Read Moyon Naga METHIU 12 Bible Online

METHIU 12 - Moyon Naga bible

METHIU 12

¹Apha ichiinache Jesu ing Deennii iniina asebok aethoh ruwchimna envasiraenche asebok ae enven chaamka sabar chim aeka ensah.

²Changlaenche Pharisi aeng emutah nache Jesu ningna enriir, “Enla, nasebok aeng Deennii iniina chonghak ing arumah iser nong entupa.”

³Amana Jesu ing abasang ae, “Devit vokhehkho aanruwfhuw aenche enven achaamtahna ynchii atu ichiichu nenuw nenpamahva?

⁴Ama ing rumniieen sungting ynsaangkhe varuwhka chonghak ing arumah vokhehkho jaethiim mahnaka enuw ing isah arumah tarchu asahpae?

⁵Amachupang mahka Deennii iniina jaethiim aeng rumniieenna Deennii nongruwchu tumahkhang ae nakho enuw raarmah ae ichii Mosi chonghak na ynziihchu nenpamahva?

⁶Chukhaenache neningna kariirnah, rumniieen athiseh ing iruung hane ongna.

⁷Changvakonchu ki ing ningchuwhchu kaadikva, chaatha ipeehchu idikmah ing. Nenuw ing havi ynchii achiiniiva ichii manghuw tanuwve, emiraar omah mee aechu manraar mahva nenchiiva;

⁸Mee Sapa i Deennii Aafhuw chuva.”

⁹Jesu ing engongnii maphamchu maka meekongnii tingche vaksa,

¹⁰amanache akik yngkheh ithiipoh sapa yngkheh heong. Amana Jesu chu manraar kenta ichii mee topoh heong aenche aningna asii ae, “Deennii iniina ina yndam aruvakhang?”

¹¹Jesu ing eningna ariir, “Nenuw nengkaarna achuw yngkheh jaochu Deennii iniina yngkuwng sungting buknacha, ama ing jaochu isuwmah niikhang?

¹²Jao chungna mee ing amen ruwhakna! Chukhaenache isa nong chuve Deennii inii nakho itu chonghak ingkho arusa.”

¹³Changlaenche ama ing ina mee ningnache ariir, “Nakik kha hengathohla.” Akikchu ahengathoh tahnache paangkheh tanii akik vaangkhe damkiirsa.

¹⁴Chutahnache Pharisi aechu anikungna taangting jungsuwh aeka ynsaangkhe Jesu havi thehvaan chiiva ichii chong emanseerpa.

¹⁵Jesu ing amachu amanghuw tahnache engongnii aphamchu abathenpa; amana mee inempak inche Jesu aanuwchu enjiipa. Ama ing ina vakhae aechu amandampa,

¹⁶vokhehkho atak i achuwva ichii riirmahdehruw taka iruwpak ing chong ajeerpa.

¹⁷Havi jaephar Isaia ningna Thangnang ing amanriir vasah chongchu ahungchumnii khaenava:

¹⁸“Enruw, ki ing kaateer vasah kameenae, aningna kabarungriir inempak ingam kaning kamansiih chuva; ataklina kalaetha thinva kata,

¹⁹ama ing reentaang mee ae ningnache ichumchu mandang vaata.” “Amave ynchehjaar mahnii, vokhehkho uungmah dehnii, lamfhuwna mee ing aaruurkho siimahnii.

²⁰Ama ing ichum vajeer inche acheh mahtaang, thingkiir tikho khiihmahnii, Mi ichuwh chukho thehmahnii;

²¹amanche thingna tikho manchir mahnii, aningnache reentaang mee aeng ningmanden mangom vaatae.”

²²Changlaenche umlae ichuwng amik ichu achong isuwhmah mee yngkheh enveruw. Jesu ing amachu amansak tahnache achong suwhsa vokhehkho imukho amupa.

²³Chu-khaenache mee vakhae ing engik lamher ing ariir ae, “Havi Devit sapa khamah vakhang?”

²⁴Changvakonchu Pharisi ae ing ensiitah nache ariir ae, “Umlae aafhuw Beelrzebul ruwreng jaarmah naka mee havi inge umlaechu thurcheh mahnii.”

²⁵Jesu ing emandenchu amang-huwtah nache eningna ariir, “Iruwng lipah sungna ynlehmah nave lipah kiina. Amanche khuwsungna vokheh-kho eensungna ynlehmah nave ipaar chehmahnii ae.”

²⁶Chutahnache umlae ing umlae thurcheh nave embingna ynleh mahpae, vokhehkho alipahchu ynsaangkhe paarva chiiva?

²⁷Ki ing Beelzebul ruwreng jaarna umlaechu kathur vanave, nenuw nensiti aecha achuw ruwreng jaarna thurva chiipae? Chukhaenache nentaklina enuw ing vajeer aafhuw ynsuwh vaatae.

