Read Moyon Naga METHIU 9 Bible Online

METHIU 9 - Moyon Naga bible

METHIU 9

¹Jesu ing ruwkuwngna chiilaar kaahka een hungtung,

²changlae mee aeng ahakchaang ithiipoh ina yngkheh enveruwpa. Amana ina meechu damlem vaata ichii eman-denchu Jesu ing amutah nache ariir, “Narutha manruungla kasapa, isii natuchaap kakuhpa.”

³Amana thiimthang aenche enum ing ichong ae, “Hava mee inge ithipak ing chongna!”

⁴Achong nache engkharchu amanghuw tahnache Jesu ing asii ae, “Yngkhaena changchii isii ikhachu nenkharva?

⁵Nataklina isii vakhae kakuhpa ichiire hangiir nana sira ichii i ukha inche ilaehakva?

⁶Ki ing mandang kata amachuve, Mee Sapa inche laaruw paamna isii kuhnii ruwreng adeensa.” Amana ina mee ningtingche ariir, “Hangiir, najaar niikha chinana yngkaera.”

⁷Amana idam inche hangiirka yngkaesa.

⁸Amu mee vakhae aenche ynchikpohsae amanche hangchii aatuaricheh i mee ningna apeeh Thangnang chu emanpahsah ae.

⁹Atii Jesu ing ama denchu maka ahungsirae ree ikhuum mee aruming Methiu ing akaarohna heongchu amupa. Amana Jesu ing huung kaanuw ijiira taka aachiir. Ama ing hangiirka Jesu inuwchu ajiipa.

¹⁰Jesu ing Methiu eenna amaarlae ree ikhuum aere mee aeng enrathiih aechu theng aeka Jesu vokhehkho asebok ae thohche imaarpoh ae.

¹¹Havi Pharisi aenche emutah nache asebok ae ningna ensii, “Yngkhaena nenuw neng oja inge ree ikhuum aere isii icher mee aethoh imaarpohva!”

¹²Ama chongchu Jesu ing siika abasang ae, “Idam mee ae ningna ithiim ikanii omah, ina khaena chembe ikaniina.

¹³‘Chaatha ipithoh chembe ningchuwh om ing kaadik hakva taka ynziihchu vajongnuwna tamruw.’ Ki ijuwng ing chuve ichum ynthiing ae ijongnii khaena mahva, changvakonchu isii icher ae khaenava.”

¹⁴Aanuwnache Johon sebok ae theng aeka Jesu ningna ensii, “Kenuw re Pharisi ing maaru tongchak ungka amanche nasebok aencha yngkhaena maaru atong mahpae?”

¹⁵Jesu ing eningna abasang, “Rakhii-niina itheng aeng songpa aanvae raentaang ijaanii phavaatae ichii nenkharnah? Utaraenkho phamahnii ae. Changvakonchu songpa jungruwva enchii apha hungvivaata, changlaenche enuw ing maaru tongvaatae.”

¹⁶“Achuw ingkho baruw rungopna ithar peen ing ibermah, akhaechuve ithar peen varaangkhe kika rungop-kha ynsiih sehsehna.

¹⁷Mee aenche ithar vomrip chiichu buruw shavin thuungfhuw nache thinniimah chak ae, thin ae nave shavinchu ynsiihka vomrip chiichu yntaana, vokhehkho shavin thuungfhuw ae chukho maangna; changvakonchu enuw ing ithar vomrip chiichu ithar shavin thuungfhuw nache enthinnah, amana chembe aaniimeh ing isa ing omna.”

¹⁸Jesu ing changche achonglae enruw, Jehudi iruung yngkheh vathengka Jesu maensokna akheer-khuwh mansinka athamsah, “Kasanuw ataenrap thikdohsa; ivakpeeh nana ataklina nakik isiipeehsara, amana chembe ama hangring vaata.”

¹⁹Chukhaenache Jesu ing hangiirka avejiipa vokhehkho asebok ae ingkho envejiipa.

²⁰Changlae kumsuum ariinii sii ynta ing ina sanuw yngkheh ing vakka atuk nungting arungop basuwrna aparpa.

²¹Ataksah ing amanden chuve, “Ki ing arungop basuwr pangkho parcheh saningve damva kata achii.”

²²Jesu ing huw ruwsachu siika avaanleh tahnache sanuwchu muka ariir, “Kasanuw, nabarungriir mangamla, ithuwh ing namandensah inuwzii ing damsachii.” Aphachak nache sanuwchu vadamsa.

²³Atii Jesu ing iruung een tingche avaruwh raenche simruwr itum ae tachaam iriae enghuw itamchu muka

²⁴Jesu ing ariir, “Nengkheng ong-mahruw! Rupanuwti havi ithii mahva, ijaar vatah!” Chongchu ensiitah nache Jesu chu emaniisah.

²⁵Mee vakhaechu taang ensuwh aanuwna, Jesu ing varuwhka rupanuwti akiknache abachuw tahnache rupanuwtichu hangringsa.

²⁶Hava chongthar i apaam arakiing aangkhengna thangsa.

²⁷Atii Jesu ing ama denchu maka ahungsirae mikchu mee ynniimeh aeng aanuw vejii aeka naning imanchuwhsar, Devit sapa ta aeka iva uung ae.

²⁸Jesu ing eensung ahungruwh tahnache mikchu aekho varuwhsae. Amana Jesu ing asii ae, “Ki ing mansakcheh vakachuw ichii nentha-chanah?” “Imansakcheh vaanta ta aeka embasang.”

²⁹Amana Jesu ing emik parka ariir, “Nenuw nenthacha inuwzii inche damruw!”

³⁰Amana emik ichuchu saksa. Aanuwnache Jesu ing eningna ipirpak ing ariir, “Achuw ningnakho havi riirmahruw.”

³¹Changvakonchu enuw ing apaam lija ihuur aeka mee vakhae ningna hava thamin i enjarpa.

³²Enuw mee ynniimehchu engaangkaedeh aanuwna umlae ing ichuwng ichong achehmah yngkheh Jesu ningnache enveruwpa.

³³Chang-vakonchu Jesu ing umlaechu athurthoh ichong achehpa. Amana mee aenche ngik aeka enriir, “Hava hangchii i Isrel sungna utaraenkho mumahrideh ung.”

³⁴Changvakonchu Pharisi aenche enriir, “Hava mee i umlae aaruung jaarna umlae athurcheh vatah.”

³⁵Atii Jesu ing akhuwsiir, akhuw-veensiir nache baversa. Amana meekongnii nache varuwhka iruwng lipah tanii isa chongchu atongpeeh ae, vokhehkho ina, isuur imaang aechu amandam.

³⁶Changlae ama ing mee inempak aechu amucha aning amanchuwhpae, akhaechuve acheer omah jao ae vaang enuw ja aeka ynsaenongsae.

³⁷Chutahnache asebok ae ningna ariir, “Ruwrae kuumfhuw inempak ruungna, changvakonchu kuumvachii mee tuumpakna.

³⁸Chukhaenache ruwrae kuumvachii mee ajebathennii khaena Aafhuw ningting thamsaruw.”