Read Mousgoum 1 Samuwel 6 Bible Online

1 Samuwel 6 - Mousgoum bible

1 Samuwel 6

¹Zunduk zi bonu na wiini EPIƊ-ƊAI a zasi tile muguzak midini afti na wiiɗi Filistrekai.

²Nɵa Filistrekai e yikiɗi paakai zi ɓaka gaiɗi nagai n’e siɗi wuze, e zilbiɗi e miɗi: Zunduk zi bonu na wiini EPIƊ-ƊAI ɗa, mu zuŋmu maɵa maɵa ɗa? Miɗiyi haw! Mi wiyiŋ warni balamni maɵa maɵa ɗa?

³Nagai e wiyi seŋ e miɗi: Na ɓa ki diri ki wiyi zunduk zi bonu na wiini Alaw na wiiɗi Izrayel ɗa, ki wiyiŋ kadai kai, amma ki si wala ktai wiini Alaw na wiiɗi Izrayel pini ta kapai a haza tuwurki edi, nɵa aga ki zûûli, aga ki siɗi wala n’Alaw a siŋka spakni edi siki burini ɗa lai.

⁴Filistrekai e miɗi: Wala na mu suɓmu wiini Alaw kapai a haza tuwurmu edi ɗa a maɗa? Paakai zi ɓaka gaiɗ ɗai zi siɗi wuze ɗa e wiyi seŋ e miɗi: Mu zizinumu wazagai n’a sɗa maini si zi hiliwi ɗa ɵa ɵim gaini or, ahusi zi or ɵim lai, midini pɵi na wiiɗi abakai na wiiɗi Filistrekai ɗa. Buri ɓa gir hanɗa a za siki tiki paŋ, tiki gaiɗi abakaiki paŋ.

⁵Nɵa ki zizini wazagai n’a sɗa maini siki n’a huluwa ɗa ɵa gaini wazagai n’a sɗa maini ahusi n’a tuura aftiki edi ɗa ɵa lai. Si kol sini Alaw na wiiɗi Izrayel ablaŋtaŋkai ɗa aga a yima tini warni agwi a ziki gir wiiki tiki gaini alawai na wiiki, gaini afti na wiiki lai kir kai ɗi ɗa.

⁶Ki bindi agulki gdaŋ maini na wiiɗi ɗai n’Egipte gaini Faraw ɗa nɵa buri ma ɗa? Won hlai n’Alaw a za sda gaiɗi, e hiniɗi aliɗi Izrayel e hili kai ɗi?

⁷Tiyana ɗa a pɗem ɓa ki zizini saret na hehe kaŋ, ki mili ɵaakai n’alini a na ca fiyaw pini hai sulu, a ɵaaki na zug a tika ka wulani duk kai, ki tiɓi wulani teɓ, ki pi saret ɗa pin tiɓ, alini n’aŋ pini ɗa, ki wiyiŋ aha.

⁸Ki tiki zunduk zi bonu na wiini EPIƊ-ƊAI midini saret ɗa ta, wazagai zi or na ki siŋ wiini Alaw kapai a haza tuwurki edi pini ɗa, ki miliŋ war kes ca, ki tikiŋ ɵimani zunduk ɗa ta lai, asakal par ki tikini pini, a hala wiini.

⁹Aga ki tiki hangalki sini, na ɓa ɵaakai a tikiti li futi na Izrayel sek, arni a Bet-Semes sek ɗa, a siŋka edi ɓa a zumu gir na ɗa a Alaw na wiiɗi Izrayel ɗa. Na ɓa a tikiti te futi hanɗa kai ɗa, aga a yima mudumu ɓa a zumu gir ɗa a ni kai, amma a wala n’a tapasi gai tipi mudumu.

¹⁰E zi maini na paakai zi ɓaka e miɗiŋɗi nɵa, e yimi ɵaakai n’alini a ca fiyaw pini sulu, e rgi saret ɗa pini ɓak, e dûgi min alini amlai duk.

