Read Mousgoum 1 Samuwel 8 Bible Online

1 Samuwel 8 - Mousgoum bible

1 Samuwel 8

¹Won hlai na Samuwel a za li wel ɗa, a miliɗi alini aŋ gaŋgalaŋai zi spak war Izrayel ca ca.

²Ahini n’abai ɓa yikini ɓa Yowel, n’ag'aŋ sulu ɗa yikini ɓa Abiya, e ɗifu aŋ gaŋgalaŋai zi spak war Berseba.

³Amma alini Samuwel ɗa e tikiti futi na wiini ɗa kai; e firyi ɗa a hlai zi der, e yimi katu tiɗi ɗai par, e zi sariya wiiɗi ɗai war jre kir kai.

⁴Ɗai n’abakai n’arbaɗi ɗai na war Izrayel e diŋgi, e hilisi sini Samuwel war Rama.

⁵E miɗini: Tuku ɗe ku za li wel, aliku ɗe e zi tiki azuku kir kai, tiyana ɗa, piyiyi pai ta maiɗi pinziba na zamai paŋ ɗa ɵa, kapai a ziyi sariya lai.

⁶Seŋ n’e miɗiŋ ɓa: Siyi pai, kapai a ziyi sariya ɗa, a sini firyi wiini Samuwel kai. Samuwel a siiwa EPIƊ-ƊAI.

⁷EPIƊ-ƊAI a miɗini wiini Samuwel: Slina seŋ na ɗai aga e muɗuŋku ɗa. E buluku edi ɗa ku tuku kai, e biliɓa edi ɗa mu ta. E firyi ɓa mu suma pai midiɗi kir kai.

⁸E zi suku na ɗa, maini n’e ɗa ziŋ haa aɗipar, hlai na mu miliɗisi edi war Egipte par, e hiniŋa edi ta, aŋ zi ɵeŋni alawai na zamai

⁹Tiyana ɗa, ɵina piɗi, amma ziɗi zaida ta, ku miɗiɗi midini wala n’aga e ziŋ sini pai n’aga e tikiŋ midiɗi ɗa.

¹⁰Samuwel a miɗiɗi seŋ n’EPIƊ-ƊAI a miɗiŋni ɗa edi gaglai wiiɗi ɗai n’e ɗa piyi pai ɗa.

¹¹A muɗa: Pai n’aga a za sda miɗiki ɗa, aga a paya ɓa ki zi sini maini nɵa: Aga a miliɗi aliki, e diɓiri saretai na wiini gaini plasai na wiini lai. Aga e ɵi wuzani saretai zi gaw na wiini maiɗi askarai n’e giɗimiŋ ɗa ɵa.

¹²Aga a miliɗi aŋ n’abakaiɗi vokɗi askarai na dubu, gaiɗi na doogo dooo ɵim. Zamai aga e hirmini vowaini, e hiɗi seyemni, e zizinini wazagaini zi hatam, e zizini wazagai na sini saretai zi gaw ɗa lai.

¹³Aga a miliɗi aliki na falakai aŋ falakai zi jilni wazagai zi ɗûgûdi zi lûgûzi, aŋ falakai zi di simi, aŋ falakai zi zizini peŋ lai.

¹⁴Aga a mula wazagai na pɗamai na war vovaiki par, luwuŋ zi vin na wiiki gaini luwuŋ olive na wiiki lai, a siŋɗi wiiɗi ɗai n’ahani ɗa,

¹⁵aga a mula doogoni ali seyemki gaini na wiini ali luwaɓaiki, a siŋɗi wiiɗi ɗaini n’abakai gaiɗi ɗai n’ahani lai.

¹⁶Aga a miliɗi ɗaiki zi sda na maɵagai gaiɗi na falakai na gai futiɗi ɗa, gaiɗi aliki na gawlakai li, ablehökai lai, aga a za sda na wiini gaiɗi.

¹⁷Aga a mula doogoni adumai gaini haakai na wiiki. Nɵa aga ki bindi aŋ bagakai na wiini.

¹⁸War mefeŋ ni ɗa aga ki tuwi tin pai na tiki ki piyiŋ ɗa, amma war mefeŋ ni ɗa, EPIƊ-ƊAI aga a ɵina miki kai.

¹⁹Ɗai e diri e ɵini seŋni Samuwel ɗa kai. E miɗi: Kal! Tiyi mi firyi ɓa ki piyi pai ta suwi.

²⁰Nɵa tiyi ɗe aga mi bindi maiɗi ɗai na zamai ɗa ɵa lai. Pai na wiyi aga a zitiyi sariya arbaɗi, aga a ɵa wuzaɗi askarai na wiyi, a hala edi min hatam gaiyi lai.

²¹Samuwel ɵina seŋ na ɗai e miɗiŋ ɗa paŋ, a awaya midini katawai wuzani EPIƊ-ƊAI.

²²EPIƊ-ƊAI a miɗini wiini Samuwel, yima seŋɗi ɗa, siɗi pai. Samuwel a miɗiɗi wiiɗi ɗi na Izrayel: Hili wiiki aha, ɗif paŋ aha war fuŋni fuŋni.