Read Moyon Naga METHIU 14 Bible Online

METHIU 14 - Moyon Naga bible

METHIU 14

¹Apha ichiinache Jesu ajae isi khaena Galili aapuh Herot iruwng ing asiipa.

²Amana Herot ing ameenae ningna ariir, “Havi atatak ing Baptis Johon chuva; ama ithii tanii hangringsa, chutahnache ama ing laetho nong havi atuchehva.”

³Herot ing amaensana Johon chu suwrka kaeshum ting asiih. Havi akhaechuve Herot ing anaepa rumee Herodias chu aadik khaenava.

⁴Akhaechuve Johon ing Herot ningna ariir, “Nang ing nanaepa rumee buwhkata nachii i vajeer kiina.”

⁵Chukhaenache Herot ing Johon chu thehningka takhang nakho, Jehudi mee aanem aenche Johon chu jaephar yngkhehva ichii ing emanden khaenache ynchikka itheh chehmahsa.

⁶Changvakonchu Herot atak apuhnii inii nache Herodias sanuw rupanuwti inche mee vakhae maensokna ahung-laam tahnache Herot pendehka

⁷ama ing rupanuwti ningnache chongreep atu, “Ki ing chongreep katunah, nang ing ynchiiva ynniih chiichu pivakachii!”

⁸Amnuw ing chong atah inuwzii ing havane Baptis Johon rusae pakaan nache ipira taka aniihpa.

⁹Amana iruwng abarungriir inempak jaasa, changvakonchu ama ing aarang ae kaarna chongreep atudoh vakhaka, Johon rusaechu rupanuwti ningnache ipeehnii khaena arupa.

¹⁰Chutahnache iruwng inche amee vechiirka kaeshumna Johon rusaechu entenpa.

¹¹Arusae chu pakaanna henchiaeka rupanuwti ningnache empeehpa, amana henchika ama ing amnuw ningting apeehpa.

¹²Johon sebok aenche vak aeka ithiichu idom aeka endimpa; aanuwnache enuw ing Jesu ningting vak aeka entongpa.

¹³Jesu ing Johon khaena chongchu asiitah nache, ama ing ruwkuwng ongniika asiksii apham yngkhehting ympeensa. Changvakonchu mee aenche ensiitah nache, ama ama akhuwruung tanii hungsuwh aeka enjejiipa.

¹⁴Jesu ing ruwkuwng tanii jungchumka chifhuw aruvaenache ahungsirae mee inempak ongchu amutah nache ama ing aning amanchuwhpae, amana ina vakhae chukho amandam chirpa.

¹⁵Atii khuri ajungvitah nache sebok aeng Jesu ningna ariirpae, “Hava min i michuwr daena vokhehkho ithirkho thirsa. Mee vakhae i khuw khuw ting ensahfhuw thaemin ynrii sisa aerasiing.”

¹⁶“Enuw simah aerasiing, ensahfhuwchu nenuw ing piaeruw,” taka Jesu inche eningna abasang.

¹⁷Kenuw ing havane tar asae runga re nga asae ynniipang kenchitahsa enchii.

¹⁸Amachu kaningting henchiruw taka Jesu ing ariirpa.

¹⁹Amana Jesu ing mee vakhaechu fuwr kaarna ongruw taka ariirpa; Ama ing tar runga re nga asae ynniimehchu averi nuwna thangbaen ting hengenka bor apeehpa vokhehkho tarchu bakhiika asebok ae ningting jepika, sebok aenche mee aechu empeehpa.

²⁰Amana mee vakhae inche enven ynva ing ensahpa. Amana abariichu buruk suum ariinii emangkong.

²¹Asah mee vakhaechu rupanuw naepang ynvaeru ing mee lising runga vakhaeva.

²²Jesu ing mee vakhae amang-kaepha raenche asebok aechu maen ing ruwkuwngna ahemansipa.

²³Mee vakhaechu amangkae aanuwna ama ing reen ting ithamnii khaena hangkarsa. Amanache khuri ipha ing asanaen inche ongsa.

²⁴Changlaenche khuwsii ynleh ing chifhuwchu manohka ruwkuwngchu chifhuw rikting omsa, akhaechuve asiiraangchu asiksiisii ing raangsa.

²⁵Jesu ing ziing apha ynthum re kuruk ruwrakna chii taklina asebok ae ningting akhi ing vasisa.

²⁶Jesu ivasichu sebok aenche emutah nache ngik aeka havive lae varae ta aeka vokhehkho engaanchik inche uungsae.

²⁷Changvakonchu aphachak nache Jesu ing eningna vachongka ariir, “Nenuw nenbarungriir mangamruw, kiping ynchik mahruw.”

²⁸Amana Pitar ing Aafhuw, nang va-taniive chii takline naningting ivaknii khaena ibasohsar taka Jesu ningna averiir.

²⁹Jesu ing vakla taka abasang. Chutahnache Pitar ing ruwkuwng tanii hangiirka chii taklinache sika Jesu ningting vaksa.

³⁰Changvakonchu siiraang ipirchu amutah nache ynchiksa, vokhehkho chii inche arup ynthong tahnache Aafhuw akarsar taka uungsa.

³¹Changlaenche Jesu ing abaen ajejamthoh jebachuwka ariir, “Nathacha aajaehmeh isiingva! Ynchii khaena nachingniiva?”

³²Enuw ing ruwkuwng ting enghangong chakthoh siiraangkho daesa.

³³Amana ruwkuwngna ong sebok aenche Jesu chu rum aeka enriir, “Atatak ing nang i Thangnang sapa chuvachii.”

³⁴Enuw ing chifhuwchu iraen aeka Genesaret ichii paam nache hungtungsae,

³⁵changlae amanache heong mee aenche achuwva ichii emanghuw vasahva. Chukhaenache ama paamna ong mee ae ningnache manthang aeka ina aangkheng aningting enveruwpa.

³⁶Enuw ing Jesu peendiir abasuwrpang chukho ina aeng iparnii khaena aningna thamsa aeka apar mee vakhae aechu idamkiir aphasahpae.