Read Mousgoum 1 Samuwel 9 Bible Online

1 Samuwel 9 - Mousgoum bible

1 Samuwel 9

¹War sarti ni ɗa, ɗif ktai a nafu, war pinzibani Benyamin, yikini ɓa Kis, a ahini Abiyel, n’ahini Seror, n’ahini Bekorat, n’ahini Afia, a ɗif zi hatam n’agulni a huna kai.

²Kis ɗa, ahini ktai a na e yikiŋ ɓa Sawul, a nafu gawla, a zuva gara lai; war pinziba na Izrayel ɗa, ɗif n’a suwaŋ gai juf aŋ kai, a suwa ɗai paŋ amai gaini wili.

³Mefeŋ ktai, ablehökai na wiini Kis n’epini a wula, nɵa Kis a miɗini wiini Sawul, n’ahini: Mu siiwuku, yima ɗif zi sda ktai gaiku, hala payasi ablehökai ɗa.

⁴A vuga midini hlai zi huwuŋ na wiini Efrayim, a vuga afti na wiini Salisa lai, a navaŋ kai, a vuga afti na wiini Benyamin ɗa lai, amma a navaŋ kai.

⁵Won hlai n’e cû midini afti na Suf ɗa, Sawul a miɗini wiini ɗifni zi sda ɗa maini nɵa: Halasi wiyumu aha, buri ɓa apa, midini aga a wula gaini ablehökai ɗa, a tika pini aŋ piyumu tumu.

⁶Ɗifni zi sda a waya seŋ a miɗini: Ɗif na wiini Alaw kti a na aha war fuŋ n’abai hanɗa, a ɗif na yikini a wa gara, seŋ n’a muɗaŋ li paŋ ɗa a za paŋ. Nɵa hulumu sini, ablaŋtaŋkai aga a siɓkutumu futi na mu kuɗumu mu niyumu warɗi ɗi!

⁷Sawul a miɗini wiini ɗifni zi sda: Mu hulumu sini ɗa, kapai mu kunumu tumu ɗa a ma ɗa? Peŋ amlai war sakmu kir kai, katu ktai na mu kuɗumu mu suɓmu wiini ɗif na min Alaw tumu kai koo? Wala n’aŋ tumu ɗa a ma ɗa?

⁸Ɗif zi sda a wiyini seŋ wiini Sawul a muɗa: Sulai ktai zi arzaŋ t'aŋ pa, aga mu sitini wiini ɗif na min Alaw ɗa, ni ga a siɓkutumu futi na mu tukutumu ɗa.

⁹-Aɗipar aha war Izrayel ɗa, na ɓa ɗif a hala li min ɗif na min Alaw kapai a talaŋ ɗa e miɗi ɗa ɓa: Hulumu min ɗif n’a sɗa wala na wuze ɗa, buri ɓa ɗif na tiyana e yikiŋ ɓa ɗif na min Alaw na ɗa e ɗi ka e yikiŋ ɗa ɓa: "Ɗif n’a sɗa wala na wuze".

¹⁰Sawul a miɗini wiini ɗif zi sda ɗa: Seŋku pɗem! Halasi hulumu sini! Nɵa e hili war fuŋ n’abai na ɗif na min Alaw aŋ woni ɗa.

¹¹Won hlai n’e ɗa hili sin fuŋ n’abai ɗa sek ɗa, e niviɗi bulamai n’ehilisi aŋ bili yem, e zilbiɗi: Ɗif n’a sɗa wala na wuze ɗa aŋ won na ɗi?

¹²Ɓulamai ɗa e wiyiɗi seŋ: Nkam aŋ wuzaki, amma hala witaw, a halasi na ɗa girna, buri ɓa ɓaka na wiiɗi ɗai zi zi a na, war hlai zi ɓaka,

¹³Ki hili li tiyana ɗa, aga ki niviŋ maa a niya amai amai war hlai zi ɓaka aŋ suma kai hai. Ɗai aga e tiki piɗi aŋ simi wuzani par kaalai, buri ɓa aga a ɓaka ɓaka na wiiɗi ta haw, kapai asakal par, ɗai n’e yikisi e kiɗi e simi ɗa ɵa. Nɵa hili tiyana, aga ki niviŋ ka blaŋ.

