Samuwel: Samuwel a waya seŋ, m’aŋ na.

⁵Samuwel a lawa sini Eli a muɗa: M'aŋ na, ku yikaŋa koo! Eli a wiyini seŋ: Mu yukuku kai ahiya. Hala fana wiiku azumai waŋ.

⁶EPIƊ-ƊAI a yika Samuwel pra, Samuwel a fakasi amai a hala sin Eli, a miɗini: M'aŋ na, ku yikaŋa ɗa. Eli a miɗini: Ahiya mu yikuku kai, hala fana wiiku azumai waŋ.

⁷Samuwel a sɗa EPIƊ-ƊAI kai, EPIƊ-ƊAI a miɗini ka seŋ duk kaalai.

⁸EPIƊ-ƊAI a yika Samuwel azi n’ag'aŋ hu pra. Samuwel a faka amai a hala sini Eli a miɗini: Ku yikaŋa koo! M'an na. Nɵa, Eli a sɗa ɓa a yika arwagwi na ɗa a EPIƊ-ƊAI.

⁹Eli a miɗini wiini Samuwel hala fana wiiku azumai waŋ, na ɓa a yukuku li katawai ɗa, aga ku muɗa maini nɵa: Muɗa wiiku EPIƊ-ƊAI, ta ɵeŋku mu na zuɓura. Samuwel a waya woni hlaini zi feŋ ɗa waŋ.

¹⁰EPIƊ-ƊAI a halasi a ɗiya zaw maini n’avut ɗa nɵa; a yika maini nɵa: Samuwel, Sam. Samuwel a waya seŋ: Muɗasi wiiku, ta ɵeŋku mu na zuɓura.

¹¹EPIƊ-ƊAI a miɗini wiini Samuwel: Aga mu kasi gir n’abai midiɗi Izrayel, nagai paŋ n’aga e ɵini labar hanɗa, hunai aga te yimiɗi.

¹²War mefeŋ ni ɗa, aga mu hinasi gir na mu muɗa gaini paŋ ɗa midini Eli gaini pinzibani gaini hlaini paŋ kafa, ktai maa a hina edi kai.

¹³Mu miɗini ya, pinzibani aga e hini warni gir haa ɵa haa kureɗ buri meefeŋ na wiini. Alini e miisi Alaw, a sɗa ɓa alini e ɗa miisiɓa, paŋ ktai a miɗiɗi kai.

¹⁴Pini hanɗa, mu ha wala ma wiini pinzibani Eli ɗa ɓa: Wala ktai n’aga a haza meefeŋɗi edi nɵa aŋ kai, ɓaka kaalai, like ktai kaalai.

¹⁵Samuwel a hina waŋ haa hlai a sɗasi edi, asakal par a mala miɗi dilimi na wiini EPIƊ-ƊAI edi, wala n’a siŋka arni ɗa, a miɗiŋni wiini Eli ɗa hunai pini ta.

¹⁶Nɵa Eli a yika Samuwel a miɗini: Samuwel ahiya, Samuwel a waya seŋ: M'aŋ na.

¹⁷Eli a zilbaŋ a muɗa: A muɗuku maɵa ɗa? Za barka ku ŋoya wala ktai wuza kai. Na ɓa ku ŋoya wala ktai li arbani wazagai n’a muɗuŋku par ɗa, Alaw a zuku nɵa lai, nɵa lai.

¹⁸Nɵa Samuwel a miɗiŋni kafa, a ŋoya wala ktai wuzani kai. Eli a muɗa: Hanɗa a EPIƊ-ƊAI, a za maini n’a dara nɵa.

¹⁹Samuwel a za abai, EPIƊ-ƊAI a nafu gaini, seŋ na Samuwel a muɗaŋ edi paŋ ɗa, a vaŋ amai paŋ, ktai maa a hina kai.

²⁰Nɵa midini afti na Izrayel gaini abaini paŋ, a Dan war gal n’azumai sek ɗa par haa a Berseba war gal n’amai sek, e siɗi ɓa Samuwel ɗa a ɗif na mini Alaw na wiini EPIƊ-ƊAI jre jre.

²¹EPIƊ-ƊAI a hina aŋ siŋka sini arni ɵa war Silo. EPIƊ-ƊAI a siŋka sini arni Samuwel war Silo gaini seŋni n’a na muɗaŋ ɗa.