Read Moyon Naga METHIU 10 Bible Online

METHIU 10 - Moyon Naga bible

METHIU 10

¹Jesu ing asebok suum ariinii aechu eenka, umlae aechu ithurchehnii, riirae mangkhiing vokhehkho ina aajaeh mandam chehnii ruwreng apeehpae.

²Sebok suum ariinii ae ruming chuve; Pitar taka a-eenniichak Simon, vokhehkho anaepa Andru; Jebedi sapa Jems vokhehkho anaepa Johon;

³Philip, Bartholomiu; Thomas, Methiu ree ikhuum; Alphius sapa Jems, Thadius,

⁴Kanaan tanii Simon vokhehkho Jesu arensah Judas Iskariot ipae.

⁵Havana sebok suum ariinii ae ningne Jesu ing nungsim thahka achiirpae: Nenuw reentaang mee ae paamting vokhehkho Samaria khuwting ruwhmahruw.

⁶Changvakonchu ama changdenna ymmoh vasah ae Isrel mee ae tingche siruw.

⁷Vasinuwna tongruw, “Thangbaen paam iruwng lipahchu ynneengsa!”

⁸Ina aechu mandamruw, ithii aechu manringruw, ynchor ae chukho mandamruw vokhehkho umlae aechu thurruw. Nenuw ngareh ing nenphava, ngareh inche piruw.

⁹Nenuw nenthuungfhuw nache sana, rupa vakhangnare vokhehkho seer vakhangnare ynringmahruw;

¹⁰lamkhii khaenava tanuwna thuungfhuw, rungop, khingop changmahka thor asae ynnii yngkhii ing reenmahruw. Nong itu meechu ipipham thengna.

¹¹“Amanache khuwruung chang-mahka khuwsung nenvaruwhrae nenuwchu ihebariim vachii mee enruw, amanche aphamchu nemahmahri raentaang ama thohche ongruw.

¹²Nenuw ing eensung tingche nenvaruwh thoh, ‘Neningna idae omlasii’ tanuwna enrutha kuurruw.

¹³Amana een sungna heong mee aenche ibariim ae nave idaechu tungrasiing; changvakonchu ibariimmah ae nave idaechu ynrirasiing.

¹⁴Amanche eensung vokhehkho khuwruung aenche ibariimmah ae naka changmahka nenchong rungaemah ae nave, nengkhina pirkhuwhchu rukhuung nuwna ama maphamchu bathenruw.

¹⁵Ki ing neningna atatak ing kariirnah, vajeer inii nache changchii khuwruung mee ae chungna Sodom re Gomara mee aechu Thangnang ing aning manchuwhseh vaata.”

¹⁶“Rungaeruw, imi ae kaarna jao vaangkhe ichii ing kabathen pachuw; chutahnache nenuw baruwr vaang singruw amanche khunu vaang nenbarungriir dimrasiing.

¹⁷Chang-vakonchu ynriimruw; akhaechuve nenuwchu isuwr vachii mee heong vaatae, enuw ing vajeer eenting iruw vaatae amanche meekongnii ting iruw ae naka ibin vaatae.

¹⁸Enuw ing reentaang mee ae maekungna kakhaena saarkhii ipeehnii lipah aapuh aere iruwng ae maensokna nenuwchu ikiae naka imangiir vaatae.

¹⁹Amana vajeer tunii khaena ynghenruw aere ynchii basangva kente, ynsaangkhe riirva kente ichii khaena barungriir manjamahruw. Apha ahenpha raenche ynchii riirvakate ichiichu neningna ijepivaata.

²⁰Nenuw ing hangchong vanenchii chaap neningtanii mahnii, Thangnang tanii laetha ing ichongpeeh vaata.”

²¹“Mee ae ing enguw enae ae chukho ithehnii khaena pivaatae, amanche empa aengkho havithoh aanghakjaeh ing ensiti ae chukho pivaatae; siti ae ingkho empa aechu rumah ae naka ithehnii ting pivaatae.