¹¹E tiki zunduk zi bonu na wiini EPIƊ-ƊAI gaini kes na wazagai n’e ziziniŋ n’a siɗa maini awusi ɵa maini si zi hilwi ɵa lai ɗa amai war saret ɗa ca ca.

¹²Slaakai a tikiti futi na Bet-Semes ɗa cir, a hala warɗi futi na ɗa ɵa cir a viyɗa na sek kaalai na sek kaalai, gaini tuwi mini ɵa kai. Abakai na wiiɗi Filistrekai e tiki futi pini ɵa haa aha miɗi Bet-Semes ta.

¹³Ɗai na Bet Semes e ɗifu aŋ hiɗi algama na wiiɗi edi war hlai na huduk, won hlai n’e yimi arɗi amai e tili zunduk zi bonu na wiini EPIƊ-ƊAI, e firyi gara won hlai n’e tiliŋ.

¹⁴Saret ɗa a cosi war vowai na wiini Yosva na war Bet-Semes, a ɗiya woni zaw. Ahi-fuŋ n’abai a nafu woni ta. E ɓisi luwuŋ na wiini saret ɗa edi, asakal par e zi ɓaka zi yi gaini ɵaakai na sulu ɗa wiini EPIƊ-ƊAI.

¹⁵Levitekai e tiki zunduk zi bonu ɗa azumai, gaini kes na gaini wazagai zi or n’ŋ ɵimani lai. E miliŋ midini ahi-fuŋ n’abai ɗa ca. Ɗai na Bet-Semes e zi ɓaka zi yi gaini ɓaka zamai zamai wiini EPIƊ-ƊAI.

¹⁶Won hlai na paakai na wiiɗi Filitirkai e tili wala hanɗa, mefeŋ ni dama e wiyi aha war ELy.

¹⁷Wazagai n’a sɗa maini si zi hilwi ɵa n’e ziziniŋ gaini or na Filistrekai e siŋ wiini EPIƊ-ƊAI kapai a haza meefeŋɗi edi ɗa, a na maini nɵa: Ktai a wiiɗi Asdod, ktai a wiiɗi Gaza, ktai a wiiɗi Askelon, ktai a wiiɗi Gat, ktai a wiiɗi Ekron lai.

¹⁸Awusi ɗa, a pɵa kai, fuŋ n’abakai gaini n’agogoi paŋ n’aŋ piɗi paakai na wiiɗi Filistre paŋ ɗa, fuŋ n’abakai zi ɵaga gaini na ɵaga sini kai ɗa paŋ, haa sini ahi-fuŋ n’abai n’e tiki zunduk zi bonu na wiini EPIƊ-ƊAI midini na haa tiyana aŋ war paŋ, awusi zi or midini ktai ktai kafa.

¹⁹EPIƊ-ƊAI a fiɗiɗi ɗai na Bet-Semes edi, buri e tili zunduk zi bonu na wiini EPIƊ-ƊAI, a fuɗa ɗai doogo doogo muguzak, -ɗai dubu doogo doogo ɵim arbaɗi ɗai par. Nagai n’e hini karɗi e zi groho, buri ɓa EPIƊ-ƊAI a kasi gir n’abai midini.

²⁰Ɗai na Bet -semes e miɗi: Ɗif n’a kiɗa a ɗiya mini EPIƊ-ƊAI ɗa asiya ɗa, mini Alaw na sɗik hanɗa? Zunduk hanɗa kapai e kiŋ wa sek ɗa, won hlai n’e tikiŋɗi li ahamu na par ɗa?

²¹E ɵini ɗai siɗi ɗai na Kiryat Yeyarim aŋ miɗiɗi maini nɵa: Filistrekai e wiyisi zunduk zi bonu na wiini EPIƊ-ƊAI ya, a na ahaɗi won na, hilisi tikiŋɗi amai ahaki sek.