Read Moyon Naga METHIU 18 Bible Online

METHIU 18 - Moyon Naga bible

METHIU 18

¹Apha ichiinache sebok aeng Jesu ningna theng aeka asiisah ae, “Thangbaen iruwng lipah nache ruungseh vachiichu achuw vachiiva?”

²Amana Jesu ing naepang yngkheh ve eenka engkaarna mangiirka

³vokhehkho ariir, “Ki ing neningna atatak ing kariirnah, nenuw ing ynguur tanuwka havana naepang ae vaange tamah tanuwve thangbaen iruwng lipahchu phachehmah tanuw.

⁴Changvakonchu achuw yngkheh ing naepang vaange ataksahchu ynjuursa nave, iruwng lipah nache ruungseh vaata.

⁵Achuw yngkheh ing ki karumingna naepang yngkhehchu aning amansiih ing kemsa nave kichu yngkemsahva.

⁶Changvakonchu achuw yngkheh ing havana naepang ae inge ynthacha ae i isiiting babuk nave, ama meechu ariingna rungsum iruungpak yngkheh yngkhaenaka ithuwhpak chifhuw ting iren inche akhaena sakseh vaata.”

⁷Laaruw paamne isiiting buknii aomtah nache aajaehmeh ijaniiva, akhaechuve havi isuwhmah rumah, changvakonchu isiiting babuk vachii mee taklinache ijaniisapa.

⁸“Nakik vokhehkho nakhi ing isiiting ibabuknii vachii vanave tennana renla; nakik nakhi ikip ing isiiting bukva nachii changve, nakik nakhi ikipmah ing iring napha inche nakhaena saksehna.

⁹Amanche namik ing isiiting ibabuknii vachii vanave iphernana renla, namik ikip ing isii mi sungting bukva nachii changve, namik yngkhehpang om ing iring naphasah inche nakhaena saksehna.”

¹⁰Nenuw ing naepang ae havi yng-kheh pangkho nenrathiihniimah ing ynriimruw; akhaechuve neningna ki ing kariirnah, “Thangbaenna ong vaarmee aeng engkhaena kapa maechu apha vakhaena engenjaehnah.

¹¹Akhaechuve Mee Sapa ing ymmoh aechu ikarnii khaena juwngsa.”

¹²“Nenuw ynchii nemandennah? Mee yngkheh ing jao chaama deennaka amanche yngkhehchu ymmoh nave, jao somikuw arii eekuwchu bung nache manaka, ymmoh jao yngkhehchu jong-mah niikhang?

¹³Neningna atatak ing kariirnah, ajao yngkheh ymmohchu tuwhnave, jao somikuw arii eekuw aechu ithi ing jao yngkheh ymmoh atuwh khaenache arotha rohseh vaata.

¹⁴Amathohche aanghak ing havana naepang ae i yngkheh pangkho ymmohchu thangbaenna ong kapa ing amanden chumahva.”

¹⁵“Nauw nanae ing nataklina isii rangnave, nang ing vaknana nenum-pang ing nengonglae araarchu riirla. Amana nachongchu rungaenave nang ing atakchu athar natuwhva.

¹⁶Changvakonchu nang ing nariirchu irungaepeehmah nave, mee ynnii ynthum nertanii saarkhii aomnii ing, mee yngkheh meenii ikheer ing ruw-reehra.

¹⁷Amana chenkho rumah nave ruwrthiing ting manthangla, ruwrthiing chong chukho rungaemah nave, ama meechu lae arum vokhehkho ree ikhuum meeva ichii ing riruw.

¹⁸Ki ing neningna atatak kariirnah, laaruw paamna nenuw ing nenphuwp-chu thangbaen nakho ynphuwp vaata, amanche laaruw paamna nenbathen-chu thangbaen nakho ynthen vaata.

¹⁹Athar ki ing neningna kariirnah amachuve, laaruw paamna mee yng-kheh meenii ing rutanuwka neniihchu thangbaenna ong kapa ing tuvaata.

²⁰Ki karuming nache meenii ynthum pangkho purtanuwve, nengkaarna kikho ynvaeva kata.”

²¹Pitar ing Jesu ningna thengka ariir, “Aafhuw, kauw kanae yngkheh ing kataklina isii tunave vajaehchak ipha ing kuhpeehva kachiiva? Vasarii pangva chiiva?”

²²Jesu ing abasang, “Ki ing naning-na kariirnah, vasarii pang mahva changvakonchu vasomsarii arii sarii ipha ing vachiiva.”

²³Chutahnache thangbaen iruwng lipahchu laaruw paamna iruwng yngkheh ing ameenae thoh seer empha isi vakhae isajaeh ing manvuwh chirka asiihthoh aanghakva.

²⁴Iruwng inche seer empha isi aang-kheng amanvuwhrae, aseer talen lising suum atuur mee yngkheh aningna ahenruwpae.

²⁵Amachu ipha ing alertuurchu singcheh mahsa. Chutahnache iruwng inche ariirpa, arumee, asiti amanche apeehchae aangkheng juwrchir nuwna alertuur i singnii rasiing taka chonghak apeehpa.

²⁶Seer atuur mee inche rumka athamsahpa, “Ki ing katuur seer chaap singsa vakachii apha topoh ihahsara.

²⁷Iruwng inche aning manchuwhka alertuur chaapchu kuhpeeh chirka amangkaepa.

²⁸‘Changvakonchu ama ing aangkaerae dinari chaama atuur meenae aarang yngkheh yntuwhsae; chutahnache aarangchu suwrka ariingna irahka seer yntuur chiika ising behra taka asiingpa.

²⁹Chutahnache aarang inche rumsaka, kaarang apha topoh pangti ihahsara taka athamsahpa.

³⁰Chang-vakonchu ama ing rumahka atuurchu asingmahritaang atakchu kaeshum sungnache asiihpa.

³¹Amana isuwh vakhaechu aarang areh aenche emutah nache nungaemahdeh aeka iruwng ningnache ahungtongpae.’

³²Aanuwnache iruwng ing amachu eenka ariir, Ichummah meenae nang ing nalertuur khaena ynthamsahtah nachii ki ing nalertuur vakhae kakuhpeeh chirmah vachiikhang.

³³Ki ing nangchu kaning kamanchuwhchii vaangkhe, nangkho naarang havi naning manchuwhmah taniikhang?

³⁴Aafhuw inche amachu abarung mansikka, alertuur vakhaechu asing-chir mahtaang atakchu ponti pinii khaena kaeshum aapaanii tingche apeehpa.”

³⁵“Chukhaenache nenguw nenae aechu nenbarungriir sungna nening manchuwhmah tanuwve, thang-baenna ong kapa inche aanghakjaeh ing nentaklina chenkho tuvaata.”