Read Moyon Naga MAAK 1 Bible Online

MAAK 1 - Moyon Naga bible

MAAK 1

¹Thangnang sapa Jesu Khrista khaena isa chong abasennii.

²Thangnang Jaephar Isaia thiimziihna ynziih vasah vaang: “Enruw, nenlam iseemnii khaena, ki ing nemaana kachong ijeermee kajenchiirsa,

³iruur yngkheh ing paamfhuwna uungna; Aafhuw lamchu seemruw, amanche asinii lam chukho manchiimruw!”

⁴Baptis Johon ing paamfhuwna thengka isii kuhnii khaena barungriir huungruw taka amanthang.

⁵Amana Judia paam aangkheng tanii vokhehkho Jerusalem tanii mee vakhae inche aningting theng aeka isii enrangchu enriir; amana Jordan chifhuwna enuwchu Johon ing baptais mantu aeka amanthiing ae.

⁶Johon chu ut savin peendiir ing ynthong vokhehkho adiirriim shavin ing chiimka amanche khaeruwng re khiniing asah.

⁷Ama ing amanthang chong chuve, “Kaanuwna thengvachii mee i kachungna alaar isa omseh chuva, akhingop runoh rapkho kiim ningka ynjoh matik chasamah ing.

⁸Ki ingve chii ing kamanthiing sachuw changvakonchu Mee Sapa inchembe laetha ynthiing ing imanthiing vaata.”

⁹Apha ichiinache Galili tanii Nazaret Jesu ing thengka, Johon ing Jordan iva nache baptais amantu.

¹⁰Amana chii sungtanii ahungsuwh chakthoh, thangbaen ymmongsa vokhehkho laetha inche ataklina khunu vaangche ijungchuwchu amu.

¹¹Changlaenche thangbaen tanii senruwr yngkheh ing ajeriir, “Nang i kaning namansiihpak kasapa chuvachii, naningna ki inempak pensakning.”

¹²Aanuwnache laetha ing Jesu chu paamfhuw ting aruwpa.

¹³Paamfhuw nache Jesu ing inii nisommanrii ongka umlae ing abatheem; amanche lampa sha aethoh onghak ae; changlae vaar-mee aenche Jesu chu rukuum entu.

¹⁴Atii Johon ensuwr aanuwna, Galili nache Jesu thengka, Thangnang tanii isa chongchu tongka

¹⁵vokhehkho ariir, “Aphachu hungvisa, Thangnang lipah chukho ynneengsa. Barungriir huungruw vokhehkho isa chongchu thacharuw.”

¹⁶Jesu ing Galili chifhuw kuurna ahungsirae, ngaklah mee Simon re anaepa Andru ing chifhuwna ichak endeengchu amupa.

¹⁷Amana Jesu ing eningna ariir, “Kaanuw ijiiruw, ki ing nenuwchu meesuwr mansuwhva kachuw.”

¹⁸Enuw ing engachakchu bathen aeka Jesu aanuwchu enjiipa.

¹⁹Amana topoh yndahhak ing enghungsirae, Jebadi sapa Jems re anaepa Johon ing ruwkuwngna ong aeka engachak engaphuwhchu Jesu ing avemu ae.

²⁰Changlaenche Jesu ing enuwchu a-een ae; amana enuw ing ruwkuwng sungna ong empa Zebadi re eneeh mee aechu bathen aeka aanuw enjiipa.

²¹Amana enuw ing Kaparnaum ting siaeka vokhehkho Deennii inii nache Jesu ing meekongnii tingche varuwhka mee aechu amanchuw.

²²Jesu ing amanchuw ae nache enruw riimpohsa, yngkhaena ynchii imbe thiimthang ae vaang tamahka, aatuaricheh yngkheh vaang amanchuw ae.

²³Changlaenche meekongnii sungna umlae ing ichuwng mee yngkheh heong inche uungka

²⁴ariir, “Nazaret tanii Jesu keningna ynchii tukata nachiiva? Kenuw eemaang ithengvachii? Ki ing nang i achuwvachii ichii kamanghuw sachii, nang i Thangnang tanii ynthiing yngkheh vachii.”

²⁵Changlaenche Jesu ing arakuh, “Nahuw mandae nana aningtanii hung-suwhra.”

²⁶Amana umlae ing atakchu aanukrii aanuwting iruur yndang ing uungka aningtanii taang suwhsa.

²⁷Chutahnache enuw vakhae enruw riimka yngkheh yngkheh ynsiisae, “Havi ynchiiva? Ynchii ithar ymman chuwva? Aatuaricheh thoh ynruw ing umlae ae ningna rapkho chonghak apeeh i, vokhehkho achongchu enuw ingkho emanjii i.”

²⁸Aanuwnache Galili ing aruwkuwr paam vakhaena Jesu ajaechu thangsa.

²⁹Enuw ing meekongnii tanii enjungsuwh chakthoh, Jems re Johon ynruwfhuwka Simon re Andru eenting hungruwhsae.

³⁰Changlae Simon ampuwchu riitheng ing nakka hejaarchu Jesu ningna emanthangpa.

³¹Chutahnache Jesu ing veneengka akiknache jebachuwka ahemangiir tahnache anikungna ariithengchu damka ama ing rukuum atupae.

³²Amana inii jungtakka khuri ajungvithoh, ina iki omchaap vokheh-kho umlae ing ichuwng ae chaap Jesu ningting enveruwpohpa.

³³Amanache khuwruung tanii mee vakhae thengpohka eenkhaarkung nache yngkongsae.

³⁴Amana reentaang laena ing ina chaap ae chukho amandampa, amanche umlae ae chukho manchong chehmahsa, havi enuw ing Jesu chu achuwva ichii emanghuw khaenava.

³⁵Khuw ahungvaardir mahrirae, Jesu ing hangsuwka michuwr daereng minting vakka athamsah.

³⁶Amana Simon vokhehkho aanruwfhuw ae ing Jesu chu enghenjongpa,

³⁷enuw ing Jesu chu tuwh aeka aningna enriir, “Mee vakhae ing nangchu ynjongnah ae.”

³⁸Jesu ing eningna ariir, “Isa chong katongnii ing reentaang khuw tingkho sitaruw, havi khaene ki ijuwngping.”

³⁹Jesu ing Galili paam aangkhengna sika, meekongnii chaapna thamin atong vokhehkho umlae ajaeh chukho athur.

⁴⁰Amana ynchor mee yngkheh ing Jesu maana khupka aningna athamsah, “Nang ing irupeeh taniive, ki ymmandamcheh sachii.”

⁴¹Aning amanchuwh thoh ynruw ing akik ing jeparka, karusa damsara taka ariir.

⁴²Aanuwchak nache ynchor ing ina meechu damka manthiingsa.

⁴³Amana Jesu ing ipirpak chong tahka abathen,

⁴⁴“Rungaera mee ningna yntanga riirmahdehra, chang-vakonchu vaknana natak ing jaethiim ningna vamandang, vokhehkho mee ae ing natak i manthiing sachii ichii emanghuwnii khaena Mosi ningna vajeer chonghak apeeh inuwzii ing ipeehfhuwchu vapira.”

⁴⁵Changvakonchu ama ing yngkaeka mee ningna amanthangpa, vokhehkho ynjakrudeh ing mee vakhae ningnache atongpa. Chutahnache atii Jesu ing khuwruung ting yndang ing sichehmahsa; chukhaenache Jesu ing khuwruung tanii ympeenka michuwr daereng aphamchaap nache ongsa, amana ariikiing manrii tanii mee vakhae Jesu ningting ivatheng ae.