²⁸Changvakonchu ki ing Thangnang laetha jaar ing umlaechu kathur vanave, atatak ing neningna iruwng lipahchu thengsa.

²⁹“Changmah naka achuw yngkheh ing ipirpak eenna varuwh naka atakchu maensa ing phuwpmah tanga naka apeehchu ynsaangkhe richehva takhang? Atakchu phuwpvaang naka a-een sungna peehchu richehpeh vaata.”

³⁰“Kithoh ynruwhakmah meechu eejeehniiva vokhehkho kithoh akhuumhakmah meechu eengkhiiva.

³¹Chukhaenache ki ing neningna kariir-nah, isii chaap vokhehkho ithipak ing ichong vakhang nakho kuhpeeh vaata, changvakonchu ynthiing laetha taklina ithipak ing ichong mee chuve ikuhpeeh phamahnii.

³²Achuw yngkheh ing Mee Sapa takline arumah ing chongkhang nakho kuhpeeh vaata; changvakonchu ynthiing laetha taklina arumah ing ichong mee chuve ataraenkho amanche ringseeh nakho ikuhpeeh phamahnii.”

³³“Thingbur chu saknave aanlakho sakvaata amanche thingbur chu sakmah nave aanla chukho sakmahnii. Athingbur isamah isachu aanlana naevaata.

³⁴Baruwr sitiae, nentakcha nensakchah ing ynsaangkhe isachu chongchehva nente? Abarungriirna amandenchu aner ing hangchong pehva.

³⁵Isa barungriir areen mee tanii isa suwhna amanche isamah barungriir areen mee tanii isamah suwhna.

³⁶Changvakonchu ki ing neningna kariirnah, achuw yngkheh ing ikaniimah chong ichongchaap vajeer inii nache hemandang savaata.

³⁷Akhaechuve nachong inuwzii ing imanchum vaata amanche nachong inuwzii ing imanraar vaata.”

³⁸Changlaenche thiimthang aere Pharisi ae ing aningna enriir, “Oja, naningtanii kenuw ing laetho yngkheh munungka kenchiinah.”

³⁹Jesu ing abasang ae, “Ichamah vokhehkho rupanuwna ichuwhmah siti ae ing laetho mandangnii khaena ajongnah ae; changvakonchu jaephar Jona laetho mahnaka yngkheh pangkho pimahning.”

⁴⁰Jona ing iruungpak nga vensungna siimthum jaenthum ynthin vaangkhe, Mee Sapa chukho ynthin vaata.

⁴¹Nineva mee ae ing vajeer inii nache ataen siimnii suwnthar siti aethoh hangiir ae naka nenuwchu imanraar vaatae; akhaechuve enuw ing Jona thamin itongna embarungriir enghuungpa, amanche enruw, Jona chungna iruungseh hane ongna.

⁴²Khuwbur irip tanii iruwngnuw vokhehkho ataen siimnii suwnthar siti aethoh hangiir ae naka nenuwchu imanraar vaatae; akhaechuve iruwngnuw ing laaruw paam adongnii tanii Solomon ising iveerchu siisa kata taka itheng, amanche enruw, Solomon chungna iruungseh hane ongna.

⁴³“Umlae inche mee yngkheh ningtanii hungsuwhka chii omah paamting baverka aongnii ajongcha tuwhmahsa.

⁴⁴Aanuwnache ama ing atii ki ing kamah een tingkhe athar hunganritah kata taka ahunganritah nache eenchu aruwh ing heomsa, ynruwhpehsa vokhehkho mamaennii vaangkhe heomsa.

⁴⁵Amana aarang vajong reehka ama ithi ing ichamah umlae sariimeh asungting ruwh aeka ongsae. Amanache ameechu amaensa nakha ithi ing aningkuur ing sakmahsehsa. Havi vaange hava suwnthar nenkho isamah i hungsuwh vaata.”

⁴⁶Jesu ing mee ae ningna achonglae enruw, amnuw re anae ae ing aningna chong riirnungka ta aeka enghah.

⁴⁷Chukhaenache mee yngkheh ing aningna ariir, naningna chong iriirnii khaena nangnuw re nanae ae ing taangna ynghahnah ae.

⁴⁸Jesu ing abasang, “Achuwva ki kanuwchu? Achuw aepae ki kanae aechu?”

⁴⁹Ama ing asebok aechu man-tika ariir, “Hanene kanuw vokhehkho kanae aechu ongnae!

⁵⁰Akhaechuve thangbaen paamna ong kapa ing amanden nong atu meechu ki kanaeva, ki kasar chuva amanche ki kanuw chuva.”