Read Mousgoum 1 Samuwel 31 Bible Online

1 Samuwel 31 - Mousgoum bible

1 Samuwel 31

¹Filistrekai e hitimi gaiɗi Izrayel. Ɗai na Izrayel e pri edi aŋ rûvi wuzaɗi Filistrekai. Ɗai viya e nivi mri amai midiɗi huwuŋ Gilbowa.

²Filistrekai e hiɵi Sawul gaiɗi alini amai haɵ, e fiɗiɗi alini Sawul na hu: Yonatan, Abinadab gaini Malki-Suwa edi.

³Spakni hatam paŋ a hora midini Sawul, ɗai n’e ɗigiri gaini ɓaraw gara arɗi a mula midini. Won hlai n’a tiliɗi a tika pini aŋ jiriya.

⁴Sawul a miɗini wiini ɗif n’a liba wazagai zi hatam, rɗa kaɵkarku, fuɗaŋa, kapai ɗai na gazɗaɓai hanɗa e siɗi aŋ fiɗiŋa kai, kapai e ziŋa yewere kaalai. Amma ɗif zi libi wazagai zi hatam a ɗiya kai, buri hunai pini ta, nɵa sawul a rɗa kaskarni a bula sini midini.

⁵Won hlai na ɗifni zi libi wazagaini zi hatam a tala ɓa Saul a mra su ɗa, ni lai, a bula sini midini na wiini, a mra gaini lai.

⁶Sawul, alini na maɵagai na hu, ɗifni zi libi wazagaini zi hatam gaiɗi ɗaini lai e mri paŋ war mefeŋ hanɗa.

⁷War hlai n’e tili ruviɗi Izrayel gaini mrini Sawul na gaiɗi alini lai ɗa, aliɗi Izrayel n’e ɗisi edi duɓani huduk na Izrayel par, gaiɗi n’anene duɓani ra Yurdan par, e hinisi fuŋɗi edi, e pri edi. Filistrekai e cûsi woni, e simni woni lai.

⁸Dawaini, Filistrekai e hilisi, e tili arbani kopoŋ, e nivi Sawul gaiɗi alini na hu azumai midiɗi huwuŋ na Gilbowa waŋ waŋ.

⁹E ɗûkli humokni Sawul, e mili wazagaini zi hatam lai. E gûniŋ midini afti paŋ, e si labar hanɗa amlai warni tempel na wiiɗi, wiiɗi ɗai ɗi lai.

¹⁰E mili wazagai zi hatam na wiini Sawul amlai war tempel na wiini alawai Astarte, e tuku kopoŋni amai sini ɵaga na Bet-Sean.

¹¹Ɗai na Yabes na war Galaad, e ɵini wala na Filistrekai e ziŋ sini Sawul.

¹²Ɗai n’agulɗi a huna kai ɗa e fiki e hili, e fini aŋ hili yaw, e milisi kopoŋni saul gaini na wiiɗi alini edi siɗi ɵagai na Bet-Sean ɗa par; won hlai n’e wiyisi aha war Yabes, e yi kopoŋ hanɗa edi.

¹³E tipi keɵkeɗi, e piŋ azumai pin luwuŋ tamaris war Yabes, e tiki sai mefeŋ muguzak.