¹⁴Won hlai n’e cû aha war fuŋ n’abai ɗa, e nivi Samuwel a niyasi edi kapai a hala amai war hlai zi ɓaka ɗa lai, nɵa a halasi miɗi.

¹⁵Mefeŋ na wuzani gizini Sawul par ɗa, EPIƊ-ƊAI a zini zaida wiini Samuwel ɓa:

¹⁶Dawai, futi mai hanɗa ɵa ta ɗa, aga mu ɵinukuɗi ɗif na midini afti na wiini Benyamin par, aga ku mini emel n’e tiki ɗai war sda gaini midini, kapai a za aŋ pai midiɗi ɗaiɓa na Izrayel.

¹⁷Won hlai na Samuwel a tala Sawul, EPIƊ-ƊAI a miɗini, ɗif na mu muɗuku gaini ɗa a na hlasi, a ni na spak aga a sa tini aŋ ɓa midiɗi ɗaiɓa.

¹⁸Sawul a hlasi gobi sini Samuwel ha min magalani fuŋ n’abai, a miɗini: Za barka siɓkaɓa dalam na wiini ɗif n’a tala wazagai na wuze ɗa?

¹⁹Samuwel a miɗini wiini Sawul: Ɗif na tala wazagai na wuze ɗa mu ta mal. Halasi gaya amai war hlai zi ɓaka ɗa: Ki simi girna gaya, aga mu suku futi aŋ waya ɗa sai gorof par, wala na ku halasi burini ɗa aga mu suku gaglaini lai.

²⁰Ku huwya suku burini ablehökai n’a wula edi mefeŋ girna hu ɗa kai, e niviŋ ya. Wala na pɗem gara aha war Izrayel ɗa, a wiini asiya ɗa? A wiiku gaini pinzibani apuku lai kai ɗi?

²¹Sawul a waya seŋ a miɗini: Ta mu na war pinzibani Benyamin par, war pinziba n’agwi piɗi marɗi na war Izrayel. Piɗi humuni na wiya a n’agwi pini marni na war pinzibani Benyamin ɗa lai, ku muɗaŋa mai hanɗa ɵa ɗa maɵa maɵa ɗa?

²²Samuwel a yima Sawul gaini ɗifni zi sda pini, a kiɗi amlai war dalam n’e simi woni ɗa. A siɗi hlai edi wuzaɗi marɗi, n’e zi paŋ ɗai gobi doogo doogo hu.

²³Samuwel a miɗini wiini ɗif zi di simi ɗa maini nɵa: Kasi simi na mu suŋku, na mu muɗuku gaini ɓa: Ku tikaŋ edi kiini ta ɗa.

²⁴Ɗif zi di simi ɗa a kitisi ɓuli gaiɗi giɗiri ɗa, a tikiŋni wuzani Sawul. A muɗa: Hanɗa a wala n’a zizina buriku, tikaŋ wuzaku ta, sumaŋ, a wala na mi guɗumuŋku ka buri diŋgi zi firiyi hanɗa.

²⁵E niyisi amai war hlai zi ɓaka par, azumai war fuŋ n’abai ɗa, samuel a hina aŋ haɗa kalaŋ gaini Sawul amai midini daba zi mili ɗa.

²⁶Dawaini ɗa, e fiki amai gorof, won hlai na hlai a na rum rum hai, Samuwel a yika Sawul amai midini daba zi mili ɗa par a miɗini: Faka amai, kapai mu tukuku puku war futi ɗa ta. Sawul a fakasi amai, gai suliɗi paŋ e niyisi anene piɗi marɗi, Sawul lai Samuwel lai.

²⁷Won hlai n’e cû gobi e niyi edi war fuŋ n’abai par ɗa, Samuwel a miɗini wiini Sawul: Miɗini wiini ɗifku zi sda buri a halaɗi ka wuzamu sek agwi, ni a vugaɗi wuzaɗi. Samuwel a waya a miɗini wiini Samuwel: Diya ka agwi haw, kapai mu muɗuku seŋ n’Alaw a muɗaŋa ɗa.