Read Mousgoum 1 Samuwel 30 Bible Online

1 Samuwel 30 - Mousgoum bible

1 Samuwel 30

¹Amma war mefeŋ n’ag'aŋ hu, won hlai na David gaiɗi ɗaini e cû a Siklak, Amalekekai e niyisi edi aŋ hatam war basga war Siklak e gurli hlai tak tak, e yi fuŋ na Siklak ɗa lai.

²E yimiɗi falakai gaiɗi aliyagoi gaiɗi ɗai n’abakai lai e zɗi aŋ bagakai, amma e fiɗi ɗif ktai maa piɗi kai. E miliɗi, e hili gaiɗi.

³David gaiɗi ɗaini e cûsi war fuŋ n’abai na Siklak, e nivitisi gaini yi, e niviɗisi falakaiɗi gaiɗi aliɗi na maɵagai, gaiɗi na falakai lai gaini mili yaw.

⁴David gaiɗi ɗai n’epini, e ɵi marava, e kɵi edi aŋ tuwi haa gdaŋɗi zi tuwi maa a vada vad.

⁵Falakaini David na sulu paŋ gaini yimi yaw lai: Ahinowam na Yizreyel gaiɗi Abigayil na munini Nabal na Karmel ɗa lai.

⁶David hunai n’amai te yimaŋ, buri ɗaini e miɗi arbaɗi ɓa e fiɗiŋ edi gaini kriyit, ɗif paŋ ɗa agulni a lumaŋ sini buriɗi alini na maɵagai gaiɗi falakai n’e yimiɗi ɗa. Amma David a nava gdaŋ barkani Epiɗ-ɗai Alaw na wiini.

⁷A miɗini wiini pai zi ɓaka Abiyatar n’ahini Ahimelek maini nɵa: Za barka, kanasi wala n’e zilbi dirini Alaw gaini ɗa. Abiyatar a kasi wala n’e zilbi dirin Alaw gaini wiini David.

⁸David a zilba EPIƊ-ƊAI maini nɵa: Na ɓa mu tika futi li piɗi ɗai hanɗa, aga mu niviɗi ɗi? EPIƊ-ƊAI a miɗini: Hala aga ku niviɗi war futi, aga ku piliɗisi ɗaiku edi tɗi par.

⁹David a hala gaiɗi ɗai na miya ɵaara na pini, e cû wulani yem zi ki na Besor, zamai e hini ka woni.

¹⁰David a tika futi piɗi gaiɗi ɗai pini miya puɗu, ɗai na miya sulu e hini ka woni, e nivi futi aŋ vigi yem zi ki na Besor ɗa kai burini kayai na siɗi.

¹¹E nivi ɗif ktai n’Egipte par edi war basga blaŋ, e yimiŋsi, e kiŋsi wuzani David. E sini wala zi simi gaini yem zi ci lai.

¹²E sini gato n’e ziŋ gaini alini luwuŋ Fige gaini sumulni ali luwuŋ zi vin na huleŋ sulu lai. Asakal n’a suma ya, ɗif hangalni a waya sini, buri a za mefeŋ hu, yuvai hu lai, a suma wala kaalai, a ca yem kaalai.

¹³David a miɗini: Epiɓgezaku asiya ɗa? Ku na wata par ɗa? A muɗa: Mu arwagwi n’Egipte par, mu begeni ɗif na Amelek, epiɓgeza a hinaŋa edi buri mu za veglek ta, mefeŋ girna hu.

¹⁴Mi cikisi hlai edi war basga na wiiɗi Keretekai, na wiini Yuda gaini basga na wiini Kaleb. Mi yitisi Siklak ɗa mi ɗi tiyi.

¹⁵David a miɗini: Ku kiɗa ku kaɓa pa siɗi ɗai hanɗa ɗi? A waya seŋ a muɗa: Haɓa wala muku gaini Alaw ɓa aga ku fuɗaŋa kai, ɓa aga ku saŋa war tini epiɓgeza kai, nɵa aga mu kuku puku siɗi.

