Read Moyon Naga METHIU 27 Bible Online

METHIU 27 - Moyon Naga bible

METHIU 27

¹Khuw ahungvaar thoh, aanchung jaethiim aere, aan-chungpuh aenche Jesu chu ithehnii khaena yntuwh aeka emanseerpa;

²amanche enuw ing Jesu chu phuwp aeka lipah aapuh Pilaat ningtingche enruwpa.

³Changlaenche Jesu arensah Judas ing Aafhuw taklina miraar empeehchu amutahna ynsiirsaka abarungriir ahuungpa; amana khampher somthumchu aanchung jaethiim aere upa ae ningtingche vechika ariir,

⁴“Ki ing amiraar ichah mee takline karensah i isii kareenpa. Amana enuw ing embasang, “Kenuw kengaanvaenii ynchii omkhang? Nataksah ing manghuwsara.”

⁵Amana khampher somthumchu ama ing rumniieen nache renka jungsuwhsa; amana sika ama runoh ing ynlahka thiksa.

⁶Changvakonchu aanchung jaethiim aenche khampher somthumchu ichuwm aeka enriir, “Havi ynthiing seerbuwrna ithin vajeer kiina, akhaechuve havi sii ynta amenva.”

⁷Amana enuw ing chong manseer aeka, khuwr mee ae yndimnii beer seemnii ingkhon bir yngkheh engariiniipa.

⁸Chukhaenache ama ingkhon birchu sii ingkhon bir ta aeka ataraen phanii ing aruming ymphuwka omna.

⁹Amana jaephar Jeremia ing ariir chongchu hungsuwhsa amachuve, “Isrel siti aenche amen ymbuw vasah ae khampher somthum inche ingkhon birchu enuw ing engariipa;

¹⁰amanche Aafhuw ing kaningna ariirvasah vaangkhe, enuw ing beer seemnii ingkhon bir khaenache enuw ing amenchu empeehpa.”

¹¹Jesu ing lipah aapuh maensok nache ngiirsa; amana lipah aapuh Pilaat inche aningna asii, “Jehudi ae iruwngchu nangvachii?” Jesu ing abasang, “Nang ing nariir chuping.”

¹²Changvakonchu aanchung jaethiim aere upa aenche miraar empeeh raenche Jesu ing basang peehmah ae.

¹³Chutahnache Pilaat ing Jesu ningna athar vokheh ariir, “Nataklina hangjaehmeh ichummah saarkhii empeeh i nangcha nasiimahva?”

¹⁴Changvakonchu enuw ing Jesu taklina miraar empeeh vakhaechu yngkheh pangkho abasangmah tahnache lipah aapuh inche inempak ngiksa.

¹⁵Atii manlaennii kuurva chaap nache kaeshumna ong mee yngkheh chuve Pilaat ing abathenchak.

¹⁶Changlaenche Barabas ichii icha-mahna aruming isi yngkhehkho kaeshum nache ong.

¹⁷Enuw ing empurpoh raenche Pilaat ing eningna ariir, “Barabas re Jesu Khrista i nenuw ing achuwkha bathen naka ynchiinahchuw?”

¹⁸Akhaechuve Jesu i kallak aeka enuw ing ensuwrva ichii amanghuw tahnava.

¹⁹Amachupang mahka ama ing vajeer tunii ongniina aonglae, arumee ing aningna mee vechiirka aman-riir, “Ichum mee taklinakhe nang ing yntanga manrumahra, ki ama akhaena ajaennii karumangna inempak ijachaam kapha.”

²⁰Changvakonchu aanchung jaethiim aere upa aenche Barabas chu ynthennii khaena ithoh aeka amanche Jesu chuve ithehnii khaena engathohpa.

²¹Lipah aapuh inche athar vokheh ariir, “Havana mee ynniimehne achuwkha bathen naka ynchii nahchuw?” Changlaenche enuw ing Barabas ta aeka enriir.

