Read Moyon Naga METHIU 4 Bible Online

METHIU 4 - Moyon Naga bible

METHIU 4

¹Amanache Jesu chu umlae ing batheemnii khaena paamfhuw ting laetha inche aruwpa.

²Amana Jesu ing inii nisommanrii, jaen sommanrii maaru atong aanuwna aven chaamsa.

³Changlaenche umlae inche thengka Jesu ningna ariir, “Nang Thangnang sapa vataniive, hava rung ae i tar uurnii khaena nachong bathahra.”

⁴Changvakonchu Jesu ing abasang, “Ynziihka omna, ‘Tar pang ing mee iring mahva, changvakonchu Thangnang nertanii hungsuwh chongsae chaap inche ringvaata.’ ”

⁵Aanuwnache umlae ing Jesu chu ynthiing khuwruung Jerusalem ting ruwka rumniieen basuwr yngkaangpak tingche mangkarka

⁶amana aningna ariir, “Nang Thangnang sapa vataniive jungkhuwngla, akhaechuve ynziihka omna, ‘Nakhi rapkho rung ing nasuhniimah khaena, Thangnang ing avaarmee ae ningna riirnaka engkik ing nangchu ihengadom vaatae.’ ”

⁷Jesu ing abasang, “Jinge ynziihka omna, nang ing Naafhuw Thangnang chu batheemmahva nachiiva.”

⁸Athar umlae ing Jesu chu bung yngkaangpak ting ruwreehka iruwngpaam aang-kheng alaar isa vakhaechu amansiipa;

⁹amana umlae ing Jesu ningna ariir, “Nang ing ki irum taniive, havana aangkheng i pivakachii.”

¹⁰Jesu ing umlae ningna ariir, “Ongmahra, Umlae! Ynziihka omna, ‘Nang ing Naafhuw Thangnang chu rumva nachiiva vokhehkho ama chupang rukuum tuva nachiiva.’ ”

¹¹Umlae inche Jesu chu abathenpa amana enruw, vaarmee ae juwng aeka Jesu chu rukuum entupa.

¹²Atii Jesu ing Johon chu kaeshum ting ensiihpa ichii chong asiitah nache Galili ting ympeensa.

¹³Amana Nazaret jeraenka Jebulun re Naptali paam ruwrakna Galili chifhuw kuurna om Kaparnaum nache ongsa,

¹⁴havi Jaephar Isaia ing ariir vasah chongchu ahungchumnii khaenava.

¹⁵“Jebulun paam vokhehkho Naptali paam, Jordon laar chifhuw yntongna ong ae, reentaang mee ae paam Galili!

¹⁶ynthimna ong mee aeng irengchu muvaatae amanche ynthim vokhehkho ithiinii paamna ong mee ae taklina iruungpak ireng inche aenvaata.”

¹⁷Changlaenche Jesu ing isa thamin itong basenka ariir, “Nenbarungriir huungruw, akhaechuve thangbaen paam ynneengsa!”

¹⁸Jesu ing Galili chifhuw kuurna ahungsirae ngaklah mee Pitar ichii Simon re anaepa Andru ing chifhuwna ichak endeengchu amupa.

¹⁹Amana Jesu ing eningna ariir, “Kaanuw ijiiruw, ki ing nenuwchu meesuwr mansuwhva kachuw.”

²⁰Enuw ing engachakchu bathen aeka Jesu aanuwchu enjiipa.

²¹Amana topoh yndahhak ing eng-hungsirae unae reentaang ynniimeh Jebedi sapa Jems re anaepa Johon ruwkuwng sungna empa Jebedi thoh engachak engaphuwhchu Jesu ing muka a-eenpae.

²²Amana enuw ing enruwkuwng re empachu bathen aeka Jesu aanuwchu enjiipa.

²³Jesu ing Galili paam aangkhengna sika meekongnii chaapna mee manchuwka vokhehkho thangbaen paam khaenache isa chong thamin tongka iki ina aajaeh amandam vokhehkho isuur imaang mee aajaeh chukho amandampa.

²⁴Atii Jesu ajaechu Siria paam aangkhengna thangsa, chukhaenache enuw ing reentaang reentaang laena ing ina chaap vokhehkho ijachaam emphanii, umlae ichuwng ae, imur, hakchaang ithiipoh mee vakhae enveruwchu Jesu ing amandampae.

²⁵Chutahnache Galili, Dekapolis, Jerusalem, Judia vokhehkho Jordan laartanii mee inempak ing Jesu aanuwchu enjiipa.