¹⁶Nɵa a kiini pini David siɗi Amelikekai, e simni azumai ca ca midini hlai paŋ, e simi, e ci, e firiyi lai, gaini der n’abai n’e miliŋsi midini aftiɗi Filistrekai gaini afti na Yuda par ɗa.

¹⁷David a tika pini aŋ fiɗiɗi gorof par haa dawai koskoi, ɗif ktai maa a pra edi kai, sai gawlakai na miya puɗu n’e pri edi gaini ɵigini.

¹⁸David a kurɗasi wazagai na Amalekekai e miliŋ ɗa paŋ, a suwa paŋ falakaini na sulu ɗa.

¹⁹Wala ktai a ɓa kai arbani wazagai n’e miliŋ ɗa: Arbaɗi ɗai n’abakai gaiɗi aliyagoi kai, arbaɗi ali na maɵagai gaiɗi na falakai kai, arbani par wala a ɓa kai, David a wayaŋsi kafa

²⁰David a mulasi ɵaakaiɗi gaini adumaiɗi, gaini haakaiɗi paŋ. Nagai n’e ɵi wuzani fara hanɗa e miɗi: Der na mini hatam hanɗa a wiini David.

²¹David a cosi gobi siɗi, nagai na miya sul na e nivi futi aŋ hili pini kai, na e hini ka ɵimani yem zi ki na Besor ɗa, e niyisi di arni David gaini vok na pini, David gaiɗi ɗai na pini e hili siɗi e ɵiɓiɗi wuti.

²²Nɵa arbaɗi ɗai n’e hili pini David, ɗai na maafanai gaiɗi na nafaɗi kai, e tiki seŋ e miɗi: Nagai e hiliɗi edi gaimu kai, aga mu suɗumu wala war der na mini hatam na mu muluɓmusi hanɗa par kai, sai e ɗi falakaiɗi gaiɗi aliɗi tar. E miliɗi e hili gaiɗi.

²³Amma David a muɗa: Tawalakaya, wala n’Alaw a suɓmu ɗa aga ki zi gaini nɵa kai, a giɗimumu A ni, a suɗumu nagai n’e vurmumusi ɗa A ni.

²⁴Ɗif n’aga a ɵna seŋ hanɗa miki par ɗa asiya ɗa? Buri n’a sa sini ɗif n’aŋsi edi mini hatam ɗa gaini na wiini ni n’a hina aha aŋ giɗima wazagai ɗa, a na kal kal. Aga e ɓûrwi wazagaiɗi aŋ bonu.

²⁵Sini mefeŋ hanɗa par a zaŋ aŋ gadai ta, aŋ de buriɗi Izrayel paŋ. A hina ɵa haa girna.

²⁶Won hlai n’e cû war Siklak, war der na e niviɓsi ɗa par David a ɵina wala agwi wiiɗi n’abakai na Yuda na marmakaini, a miɗiɗi: Hanɗa a like n’agwi n’a siŋka ɓa mu diriki, mu tikaŋɗi arbani der na mu navaŋsi pini der na wiini EPIƊ-ƊAI par.

²⁷A ɵina zamai wiiɗi nagai na Bet-El, wiiɗi nagai na war Ramot 'edi war basga sek, wiiɗi nagai na Yatir,

²⁸wiiɗi nagai na Arower, wiiɗi nagai na Sifmot, wiiɗi nagai na Estemowa,

²⁹wiiɗi nagai na Rakal, wiiɗi nagai na war fuŋ n’abakai na wiiɗi Yeramelitekai, wiiɗi nagai na war fuŋ n’abakai na wiiɗi Keritekai,

³⁰wiiɗi nagai na Hormo, wiiɗi nagai na Bor-Asan, wiiɗi nagai na Atak,

³¹wiiɗi nagai na Hebron, woɗi paŋ na David gaiɗi ɗaini e hili ka woni ta ta ɗa.