²²Chutahnache Pilaat ing eningna ariir, “Chunuwcha Khrista ichii Jesu icha ki ing ynchii manruva kachiiva chang?” Changlae enuw vakhae ing khros na ynjam rasiing ta aeka aningna enriir.

²³Amatah nache ama ing ariir, “Ynchii khaenava, ama ing ynchii ichamah tukhang? Changvakonchu enuw ing khros na ynjam rasiing ta aeka uung sesehsae.”

²⁴Amana Pilaat ing ynchii tangakho tuchehmahsing ichii amanghuwpa, amachupang mahka phusiir phuraang suwhsehseh vachii ing amutah nache chii verika mee vakhae maensokna akik chaamka ariir, “Havana mee asii takline ki kamiraar yntanga ynvaemah; nenuw nendeisah vatah.”

²⁵Amana mee vakhae ing basang aeka enriir, “Ama asii i kentaklina vokhehkho kensiti ae taklina om rasiing.”

²⁶Amatah nache Pilaat ing Barabas chu abathenpa, amanche Jesu chuve binka khros na ijamnii khaena amansirpae.

²⁷Lipah aapuh alaarchang aenche Jesu chu vajeernii eenting ruw aeka amanche laarchang ruwr aangkheng aeng Jesu kuurna yngkongsae.

²⁸Amanche enuw ing Jesu apeendiir-chu siihchir aeka isen peen emansingpa,

²⁹vokhehkho enuw ing iring naakhum phaen aeka arusaena emangkhum, amanche akik tachangna rumor amanchiae. Amana amaensokna engkhi mansin aeka enuw ing enriir, “O, Jehudi iruwng!” ta aeka emaniisah ae.

³⁰Amana enuw ing amaena bachir aeka rumorchu siih aeka amanche arusaena emanvarnii.

³¹Changche ichii ing enuw ing emaniisah nuwna peen ynsuwr emansingchu siih aeka, amanche Aafhuw ataksah peendiirchu maniireeh aeka khros nache ijamnii khaena enruwpa.

³²Enuw ing enghungsirae, Sairene tanii itheng aruming Simon ichiichu yntuwhsae, amana enuw ing atakchu arumah brom ing Jesu khros chu amandompae.

³³Amana enuw ing Golgotha ichii rusaeruwh omnii minchu emphathoh,

³⁴enuw ing Jesu ningna samit ikha re vomrip chii manvaenoh aeka empeeh, changvakonchu Jesu ing amantentah nache inningka tamahsa.

³⁵Enuw ing Aafhuw chu khros na jam aeka, apeendiirchu achuw ingkhe phavachiiva ta aeka laepah ennii khaena ensem;

³⁶vokhehhko ong aeka Aafhuw chu enrung.

³⁷Amana Aafhuw ruchung nache miraar empeehnii ynziihchu entaar: “Havi Jehudi ae iruwng Jesu chuva.”

³⁸Changlae Jesu thoh ynruw ing lamruw meeniimeh aekho yngkheh inche Jesu atachangna amanche yngkheh inche atariting khros nache enjam ae.

³⁹Changlaenche akuurpaangna isi aeng enrusae hungreh vereh aeka ithipak ing ichong thoh ynruw ing enriir,

⁴⁰“Rumniieen mamaangchir naka inii nithumna mangiircheh vachii nataksah yngkarsara! Vokhehkho Thangnang sapa vataniive khros tanii jungchumla.”

⁴¹Changche ichii ing aanchung jaethiim ae, thiimthang ae, vokhehkho upa ae ingkho maniisa aeka enriir,

⁴²“Mee reentaang chuve karchehka; ataksah chuve yngkarcheh mahsa. Ama Isrel ae iruwng vanave atak khros tanii jungchum rasiing, amanache kenuw ing aningna thacha kenta.”

⁴³Ama ing Thangnang athachava; Thangnang ing rupeeh nave atarae aphane karlasiing akhaechuve, “Ama ing ki Thangnang sapa ping taka ariir khave.”

⁴⁴Aafhuw thoh ynruw ing khros na enjam lamruw aengkho changche ichii ing Jesu chu emaniisah ae.

