Read Moyon Naga METHIU 28 Bible Online

METHIU 28 - Moyon Naga bible

METHIU 28

¹Atii Deennii aanuw niisin ahaarpa inii nache, Meri Magadalen re reentaang Meri enuw meenii inche thaenchu envabuwr.

²Changlaenche enruw, linglaang ipirpak ing thengsa; akhaechuve Aafhuw vaarmee ing thangbaen tanii juwngka rungchu manlupka ataklinache ong.

³Ama amaechu bicheeh abukrae ireng vaangkhe ichii ing rengka vokhehkho apeendiir chukho ruwbuwr ivaar vaang ivaar.

⁴Amana thaen aarung mee aenche emutahna engaanchik ing tiih aeka ithiithoh aanghak ing yntorsae.

⁵Changvakonchu vaarmee ing rupanuw ae ningnache ariir, “Ynchik mahruw; khros na entheh Jesu chu nenuw ing nenvajongva ichii ki ing kamanghuwsa.

⁶Ama havane ong-mahsa; akhaechuve ama ing ariir vaangkhe atak hangringsa. Huungruw, ama ajaarnii chukho vaabuwrruw.

⁷Atii nenuw ithupak ing yngkaenuwna asebok ae ningna Aafhuw ing ithii tanii hangringsa tanuwna hungriirruw, vokhehkho atarae nemaana ama Galili ting hesisa, amanache nenuw ing imu phava nenta. Enruw, neningna ki ing kariirpeeh pachuw.”

⁸Chutahnache enuw engaanchik le enrotha iroh thohche thaenchu ma aeka sebok ae ningting hungriirnii khaena ithupak ing yngkaesae.

⁹Enuw ing sebok ae ningting iriirnii khaena enghuunglae enruw, Jesu ing enuwchu yntuwhfhuw aeka eningna ariir, “Idaechu neningna omlasii!” Amana enuw ing akuurting veneeng aeka enrumsah ae.

¹⁰Changlae Jesu ing eningna ariir, “Nenuw ynchik mahruw; Ki kauw kanae aekha Galili ting hesisa tanuwna riirruw, amanache enuw ing ki imuvatae.”

¹¹Enuw ing ensirae enruw, aarung areh aeng khuwruung ting huung aeka isuwh emuchaap aanchung jaethiim ae ningna entong

¹²Chutahnache enuw ing upa aethoh yngkong aeka emanseer inuwna, enuw ing laarchang ae ningna seer piaeka embasohpa,

¹³“Sinuwna mee ae ningna Aafhuw ahakchaangchu asebok aeng theng aeka kenjaarthir envabaruwhpa taruw.

¹⁴Jinge ichii ing havana chong i lipah aapuh ningna thangnave, kenuw ing abarungriir manpen nungka vokhehkho nenuwkho yntanga imanrumahnii.”

¹⁵Chutahnache enuw ing seerchu chiaeka enriir vaangche ichii ing baver aeka havana thamin i Jehudi ae kaarna ataraen ipha ing entongnah.

¹⁶Jesu ing ariir inuwzii inche sebok suum arii yngkheh aenche Galili bung tingche vasisae.

¹⁷Amanache enuw ing Aafhuw chu emuthoh enrumsah ae; changvakonchu areh aenchembe achingnii ae.

¹⁸Amana Jesu ing entakchu vepuwhka ariir, “Thangbaen vokhehkho laaruw paamna om aatuaricheh aangkheng kaningna ympeehpa.

¹⁹Chukhaenache nenuw ing sinuwna jaat aangkhengna sebok seemruw; enuwchu Ampa, Asapa, vokhehkho Ynthiing Laetha rumingna Baptais mantu aeruw,

²⁰Ki ing neningna chonghak kapeehchuw aangkheng havi emanjiinii ing enuwchu manchuw aeruw; amanche enruw, laaruw paam avadongnii ipha ing apha om bakhaena ki ing nenuwchu ynruwfhuw vakachuw.”