²²Mee vakhae ing nenuwchu ki kakhaena ibatir vaatae. Changvakonchu achuw yngkheh inche achinii ipha ing khaangcheh nave ikarpeeh pharem vaata.

²³Khuwruung yngkheh nache nenuwchu ijachaam ipiae nave reentaang yngkhehting ympeenruw. Ki ing neningna atatak ing kariirnah, Mee Sapa inche ajuwngmahri raentaang nenuw ing Isrel ae khuwruungna nong nentuchu manchichehmah tanuw.”

²⁴“Aanchuw mee chungna atam mee ing iruungseh mahva; aafhuw chungna suwh ing iruungmahva.

²⁵Chukhaenache aanchuw mee vaangche atam mee ingkho penvachiiva, amanche suwh ingkho aafhuw vaang penvachiiva. Eensung aafhuwchu Beelzebul nave, ama eengkuwchu aajaehmeh sakmah vaate!”

²⁶Chukhaenache enuwchu chiimahdeh aeruw, akhaechuve yndangmah chaapchu hungandang chirvaata, amanche ynthuur chaap-chu hunganphuwng chirvaata.

²⁷Ki ing ynthimna kariir chong havi nenuw ing ireng nache chongruw, amanche nengana ing nensii vakhae havi phuchungting karnuwna manthangruw.

²⁸Chukhaenache hakchaang thehchehka laetha atheh chehmah enuwchu chiimah aeruw; changvakonchu laetha re hakchaang aaniimeh mamaangcheh vachii Aafhuw chu athiseh ing chiiruw.

²⁹Vasak asae ynniimeh pesa yngkhehna juwrmah chuwkhang? Vokhehkho nenpa ing aru dernamah naka engkaartanii yngkhehpangkho ruwruwna bukmahnii.

³⁰Nenrusaena sambur aangkheng chukho ateenchir vasahva.

³¹Chukhaenache ynchik mahruw; nenuw chuve vasak ae chungna nemen iruwhakva.

³²Chukhaenache mee ae maekungna ki ynru mee chuve, ki ingkho thangbaenna ong kapa maekungna ruvakata.

³³Changvakonchu mee ae maekungna kichu ynrumah mee chuve, ki ingkho thangbaenna ong kapa maekung nache rumahning.

³⁴Ki i laaruw paamna idaechu ipeeh ijuwngva ichii ing manden mahruw; Ki idaechu ipeeh ijuwngmahping, changvakonchu laar tuknii chem ipeeh ijuwngping.

³⁵Amachuve asapa ing ampa aruniimah, asanuw ing amnuw aruniimah, ameenuw ing ampuw aruniimah khaena ijuwngping.

³⁶Amanche mee ajeehniichu eengkuw sungsah kaartanii vaata.

³⁷Amnuw ampa aechu ki ithi ing aning amansiih meechu kakhaena matik chamah; amanche asapa asanuw aechu ki ithi ing aning amansiih mee chukho kakhaena matik chamah.

³⁸Amanche akhros sahchu idomnaka kaanuw ajiimah meechu, ki kakhaena matik icha mee mahva.

³⁹Ataksah alaetha karsa ningka achii mee chuve maangvaata; amanche kakhaena alaetha abathencheh mee inche ikarpeeh phavaata.

⁴⁰Nenuw ymbariim meechu ki ymbariimva, amanche ki ymbariim mee inche ki ynjebathen Thangnang chu abariimva.

⁴¹Thangnang chong ajeer ahebariim mee inche Thangnang chong ajeer yngkheh ing phavachii nongmen phavaata; ichum ynthiing mee ahebariim inche ichum ynthiing mee yngkheh ing phavachii nongmen phavaata.

⁴²Kaanuw ajii yntuur mee ae kaarna yngkhehchu achuw yngkheh ing chii pinave, ki ing neningna kariirnah, ama mee inche phavachii nongmenchu maangmahnii.