⁴⁵Atii apha kuruk na ing apha eekuw ipha ing paam aangkheng manthimpohsa.

⁴⁶Amanche apha eekuw ahungtak phana Jesu ing iruur ipirpak ing uung, “Eloi, Eloi, Lama Sabakthani? Havi achiinii chuve Ka Thangnang, Ka Thangnang, ynchii khaena nang ing kichu ymbathenvachii?”

⁴⁷Amana akuurpaangna ong mee topoh aeng ensiitah nache, ama ing Elija a-eennah enchii.

⁴⁸Changlae engkaar tanii mee yngkheh ing vataenka haesiimna ithuwr chii ikha isip Jesu ningting innii khaena ahenpeeh.

⁴⁹Changvakonchu mee areh aenche, hahra, Elija ing ama ikar ithengmah itheng entaruw enchii.

⁵⁰Athar vokheh Jesu ing iruur yndang ing chi rika alaetha tasamsa.

⁵¹Amana enruw, rumniieen sungna laedenpeenchu achungna ing thang ipha ing ynniimeh isuwh ing arikna ynsiihsa; amanche ruwruwkho ynnuhsa, rungkho kiisae;

⁵²thaen-kungkho ymmongsa, amanche ynthiing mee ithiivasah ae chukho aanem hangringsae,

⁵³Aafhuw ing ahangring aanuwna thaen tanii enuwkho hungsuwh aeka ynthiing khuwruung tingche hungruwh aeka mee aanem maekungna yndang ae.

⁵⁴Changlaenche laarchang chaama aapuh re Jesu aarung mee aenche linglaang thengka ruwruw ynnuhchu emutah nache inempak ynchik aeka enriir, “Atatak ing mee havi Thang-nang sapa varae!”

⁵⁵Changlae rupanuw aanem aengkho laarkhehna ibuwr aeka ong ae; enuw chuve Jesu rukuum tusa aeka Galili na ing aanuw enjii meepae;

⁵⁶enuw engkaar nache Meri Maga-dalen, Jems re Josep amnuw Meri vokhehkho Zebedi sapa ae emnuw ynvae ae.

⁵⁷Khuri ajungvitah nache, Arima-thia khuwruung tanii savangpa yngkheh aruming Josep ichii atakkho Jesu sebok ynsuwh yngkheh mee thengsa.

⁵⁸Ama ing Pilaat ningting vakka Jesu hakchaangchu aniihpa. Chukhaenache Pilaat ing Jesu ahakchaangchu piruw taka arupa.

⁵⁹Amana Josep ing ahakchaangchu idomka, limon peen ynthiingjaeh ing aarompa,

⁶⁰amana thaen ithar isajaeh ing ynvuwhpeh nache Jesu chu amantorpa; vokhehkho ama ing thaenchu iruungpak rung yngkheh ing kamka yngkaesa.

⁶¹Changlae Meri Magadalen vokhehkho reentaang Meri enuw inche thaen thoh laar yndeengna ong ae.

⁶²Deennii aanuw mathang inii nache, aanchung jaethiim aere Pharisi aeng Pilaat ningna yngkongsae;

⁶³amana enuw ing enriir, “Lipah aapuh, amare om mee ingkhe aringrae inii nithumna ki hangring vakata taka ariirchu kenuw ing kengaansiisa.”

⁶⁴Chukhaenache inii nithum ipha ing thaenchu irungnii khaena chonghak bathakla, changmah nave asebok aeng vabaruwh ae naka ithii tanii hangringsa tavaatae. Amana chembe amaensanii marekha athi ing aningkuurnii mare inche sakmahsehnii.

⁶⁵Amana Pilaat ing eningna ariir, “Nenuw aarung laarchang meechu deenchuwka chang; vakruw nencheh vakhae rungsaruw.”

⁶⁶Amatah nache enuw ing vak aeka aarung mee ae ynvae ing rungkamchu ahak nam aeka, vokhehkho thaenchu isajaeh ing emanrungpae.